Friday, November 23, 2007

مفيش كلام جديد

مفيش كلام جديد اقوله دي مقدمة لابد منها عشان محدش يرهق نفسه في كلام و يدعي عليا في الاخر
البوست ده مجرد تقفيل مكان حسيت ان بقالي كتير مبكتبش فقلت اكتب و خلاص بس اكتب عن ايه فحتى هذه اللحظه انا مش عارف الظاهر كده ان عشان الفتره اللي فاتت خرجت كتير مع اصحابي على غير العاده ده خلى في متنفس ليا غير الكتابه فبقى مفيش حاجه اطلعها في كتابتي بس برضه بالغصب هكتب عن اي حاجه عن ايه معرفش .
قريت من كام يوم في جريده 24 ساعه ( بجيبها بس عشان ببلاش اما انا مقاطع كل الجرايد من سنين اهي حتى تنفع في قلي البطاطس ) ان الحكومه ستخصص مش فاكر الرقم بالظبط 3 و لا 30 بس اعتقد 30 مليار جنيه للأهتمام بالصرف الصحي و بعديها بيومين سمعت ضوضاء في الشارع بالليل .
خرجت من البلكونه لقيت عربيه نقل بتفضي زفت على ارضيه الشارع تمهيدا انه يتسفلت قلت اخيرا عشت لليوم التاريخي ده و افتكرت يوم تاريخي كان على نفس المستوى ده من حوالي 15 سنه .
فجأه بدون اي مقدمات أعلن ان السيده الفاضله حرم رئيس الجمهوريه السيده سوزان مبارك هتزور مدرسه تعتبر في شارعي المتواضع بس الشارع مش متسفلت و لا في ارصفه الشارع يعني تخرج من باب العماره تلاقي الرمل على طول في الشارع شارع رملي .
طبعا مينفعش اسطول السيارات المرسيدس يغرز في الرمل لازم الحي يفتح الخزائن و يبدأ مرحله جديده من تعمير الشارع و المناطق المحيطه من المدرسه المناطق التي لن يمشي بها الموكب و لكن هناك احتمال و لو ضئيل ان يمشي فيه .
بدأت في الشارع على مدى اسبوعين حمله شديده القوه جزئ بيسفلتو فيه و جزء بيمهدوه و جزئ بيحطو فيه رصيف و جزي بيتملي جوه الرصيف رمل و زلط تمهيدا لأسفلت فوق الرصيف و جزء اخر من الرصيف بيسفلتوه بعد ما ملوه ( ملحوظه هامه جدا مكانتش لسه طلعت موضه البلاط في الرصيف ) و بدأ في الاجزاء القريبه من المدرسة زراعه الاشجار .
كان كل شئ ماشي كويس و الشارع اتسفلت و الرصيف اتعمل و جزء كبير من الرصيف اتسفلت و بدون اي مقدمات اتلغت الزياره فجأه و بدون مقدمات اتشالت المعدات و بدون مقدمات شالو الشجر و بدون مقدمات بقى نص الرصيف مسفلت و نصه رمل بس لازم الاعتراف اننا طلعنا بمكسب الشارع بقى اسفلت و ده اكيد مكسب كبير .
ذكريات عدت عليا و انا بشوف المشهد بيتكرر بعد 15 سنه او اكثر قليلا بعد فتره شاف الاسفلت فيها الويل و لغايه دلوقتي فاكر اول حادثه للأسفلت ده تقريبا كان حرق كابل كهرباء خلاهم يحفروا الاسفلت في نفس سنه السفلته تقريبا و طبعا بعد ما خلصوا ردموا بس و توالت الحوادث و انتشرت المطبات الطبيعيه نتيجه اعمال الحفر مره كابل مره ماسوره ميه .
بس اخيرا هيسفلتو الشارع تاني ده يوم تاريخي لازم يتسجل ......
بعد ساعتين لقيتهم مشيوا سفلتو ربع الشارع و سفلتو النص و سابو الاحرف من الاخر رقعوا الشارع
بعد تفكير عميق و خصوصا في النهار اكتشفت انهم سفلتو من اول البلاعي لأخر الشارع
طبعا ناس هتسألني ايه علاقه الصرف الصحي في اول البوست بسفلته الشارع بصراحه انا عرفت ليه عملوا كده لأن البلاعه دي دائمه الطفح و طبعا الشارع مايل ناجيه الشارع الرئيسي و الميه بتخلي منظر الشارع الرئيسي مش ولابد فقالو يعلو الجزء من بعد البلاعه و يسفلتوه و الاجناب المش مسفلته عملوا بلاعه مطر فعرفت فعلا احنا بنفكر ازاي
كل الناس بتحل المشكله في اي دوله احنا بنفكر ازاي نخفي المشكله رحم الله ال 30 مليار في موازنه العام الجديد
حته على الماشي
البلاعه مطفحتش من ساعه ما عملو كده من 3 اسابيع و كأنها تعاندهم عشان التأليف الغريب اللي عملوه .

25 comments:

Unknown said...

بعد ما سوزان تيجي هايلموا الزفت تاني
بوست جميل اوي

اسامة يس said...

هيه دي مصر التي في خاطري اقصد اللي في ارض الواقع ... فالتي في خاطري مجرد حلم بعيد المنال

هنقول ايه بس .. لكن الى متى سنظل هكذا..
خالص تحياتي

فرنسا هانم said...

نظام الترقيع ده
احلى نظام للحراميه
والشارع هيتحسب اتسفلت بالكامل
وعجبى

Esmat said...

المهم إنهم بعد 15 سنة سفلتوا تانى
نفتكرهم كمان 15 سنة على الاسفلت الجديد
وتقعد مع عيالك تحكى لهم الحكاية
البلد عمرها ما حتتقدم
طول ما فيها ناس معندهاش ضمير
ربنا يرحمنا منهم

ما علينا said...

يعني انت كنت عايزهم
من 15 سنة يهدروا المال العام

الاموال دي متخصصة لاستبقال مثل زيارات السيدة الام الاولى

خلاص الناس جات لهم معلومة ان الزيارة اتلغت

عايزهم ايه كانوا يستمروا
طيب ليه

طالا انتفى الغرض من الاعدادات
تبقى الاعدادات كمان لازم تتلغي


وموضوع انهم بيداروا المشكلة
دا دليل على السرعة
والقدرة على التعايش مع الازمات


طيب والله انت حال شارعكم ارحم من عندنا

احنا عندنا الشارع الرئيسي في مدينتنا

كل سنة يتسفلت
وبعد ما يتسفلت يحفروا فيه

مرة صرف صحي
مرة مياه
مرة بيغيروا خطوط الصرف
مرة بيغيروا خطوطا المياه

الغريب انهم يسفلتوا في الصيف
وما نلحقش نفرح بيه شوية
ويحفروا على دخلة الشتا
ويسيبوه محفور مدة حلوة كدا


شفت فيلم خلي الدماغ صاحي
اهو كدا بالظبط

mesh2dra said...

السلام عليكم

هم يضحك وهم يبكي

شفت جواز بقرار جمهوري؟
شفت ازاى راحوا يشيلوا التعديلات اللي حطوها بالشارع عشان الفرح مش حيتعمل بالمكان ده
احمد ربنا بقى
انهم مش حييجوا يشيلوا الاسفلت الجديد
انتوا كده دايما
نيتكم وحشة
مش تحمدوا ربنا وتشكروه
لان ماما بتاعت مصر رايحة عندكم

***
عندي سؤال
هو لما بيكون فيه زيارة لمبارك او جمال او سوزان او اى حد
بيكونوا عارفين ان الامور متظبطة جديد
ولا مش عارفين
يعني بيشتغلونا ولا بيشتغلوا نفسهم
؟؟
!!

سلاماتي
ومتبقاش تخرج مع اصحابك كتير

Unknown said...

هي دي مصر ياعبلة
:)

ياسيدي مادي أحدث طريقة في مواجهة موضوع الصرف الصحي
وبعدين مش الشارع الرئيسي مبقاش فيه مجاري؟؟

يبقى المشكلة اتحلت ولا لأ؟؟
يا متعلمين يابتوع المدارس
:))

تحياتي

ارسم بالرصاص said...

محمد صبحي .. نظام السفلتة ده هو الوسيلة المتبعة ف كل شي وفرش الزرع ولمه اسرع من فرشه ده برضو حاجة عادية بس انا بستغرب اوي على استغرابك .. ده بيكتبوه ف الجرايد خبر بالبونط العريض .. انهارده تم سفلتت شارع كذا وتشجيره وعمل جزيره ف الوسط وغدا بحمد الله وفضله ومشيئته سيتم لم الزفت ولم الفرش وفتح الجزيرة ع البحر وتحياتنا للمسؤلي الاحياء اعزهم الله ..

محمد صبحي .. بوست ساخر وشائك

تحياتي ليك .. هايدي

Unknown said...

يظهر ان بلدنا دى مش لينا ، يظهر اننا مش ماليين عنين الحكومة مش شايفينا بنى ادمين محترمة يسفلتولنا الشوارع و يزينوها بالزرع البنى ادمين فى نظهرهم حكر على اسرة معينة
معلش يمهل و لا يهمل

مش هنسى said...

على فكمرة هم بيعملو كده علشان يأكدوا للناس إنهم فى مصر

Unknown said...

قولى يا محمد انت متاكد انك مبعتش الدعوه للريس ولا السيده حرمه المصون
ولا حد فى شارعكوا داخل على جنازه قصدى جوازه يعنى

اصلك فكرتنى بفيلم جواز بقرار جمهورى

لو كان كده انا ممكن ابعتلك طلب تقدمه للست

سمـــــــــا said...

ايه دا انتى عايزهم يسفلتوا الشارع واللا ايه ؟؟ انت نسيت انك فى مصر ؟؟
:))

بمناسبة السفلتة انا عند بيتى عملوا نفس الحركة دى كسروا الشارع وبعدين جابو الطوب الابيض الصغنن ورموه فى الشارع الكلام دا بقاله اكتر من 7 شهور ومن ساعتها ولا حس ولا خبر !!!
والسكان بيستغلوا الاماكن المنخفة فى الارض وبيرموا فيها الزبالة . وطبعا انسى يا حاج ان الشارع هيتسفلت من اساسه ، تصدق والله كان شكله الاول اشيك :))

تحياتى

صاحب المضيفة said...

هو من ناحية مافيش كلام جديد

هو فعلا ما فيش جديد في الزمن ده

لكن فعلا هو ده حالنا من زمن

الحاجه مش تتعمل الا لما يكون في شخصية جاية

ولو مش جاي لازم الناس تتفلق عداي خالص

كان الله لنا

مدونة بيسطة وحلوة

Unknown said...

EmY
مهي مجاتش
مكملوش اصلا سفلته

Unknown said...

osama
طبعا مصر اللي في الخاطر مش موجوده الا في الخاطر

Unknown said...

فرنسا هانم
الحساب شئ تاني الحساب ده سفلتو الشارع و اللي جنبه و و لو عاوزهخ كمان يتحسب انه اتحفر نفق

Unknown said...

Esmat
ولاد مين هو انا اخلف حد يعيش فغيب العالم ده

Unknown said...

ما علينا
طب ده عندكو كويس انه بيتسفلت تاني صيف احنا كل 15 سنه

Unknown said...

mesh2dra
بتقولي فيها الاسبوع ده قعدت في البيت مخرجتش خالص

Unknown said...

أنونيمس
طبعا المشكله اختفت بس اتحلت ؟؟

Unknown said...

ارسم بالرصاص
لأ مش يوم سفلته و يوم شيل
اسبوع سفلته و يوم شيل

Unknown said...

مش هنسى
و مفيش اسلوب تاني يأكدو انها مصر بيها

Unknown said...

لماضة
اعتقد ان مؤلف الفيلم هو اللي كان من الشارعو كتب القصه لأنها اقدم كتير من الفيلم

Unknown said...

سمـــــــــــا
كويس انهم ابدو نيه السفلته و حطو الطوب الابيض في الاخر

Unknown said...

صاحب المضيفة
فعلا مفيش جديد
شكرا على الزياره

Google