Tuesday, December 25, 2007

كل يوم كارثة

الكام يوم اللي فاتو دول مش عارف فكرتني بأول ما مسكت حكومة عاطف عبيد حصلت كام كارثه ورا بعض اشهرها طائره المصريه التي سقطت على السواحل الامريكيه
الطائره كانت تحمل 32 ضابط مصري كانو في رحله تدريب و قيل ان السبب ان الكابتن قال توكلت على الله و رايح موقعها
المهم جت كده في العيد الاول اصطدام المترو بالحاجز الخرساني لأخر الخط في حلوان و تاني يوم سقوط ميكروباص في المنيا و مقتل 16 او نحتسبهم شهداء عند الله و الغريق شهيد بإذن الله و اخيرا عماره لوران في اسكندرية لدرجه اني كل يوم افتح مصراوي الاقي خبر بصراحه الواحد بقى يخاف يفتح الاخبار اليومين دول.
و العماره طلعت تقريبا حتى الان وفاه 8 و لسه هناك مفقودين رنا يسهل في عمليات الانقاذ خصوصا لأن لسه بيطلع احياء
المهم سيبكم من كل الكوارث دي اللي هيشلني اقل واحده فيهم بتاعه مترو الانفاق
خبر قيريته في صحيفه 24 ساعه ام بلاش اللي انا بحبها لسببين الاول انها اظهت صحفي جديد مقريتلوش قبل كده بس شكله نواه جيده لصحفي معارض الصحفي ده اسمه سمير رجب مش عارف الاسم مش غريب عليا بس فعلا واضح انه معارض جامد لسياسه الحكومه
اه هو في شبه من سمير رجب رئيس مجلس و رئيس تحرير الجمهوريه السابق بس اعتقد ان ده انتقل الي رحمة الله
و السبب التاني انها ببلاش يعني على اسؤ تقدير ممكن تنفع في قلي البطاطس
الخبر هو حبس سائق المترو 15 يوم على زمه التحقيق
حيث ان السائق هو السبب لأنه ساب الكابينه و قعد يتخانق مع الركاب
انا عاوز انقل ليكم بعض الملاحظات اللي انا بلاحظها في المترو عامه
1- من النادر جدا و ان كان يوجد ان تجد كابينه قياده بها سائق لوحده دايما معاه ناس رغم انه ممنوع بس فيه و غالبا بيكونوا زملائه السائقين و على فكره ده من اول ما اداره المترو انتقلت من الاداره الفرنسيه للأداره المصرية
2- اي مترو فيه عربيته الخلفيه فيه شله و دي لازم مش واحد لأ شله بترغي مع بعض دول ليه مغطوش على السواق و اضعف الايمان طلبوا في الميكروفون الداخلي شد فرمله الطوارئ
بصراحه حكومتنا ليها سوابق جميله زي مثلا توكلت على الله و غيرها يا ريت بقى لو عاوزين نصدق ذيعوا التسجيل بتاع المترو عشان واحد زيي يحط لسانه جوه بقة و يخرس .
بصراحه انا مش هقتنع ان السواق ساب العربيه و مشي الا لو جابوا تسجيل غير ممنتج للكلام و هو داخل المحطه الا اذا كان فعلا متعاطي حاجه لأنهنم قالو انهم هيعلو ليه تحليل مخدرات
في نقطه عاوز اتكلم عنها سياسه الجرأه او عدم السلبيه من الركاب في الخط الاول هناك فرمله طوارئ في العربيات و في الثاني هناك فرمله و زرار لفتح الباب يدويا و أخر للتحدث مع السائق
و كل هؤلاء بجانبهم تحذير شديد اللهجه ان من يستعملها في حاله غير الطوارئ يعرض نفسه للمسائله القانونية
بصراحه الناس بتقلق تدوس عليها و تسائل قانوينا .
حصل موقف في الخط التاني صباحا في وقت الزروه و انا محشور في نص المترو في احد المحطات تعرض احد الاشخاص للأغماء داخل العربيه الناس قعدت تسند فيه و بدل ما الناس ما تستعمل الوسائل المتوافره فتح الباب يدويا او التحدث مع السائق حتى ينزل المريض في المحطه قبل تحرك القطار لأ اتنين مسكو الباب بأديهم و ناس حاولو يشيلوه بس طبعا الباب قفل قبل ما نعرف نخرجه بس بصراحه الناس تعاملت بشهامه قام الناس على كنبه و نام عليها و بدأو يحاولوا يفوقوه لغايه ما فاق
بس هي نفس المحصله مفيش حد حاول يستخدم اي من الاجرائات المتاحه مش عارف خوف و لا عدم تعود
اعتقد ان اي حد كان يشوف المترو داخل المحطه بسرعه كبيره لازم يضغط عليها و يستخدمها
و برده مش هصدق الحكومه الا في حاله واحده بس
انهم يذيعوا الشريط المسجل بدون منتاج
لأننا كلنا كتير من موضوع تلبيس العمليه للسواق

7 comments:

فرنسا هانم said...

هى العمليه تلبيس طاقيه ده لده
وهو المتبع دائما مع حكومتنا الموقره
حيث ان لكل شىء رؤيه حكوميه غير الواقع
مش الجندى اللى قتل الاسرائليين من كام سنه طلع مجنون وشنق نفسه ؟؟؟؟؟
اظن كان اسمه سليمان خاطر

مروة الزارع said...

بجد مش عارفة اقول اية

Anonymous said...

عشان ما يعرفوش أدوات الامان دي
شعبنا ده طيب جدا
و تلبيسها للسواق ده موضوع طبيعي جدااااا
و متوقع
ده كويس ما لبسوهاش للعمود
!!!!!!!!!!!!!!

محمد مارو said...

اخى الفاضل
ملاحظاتك جميله اوى
بس خلينى اقف مع السائق و اقول ان قله ادب الشباب و عدم الاحساس بالمسؤليه هى اللى دفعته لكده
لان من قرائتى لحيثيات الحادث اقدر اقولك
ان الشباب كانوا عمالين يخبطوا بقوه ع باب المترو
و بدون داعى
ليه بئه مش يتم محاكمه الشباب دى ؟

Unknown said...

فرنسا هانم
ايوه هو لبس د لده و العباره الغرق مسئوليه القبطان

Unknown said...

wa7dania
اه و الله ممكن يقولو السبب ان الحاجز الخرسانه اتحرك لوحده ووقف قدام شويه

Unknown said...

محمد مارو
شباب مين دي اشتغاله دي عربيه سيدات اللي وراه

Google