تاااااج

اخر بوست في السنه دي و كل سنه و انتو طيبين و اخترت اخليه التاج اللي اتمررلي من ايمي و كوكا احسن الواحد يخاف المدونه تتشمع او يتحط السيخ المحمي في صرصور ودنه فقولت اخدها من قاصرها و اجاوب على التااج

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
ده على حسب انهي شعب عربي المغاربه بيحبوا المصريين في جنسيات بتكره المصريين صعب اجاوب السؤال لأختلاف الاعراق العربيه و لأني مش عارف هتقمص مين

لوكنت أوروبي أو غير مسلم هتبقي إيه نظرتك للعرب والمسلمين؟
مجموعه همج ارهابيون يعيشون وسط الصحراء
يحبون القتل و الارهاب لأن دينهم يأمرهم بهذا

لوقالولك إنت بقيت رئيس جمهورية هتعمل إيه؟
سؤال صعب جدا و أطول سؤال في اجابته بس هحاول الاتختصار
اول شئ العدل لأن العدل يجلب الامان حكمت فعدلت فأمنت فنمت يا عمر
بالنسبه لحكم مصر اول قرار ممكن تتخذه تعديل الدستور بما يتيح العداله في الانتخابات و جعل الانتخاب حق لأي مواطن يتعدى سنه الاربعين و ليس قاصرا على الاحزاب فقط
اقتصاديا يجب تدخل حكومي في السوق اه في اقتصاد حر بس مفيش احتكار
بمعنى اي صناعه تجد الحكومه اسعارها احتكاريه يجب ان تتدخل في الصناعه و تنشئ شركه حكوميه هادفه للربح و المنافسه و تخفيض السعر للسعر المفروض انه يكون موجود مع انتاج سلعه منافسه في مواصفتها ووجود هدف الربح فيها و يجب التقنين من سياسه الخصخصه بخصخصه الشركات الخاسره فقط لتنافس اما الشركات اللي بتحقق ارباح ليه تتخصخص زي مثا ما اتخصخت بغرابه شديده شركه الهرام للمشروبات رغم انها كانت تحقق ارباح كبيره
بالنسبه لسياسه مصر الخارجيه محتاجه تدار بشكل اكثر قوه بلاش حاله الخنوع السياسي دي
التعليم محتاج اعداه ترتيب
المرتبات محتاجه اعاده تغير
البطاله حلها في دخول الحكومه في فتح الشركات زي ما قلت فوق و الاستثمار هخليها تعين مزيد من العماله و استيعاب المزيد من الخريجين صعب اجابه السؤال ده اوي اشبه بوضع برنامج انتخابي و انا عارف ان متكلمتش في الكتير بس حاولت اختصر قدر الامكان
لوسمح لك برؤية الرسول عليه الصلاة والسلام وإنك تقوله كلمة واحدة ؟
اسئله شفاعته لي يوم القيامه
لو كنا في عصر ازدهار الأندلس كنت تتخيل نفسك إزاي؟
لأ صعب اروح زمن مش زمني مدام شوفت التطور ده صعب اني اروح الماضي بس اشمعنى الاندلسي ليه ميكونش الخلفاء الراشدين او الاموي او العباسي
لو خطبت واحدة أو اتخطبتي لواحدوأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
عادي جدا ده لو خطبت اصلا او اتجوزت اصلا
لو طلعت القمر هتكتب عليه ايه؟
لو طلعت القمر هيكون معايا فلوس و لو معايا فلوس مش هصرفها في طلوع القمر هعمل ايه يعني فوق اصرف ملايين عشان اشوف شويه طوب
لو مررت التاج لحد وماجاوبش هتعمل ايه؟

مش هعمل حاجه المسامح كريم

تمرر التاج لمين

السؤال الصعب هكون دبلوماسي و لا امرره لحد
اقولك امرره لحد
يوميات عيل مصري
لمااااضة
عندليبيات

و كفايه كده اوي

كل يوم كارثة

الكام يوم اللي فاتو دول مش عارف فكرتني بأول ما مسكت حكومة عاطف عبيد حصلت كام كارثه ورا بعض اشهرها طائره المصريه التي سقطت على السواحل الامريكيه
الطائره كانت تحمل 32 ضابط مصري كانو في رحله تدريب و قيل ان السبب ان الكابتن قال توكلت على الله و رايح موقعها
المهم جت كده في العيد الاول اصطدام المترو بالحاجز الخرساني لأخر الخط في حلوان و تاني يوم سقوط ميكروباص في المنيا و مقتل 16 او نحتسبهم شهداء عند الله و الغريق شهيد بإذن الله و اخيرا عماره لوران في اسكندرية لدرجه اني كل يوم افتح مصراوي الاقي خبر بصراحه الواحد بقى يخاف يفتح الاخبار اليومين دول.
و العماره طلعت تقريبا حتى الان وفاه 8 و لسه هناك مفقودين رنا يسهل في عمليات الانقاذ خصوصا لأن لسه بيطلع احياء
المهم سيبكم من كل الكوارث دي اللي هيشلني اقل واحده فيهم بتاعه مترو الانفاق
خبر قيريته في صحيفه 24 ساعه ام بلاش اللي انا بحبها لسببين الاول انها اظهت صحفي جديد مقريتلوش قبل كده بس شكله نواه جيده لصحفي معارض الصحفي ده اسمه سمير رجب مش عارف الاسم مش غريب عليا بس فعلا واضح انه معارض جامد لسياسه الحكومه
اه هو في شبه من سمير رجب رئيس مجلس و رئيس تحرير الجمهوريه السابق بس اعتقد ان ده انتقل الي رحمة الله
و السبب التاني انها ببلاش يعني على اسؤ تقدير ممكن تنفع في قلي البطاطس
الخبر هو حبس سائق المترو 15 يوم على زمه التحقيق
حيث ان السائق هو السبب لأنه ساب الكابينه و قعد يتخانق مع الركاب
انا عاوز انقل ليكم بعض الملاحظات اللي انا بلاحظها في المترو عامه
1- من النادر جدا و ان كان يوجد ان تجد كابينه قياده بها سائق لوحده دايما معاه ناس رغم انه ممنوع بس فيه و غالبا بيكونوا زملائه السائقين و على فكره ده من اول ما اداره المترو انتقلت من الاداره الفرنسيه للأداره المصرية
2- اي مترو فيه عربيته الخلفيه فيه شله و دي لازم مش واحد لأ شله بترغي مع بعض دول ليه مغطوش على السواق و اضعف الايمان طلبوا في الميكروفون الداخلي شد فرمله الطوارئ
بصراحه حكومتنا ليها سوابق جميله زي مثلا توكلت على الله و غيرها يا ريت بقى لو عاوزين نصدق ذيعوا التسجيل بتاع المترو عشان واحد زيي يحط لسانه جوه بقة و يخرس .
بصراحه انا مش هقتنع ان السواق ساب العربيه و مشي الا لو جابوا تسجيل غير ممنتج للكلام و هو داخل المحطه الا اذا كان فعلا متعاطي حاجه لأنهنم قالو انهم هيعلو ليه تحليل مخدرات
في نقطه عاوز اتكلم عنها سياسه الجرأه او عدم السلبيه من الركاب في الخط الاول هناك فرمله طوارئ في العربيات و في الثاني هناك فرمله و زرار لفتح الباب يدويا و أخر للتحدث مع السائق
و كل هؤلاء بجانبهم تحذير شديد اللهجه ان من يستعملها في حاله غير الطوارئ يعرض نفسه للمسائله القانونية
بصراحه الناس بتقلق تدوس عليها و تسائل قانوينا .
حصل موقف في الخط التاني صباحا في وقت الزروه و انا محشور في نص المترو في احد المحطات تعرض احد الاشخاص للأغماء داخل العربيه الناس قعدت تسند فيه و بدل ما الناس ما تستعمل الوسائل المتوافره فتح الباب يدويا او التحدث مع السائق حتى ينزل المريض في المحطه قبل تحرك القطار لأ اتنين مسكو الباب بأديهم و ناس حاولو يشيلوه بس طبعا الباب قفل قبل ما نعرف نخرجه بس بصراحه الناس تعاملت بشهامه قام الناس على كنبه و نام عليها و بدأو يحاولوا يفوقوه لغايه ما فاق
بس هي نفس المحصله مفيش حد حاول يستخدم اي من الاجرائات المتاحه مش عارف خوف و لا عدم تعود
اعتقد ان اي حد كان يشوف المترو داخل المحطه بسرعه كبيره لازم يضغط عليها و يستخدمها
و برده مش هصدق الحكومه الا في حاله واحده بس
انهم يذيعوا الشريط المسجل بدون منتاج
لأننا كلنا كتير من موضوع تلبيس العمليه للسواق

كوكتيل

من اسبوع تقريبا دخلت فيلم هي فوضى قبل ما اخش الفيلم قريت عن الفيلم من النقاد انه من افضل الافلام هذا العام و الفيلم يتميز بالجرأه و كلام كتير فدخلت الفيلم و انا مستني انبهار مش عارف ليه خر جت من الفيلم عاجبن و مش عاجبني و ربنا يستر و محدش يقولي انت مخالف و خلاص
عجبني فكره الفيلم جدا امين الشرطة بطل الفيلم و عجبتي قصته و عجبني تمثيل خالد صالح و تقمصه الدور ببراعة
الفيلم ماشي زي الفل لغايه اخر ربع ساعه
مش عارف ليه حسيت انه قلب فيلم عربي
الفيلم اتغير تماما الاول اقتحام وكيل النيابه القسم و تدمير الحواجز و اقتحام القسم بالقوه
هل ده ينفع يحصل في مصر ؟؟؟؟؟
نزل فتش الزنازين عادي سلطه التفتيش من حقه و مرافق ليه المأمور و الظابط
مش الطبيعي و هو خارج يوصلوه للباب و يودعوه
لأ ده طلع قعد في اوضه لوحده من الاسم و طلعلة الفراش اللي مش قادر يتحرك هوا وراه و اعترف له فين الظابط و المأمور سابوه لوحده
بدون مقدمات اندلعت الثوره ضد امين الشرطه حاتم بالتزامن مع اقتحام وكيل النيابة
مش عارف ايه سبب المظاهره المفاجئة دي رغم ان الاغتصاب كان حصل حسب تزامن الفيلم تقريبا من يجي اسبوع على الاقل
فجأه افتكر كل واحد مشاكل الامين و اتظاهر لما ده جوه
لأ و مظاهره غريبه و بتخترق الامن بسلاسة
رغم ان الشعب المصري خناقه تلمهم و رصاصه تفرقهم
تسلسل لاحداث الاخيره غير منطقي و ده اللي خلاني مشاركش في التصفيق اللي قام به المتفرجون بعد نهاية الفيلم حسيت ان الفيلم طبخه حلوه و عليها شويه رمل مش ملح بس

*********************************************************

اكمل الكوكتيل خبر قريته النهاردة في مصراوي نقلا عن رويترز ان عدد مرضى الايدز في مصر وصل ل 5000
رقم كبير جدو المصيبه الاكبر ان المسجل لدى وزاره الصحه ما يقترب من 2000
يعني 3000مريض من الايدز اما انهم يخفون ذلك او يحاولون نشر المرض و اتذكر خبر قرأته في صفحه الحوادث منذ فتره عن القبض عن فتاتين يحترفان البغاء من اجل نشر مرض الايدز المصابتان به المشكله كام مريض من ال 3000 المش مسجلين دول بيعمل كده ؟؟؟
جزء اخر في الخبر ان المصاب الواحد يكلف الدوله علاج 1000 دولار شهريا يعني 5000000 دولار شهريا يعني 60000000 دولار سنويا يعني ما يقرب من 350 مليون جنيه سنويا كل ده علاج من مرض واحد
الايدز لا ينتقل الا بثلالث طرق ممارسيه الجنس او الدم او الحامل للمولود و للأسف النسبة الاكبر هي الاولى طبعا ميصحش كل الفلوس دي تضيع و احنا دوله اسلامية
و حتى لو مش اسلامية فلوس كتير اوي لعلاج مرض يمكن التغلب عليه بسهوله و العلاج بالمناسبه لا يفيد في علاج الايدز و انما يبقي الوضع على ماهو عليه و يبطئ تطورات المرض
*************************************
خبر تاني في نفس الصفحه بتاعه مصراوي الخبر ده اللي هنقل عنوانه
يذبح زوجته لفشله في فض غشاء بكارتها ليلة الزفاف
و الخبر ماشاء الله في الاخبار الاعلى قرائة
و تخش على التفاصيل بقى قمه المهزله
انه حاول الفض لما ما انفضش دبحها
و الخبر منوه ان دي الحادثه التانيه
و سبقها حادثه بنفس الطريقة و الراجل برضه شك في سوء سلوك اللي اتجوزها و راح قاتلها و جه الطب الشرعي اثبت ان المتوفاه عزراء
دي اه الطب الشسرعي لسه مأعلنش
بس ده بيطرح سؤال
هل لازم تعليم الثقافه الجنسيه في مدارستنا ما دام الاهالي يتقاعصوا عن اداء هذا الواجب
كل الفكره اللي في دماغه ان لازم اول ما يخش الاوضه مع مراته مسيطر عليه غشاء البكاره و التـأكد من وجوده و لا يعلم شئ عن وجود انواع من هذا الغشاء منها المطاطي الذي يمكن الا يفض الا بزياره طبيب
و من الممكن ان تحاول و تقسم الضحيه لزوجها و هي صادقه انه اول رجل في حياتها بس لا حياه لمن تناتدي هو سانن السكينه و خلاص
*************************
بعد التصوير اللي صورته لمترو الانفاق في اللي طلب مني ان متكونش فضيحه مصر كده على الyoutube بصراحه انا عملت كده بعد ما فاض بيا الكيل في الزحام ناس طلبت مني انقل اللي في محطه رمسيس بصراحه محطه رمسيس امنيا صعبه و زحمه جدا لدرجه صعوبه التصوبير و بالمناسبه كنت فيها من اسبوع لقيت بنوته ماسكه كاميرا ديجيتال و انا في المترو اتجااه حلوان عاوز اروح المرج فخرجت قطعت تزكره تانيه و نزلت الف من شوبرا بدل ما اطلع سلالم و انزل لقيت واحده بتصور الناس في الزحمه و هي طالعه على السلالم الكهرباء بصيت ليبها جامد راحت لافه و ادورت كبرت في دماغي اعرف بتعمل ايه لقيتها طلعت جه مترو المرج و الناسي بتتخانق على الباب قعدت تصور بس قفلت الفلاش لعدم لفت الانتباه و بعدين ادورت بسرعه و نزلت
قلت يا سلام علمناهم الشحاته سبقونا على الابواب
مش عارف ايه سر تتبع الكاميرات الديجيتال ليا
النهارده و انا بصلي الضهر في الجامع و انا خارج لقيت واحد واقف قدام شباك الجامع بيصور الناس اللي بتصلي السنن او بتصلي متأخره كنت عاوز اسأله انت بتعمل ايه
******************************

متهيألي طولت عليكم هختم بفايل صغير
ممكن تعتبروه جنان
تهييس
تخاريف
جه بسبب ارتفاع ضغط الدم عندب
الفايل ده بكل بساطه بعد تجول في العتبه و الاموسكي ساعه الا ربع فقدت اعصابي من الصوت قلت اسجل السيمفونيه دي
عشان تسمعوها

http://www.mediafire.com/?7vn3mwvzbut

اخر شئ لازم انتهز البوست ده و اقول للكل
كل سنه و انتو طيبين

حكايه كل يوم

من سنه



http://www.youtube.com/watch?v=vOQnaMZ8CxQ


قبل دخول المترو



بعد انصراف المترو
تفتكرو الناس مركبتش ليه ؟؟؟؟


السنه دي


http://www.youtube.com/watch?v=CyW010NTxQs

في حاله عدم عمل الفيديو اضغط على اللينك بأسفله


يا ترى محتاجين تعليق؟؟؟؟؟؟

مفيش كلام جديد

مفيش كلام جديد اقوله دي مقدمة لابد منها عشان محدش يرهق نفسه في كلام و يدعي عليا في الاخر

البوست ده مجرد تقفيل مكان حسيت ان بقالي كتير مبكتبش فقلت اكتب و خلاص بس اكتب عن ايه فحتى هذه اللحظه انا مش عارف الظاهر كده ان عشان الفتره اللي فاتت خرجت كتير مع اصحابي على غير العاده ده خلى في متنفس ليا غير الكتابه فبقى مفيش حاجه اطلعها في كتابتي بس برضه بالغصب هكتب عن اي حاجه عن ايه معرفش .

قريت من كام يوم في جريده 24 ساعه ( بجيبها بس عشان ببلاش اما انا مقاطع كل الجرايد من سنين اهي حتى تنفع في قلي البطاطس ) ان الحكومه ستخصص مش فاكر الرقم بالظبط 3 و لا 30 بس اعتقد 30 مليار جنيه للأهتمام بالصرف الصحي و بعديها بيومين سمعت ضوضاء في الشارع بالليل .

خرجت من البلكونه لقيت عربيه نقل بتفضي زفت على ارضيه الشارع تمهيدا انه يتسفلت قلت اخيرا عشت لليوم التاريخي ده و افتكرت يوم تاريخي كان على نفس المستوى ده من حوالي 15 سنه .

فجأه بدون اي مقدمات أعلن ان السيده الفاضله حرم رئيس الجمهوريه السيده سوزان مبارك هتزور مدرسه تعتبر في شارعي المتواضع بس الشارع مش متسفلت و لا في ارصفه الشارع يعني تخرج من باب العماره تلاقي الرمل على طول في الشارع شارع رملي .

طبعا مينفعش اسطول السيارات المرسيدس يغرز في الرمل لازم الحي يفتح الخزائن و يبدأ مرحله جديده من تعمير الشارع و المناطق المحيطه من المدرسه المناطق التي لن يمشي بها الموكب و لكن هناك احتمال و لو ضئيل ان يمشي فيه .

بدأت في الشارع على مدى اسبوعين حمله شديده القوه جزئ بيسفلتو فيه و جزء بيمهدوه و جزئ بيحطو فيه رصيف و جزي بيتملي جوه الرصيف رمل و زلط تمهيدا لأسفلت فوق الرصيف و جزء اخر من الرصيف بيسفلتوه بعد ما ملوه ( ملحوظه هامه جدا مكانتش لسه طلعت موضه البلاط في الرصيف ) و بدأ في الاجزاء القريبه من المدرسة زراعه الاشجار .

كان كل شئ ماشي كويس و الشارع اتسفلت و الرصيف اتعمل و جزء كبير من الرصيف اتسفلت و بدون اي مقدمات اتلغت الزياره فجأه و بدون مقدمات اتشالت المعدات و بدون مقدمات شالو الشجر و بدون مقدمات بقى نص الرصيف مسفلت و نصه رمل بس لازم الاعتراف اننا طلعنا بمكسب الشارع بقى اسفلت و ده اكيد مكسب كبير .

ذكريات عدت عليا و انا بشوف المشهد بيتكرر بعد 15 سنه او اكثر قليلا بعد فتره شاف الاسفلت فيها الويل و لغايه دلوقتي فاكر اول حادثه للأسفلت ده تقريبا كان حرق كابل كهرباء خلاهم يحفروا الاسفلت في نفس سنه السفلته تقريبا و طبعا بعد ما خلصوا ردموا بس و توالت الحوادث و انتشرت المطبات الطبيعيه نتيجه اعمال الحفر مره كابل مره ماسوره ميه .

بس اخيرا هيسفلتو الشارع تاني ده يوم تاريخي لازم يتسجل ......

بعد ساعتين لقيتهم مشيوا سفلتو ربع الشارع و سفلتو النص و سابو الاحرف من الاخر رقعوا الشارع

بعد تفكير عميق و خصوصا في النهار اكتشفت انهم سفلتو من اول البلاعي لأخر الشارع

طبعا ناس هتسألني ايه علاقه الصرف الصحي في اول البوست بسفلته الشارع بصراحه انا عرفت ليه عملوا كده لأن البلاعه دي دائمه الطفح و طبعا الشارع مايل ناجيه الشارع الرئيسي و الميه بتخلي منظر الشارع الرئيسي مش ولابد فقالو يعلو الجزء من بعد البلاعه و يسفلتوه و الاجناب المش مسفلته عملوا بلاعه مطر فعرفت فعلا احنا بنفكر ازاي

كل الناس بتحل المشكله في اي دوله احنا بنفكر ازاي نخفي المشكله رحم الله ال 30 مليار في موازنه العام الجديد

حته على الماشي

البلاعه مطفحتش من ساعه ما عملو كده من 3 اسابيع و كأنها تعاندهم عشان التأليف الغريب اللي عملوه .

مناظيييييير

مليش نفس أكتب جديد في أعلى حالات الأكتئاب و القرف و الخنقة و القلق من الاخر عامل كوكتيل جامد جدا فممكن يأثر على اي حاجه اكتبها فقلت اروح للقديم تقريبا كنت كاتب الكلام اللي جاي ده اللي ملوش معنى من سنتين بس كده عشان اكتئابي ميتنقلش ليكم و ممكن ده يكون فرصه للمقارنه بين اسلوب كتابتي دلوقتي و زمان ايه .

ماشي انا و صاحبي و انا قرفان في حته ضلمه كحل و منتظرين اي حد يقلبنا في السكه لقيت مش عماره لأ دور واحد من غير سقف يعني ممكن نقول مشروع بيت من دور واحد و فشل
قلت لصاحبي ما تيجي نشتري الارض دي
قالي فكره و نعمل عليها مشروع ....
قاطعته و قلت بدل ما تفكر في مشروع انا عندي منظور تاني للأرض دي
قال و ايه منظورك للأرض دي
قلت عاوز اهدها و احط عليها يافطه الارض ليست للبيع او للأيجار او للبناء و اسيب الناس ترمي فيها زباله لغايه ما تبقى خرابه
قال و الله طب و انت هتستفيد ايه
قلت اصل انا عندي منظور تاني خالص الزباله هتكتر هروح جايب عربيه نقل و شايل الزباله
قاطعني و هتبعها ؟
قلت انت منظورك ضيق اوي انا منظوري اوسع من كده انا هاخد الزباله ارميها في خرابه تانيه عشان انضف خرابتي
قال و الله طب ايه لازمتها
قلت مش ممكن في وسط الزباله واحد ابن حلال يرمي زكيبه مليانه فلوس ساعتها تتوقع هعمل ايه في الفلوس دي
قال معرفش
قلت ايه رأيك انت اعمل ايه بالفلوس
قال انا لو لقيت فلوس هعمل مشروع و لسه هيكمل قاطعته
قلت لأ انت منظورك ضيق اوي انا اصلا هعرف منين ان في فلوس انا مش قلت لك اني هاخد الزباله هرميها في خرابه تانيه من غير فرز ساعتها تبقى زكيبه الفلوس من نصيب صاحب الخرابه التانيه و انا اصلا كل ما أرمي حموله عربيه هدعي ان لو فيها فلوس و حد خدها ميتهناش بيها
بصلي بصه غريبه و قالي كل ده دعاء
قالي طب ايه رأيك تحت الخرابه نعمل سرداب نتاوى فيه
قلت لأ انت منظورك ضيق لأن ريحه الخرابه مش هنستحملها

اكيد مدام وصلت للجمله دي انك دلوقتي بتلعن في كل مناظير الدنيا بس اعذرني واحد مكتئب و بيطلع قرفه و كمان مفروض تشكروني لأني مكملتش باقي المناظير في اللي حصل بعد كده
حد عنده منظور تاني

كلام و خلاص

لما فتحت المدونه سميتها تخاريف لأني كنت انوي اني اكتب فيها بس كلام خفيف حاجات يوميه ابعد عن المواضيع الجاده السياسية الدينيه قدر الأمكان على اساس ان في السياسة و الدين أفعل ما تقول اولا و طبقه في حياتك ثم أكتبه و كانت دي وجهه نظري اني مكتبش حرف في الكلام ده الا ما اكون قادر على تفيذه و كنت بشوف ناس كتير جدا بتكتب كلام انا متأكد انها لا تنفذ منه حرفا و لكن للشهره فقط ايضا هناك الكثير اللي بيكتب و ينفذ كالأستاذه نواره مثلا و طبعا غيرها كتييير
البوست او الميل ده هخرج فيه قليلا عن اللي كنت ناوي استمر في كتابته في مدونتي .

في مدونه شهروزه كتب ثلاث مواضيع متتاليه و هذه هي لينكات المواضيع لمن أراد ان يأخذ فكره عن الكلام اللي هكتب ردي عليه .
http://shahzad12.blogspot.com/2007/10/blog-post_11.html
http://shahzad12.blogspot.com/2007/10/blog-post_18.html
http://shahzad12.blogspot.com/2007/10/blog-post_26.html

و للأمانه انا لم اقرأ الا اول بوستين لأن النقاش وصل لحد صعب اكمل فيه و كنت أفكر اني اطنش فيالرد خصوصا ان جمهور مدونتي مازال قليلا و مازلت احبوا في عالم التديون و ايضا ان مش مشلكه اني اتشتم من حد بسبب أختلاف في الرأي و لكن النهارده و انا في الشغل بسمع قران سمعت الايه دي من سورة الأعراف قال الله تعالى (وَإِذْ قَالَتْ أُمَّةٌ مِنْهُمْ لِمَ تَعِظُونَ قَوْمًا اللَّهُ مُهْلِكُهُمْ أَوْ مُعَذِّبُهُمْ عَذَابًا شَدِيدًا قَالُوا مَعْذِرَةً إِلَى رَبِّكُمْ وَلَعَلَّهُمْ يَتَّقُونَ (164) فَلَمَّا نَسُوا مَا ذُكِّرُوا بِهِ أَنْجَيْنَا الَّذِينَ يَنْهَوْنَ عَنْ السُّوءِ وَأَخَذْنَا الَّذِينَ ظَلَمُوا بِعَذَابٍ بَئِيسٍ بِمَا كَانُوا يَفْسُقُونَ (165) الأعراف/164-165
فكرت و قلت ما دامت لا حيله لي الا الكلام ليه متكلمش ؟؟؟؟
قبل ما ارد على الكلام لازم تفكر الاول أيه الغرض من الكلام ده لأن الرد الكلام يحتمل اكثر من غرض سألتها ساعتها مردتش أكتر من كده و انا من وجهه نظري المتواضعه ان الغرض لن يخرج عن احتمالين :-

1- قول ان السنه خاطئه و ابعد عن البخاري و مسلم و ملكش دعوه الا بالقران .
2- الرسول لم يكن الأنسان المعصوم و ان له أخطاء .

هبدأ ارد على الاحتمالين دول و قبل الرد انا مش عالم في علم الاحاديث المتشعب و لكنني ارد بعلمي القليل جدا و الذي شجعني في الرد ان الذي كتب الثلاث مواضيع ليس بعالم

1- في حاله ان الغرض القول ان السنه خاطئه و ابعد عن البخاري و مسلم و ملكش دعوه الا بالقران .

قال الله تعالى ( قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ)ال عمران 31 لو الله سبحانه و تعالى يريد ان يتبع المسلمون القران اليس من الاولى ان يقول فأتبعوا القران و لكن الله قال فأتبعوا الرسول و محددش نتبعه في ايه او منتبعوش في ايه
لأ قال نتبعه في اي شئ اي قول و اي فعل لأنه لاينطق عن الهوى .
في بدايه النقاش قالت شهروزه ان السنه بها الاخطاء و كلام كثير ان الأسلام قران فقط فسألت سؤال
هات من القرأن ما يوضح لك كيف تصلي ؟؟؟
كم عدد الصلوات في اليوم ؟؟؟
كم ركعه في كل صلاه ؟؟؟؟
مقدار زكاه المال ؟؟؟؟
مقدار الزكاه عموما ؟؟؟؟
مقدار زكاه الفطر ؟؟؟
و قس على هذا الأف الاسئله فين كل ده في القران ؟؟
القران به تعاليم و اوامر و لكن كيف تؤدي الاوامر الاجابه في السنه
في البوست التالي لشهروزه قالت فيما معنى الكلام ان المرجع الرئيسي في الأسلام القران و السنه فيما يتعلق بالعبادات فقط .
بالله عليكم ده كلام ينفع اعقله
انا راجل جاهل دينيا بس ده كلام يخش العقل ؟؟؟؟
الجمله دي معناها ( السنه غلطت و القران صح بس الكلام اللي مش موجود في القران اخده من السنه ) يعني اعترف بأن الحاجه غلط و اخد منها مش حاجه عاديه لأ اخد منها عبادات رئيسيه و كمان بناء على ايه اعتبرت ان العبادات الرئيسيه دي صح و بناء على ايه اعتبرت ان الباقي غلط ؟؟؟؟
انا مش باحث في الاحاديث بس لماذا جمع البخاري و مسلم الاحاديث و ليه تعب في جمعهم و ليه كان بيسافر بلاد عشان يجيب حديث لمجرد ان رواته 3 عن الرسول مش 4 ......اكيد مش الفلوس لأن المبيعات بتاعه صحيح البخاري منبهوش منها نكله فأكيد كان يقصد وجه الله بهذا و ليس من المنطقي ان تسب رجلا كل ذنبه ان سعادتك لم تستسيغي 20 او 30 حديث من اجمالي 8000 حديث جمعهم .
في درجه صحه الاحاديث هناك العديد من الصفات المعروفون لدى العامه و انا منهم الصحيح و الضعيف و الحسن و هناك مراجع لعلماء السنه في هذه و هناك مرجع اعتقد ان اسمه الرجال العظماء او اسم مشابه اعتذر ان كنت أخطأت في الأسم الكتاب بكل بساطه عباره عن سيره ذاتيه لأي راوي للأحاديث بمعنى ان الحديث الفلاني رواه البخاري عن كذا عن كذا حتى رسول الله صلى الله عليه وسلم فكل هؤلاء الرواه كسيره حياتهم موجوده في صحيح البخاري لماذا .؟؟؟
لأن اي شخص منهم يحدث طوال حياته اي موقف يحتمل كذبه و لو ضئيل جدا يضعف الحديث الذي رواه و هذا يختلف عن الروايه للتاريخ
بمعنى انا لو روحت حادثه و سألت الموجودين حصل ايه كل واحد ممكن يروي روايه و الأحتمال الكبير ان منهم ناس كدبت بس انت هتاخد بكلامهم كلهم بعكس الحديث اللي اي شخص يروي حديث يجب ان تكون سيرته ناصعه البياض و هنا يظهر دور علماء الحديث
انت شخص بتقول ازاي اؤمن بالسنه و فيها احاديث مغلوطه امال ليه العالم ده بيضيع من عمره عشرات السنين في دراسه السنه عشان واحد كل اللي عمله انه قرا الصحيح و يجي يفتي هو ؟؟؟ مكانش حد غلب .

2- الاحتمال الثاني الرسول لم يكن الأنسان المعصوم و ان له أخطاء .

و كان ده محور الخلاف بيني و بين شهروزه لأن من الطبيعي جدا لو ان الشخص كاتب المقال غير مسلم سيكون هذا غرضه و كنت سأترككم مع مقتطفات من ردودها لتوضيح وجهه نظري لولا انها قامت بمسح التعليقات كان هناك تعليق تتحدى فيه ان يأتي أحد بخطأ في مزامير لا اتذكر اسمها في العهد القديم .
في جميع تعليقاتها تقول الرسول الكريم و لا تصلي على الرسول ابدا و هناك خطأئين في كلمه الرسول الكريم الاول طبعا عدم الصلاه على الرسول برغم ان الصلاه على الرسول امر من القران و ليس من السنه فقط و عندما اخبرتها اني اتوقع انها مسيحيه بسبب الرد الاول و التي ذكرت فيه العهد القديم و عدمم الصلاه على الرسول و مخالفتها لأمر القران المباشر اتهمتني بالغباء لأني اختزلت الأسلام في الصلاه على الرسول برغم اني لم اختزل الأسلام في الصلاه على الرسول الخطأ الأخر في كلمه الرسول الكريم ان الكريم اسم من اسماء الله الحسنى و اي مسلم يعلم جيدا ان اسماء الله الحسنى اذا اردت ان تسميها لشخص يجب ان تسبقها بكلمه عبد
و طبعا اول ما قلت الكلمتين دول اتهمتني اني كفرتها و قعدت تشتم فيا و لم تحاول مره واحده ان تنفي الاتهام بالصلاه على الرسول او توضيح لماذا تتحدى احد ان يأتي بخطأ في شئ من العهد القديم .

ملحوظه هامه جدا كنت انتوي نقل العديد من التعليقات لها و لكن للأسف قامت بحذف التعليقات بالكامل .

الاسلام دين شامل نزل يوضح احكام كل شئ حتى الجماع بين الرجل و كيفيه الجماع من الحائض و لا ارى عيبا في الكثير من الاحاديث و خصوصا بحسابها كنسبه من اكمالي الاحاديث في الكتب السته التي قد تصل الى 30000 حديث و لأن الاسلام دين شامل كل شئ في حياتنا فمن الطبيعي ان تجد اقل من 30 حديث بهم كلام عن الجماع و الحيض لتعليم المسلمين و لك ان تصعق اذا علمت انها تنادي بعدم الاعتراف بالأحاديث لأن 0.01 % من الاحاديث من وجهه نظرها لا تصح ان انسى 30000 حديث عن الرسول من اجل 30 و الثلاثين لا اعلم اسنادهم و من اجل حديث اخبرتني به و لم تقل لي اي اجده و من رواه و اسناده في احدى الردود قالت لي ان البخاري قال في حديث ان الرسول كان سينتحر و لم تقل من الذي رواه عنه البخاري و لم تقل من رواه عنه البخاري و ندى صحته رغم اني الححت في المصدر و هي اكدت انها تملك صحيح البخاري و مسلم و لم تنقل الاحاديث من المواقع المسيحيه المنتشره .
حتى لا اتحدث في اكثر من موضوع كان من ضمن ما لفت انتباهي في مدونتها صوره مكتوب فوقها اوقفوا تلك المذبحه ختان الاناث
لن ارد من السنه نخلي الرد ده لأهل العلم ردي هيكون عباره عن لينكات لأبحاث منشوره في البي بي سي الشبكه اللي معروفه بمصداقاتها تتحدث اكثر من مقاله عن ابحاث قامت بها اكثر من دوله و اكثر من جهه منها منظمه الصحه العالميه عن فوائد الختان الذي ثبت انه يقلل من فرص الاصابه بسرطان عنق الرحم و فيرس نقص المناعه الكتسبه ( الأيدز ) لينك المقال .
http://news.bbc.co.uk/hi/arabic/sci_tech/newsid_6732000/6732419.stm

هيكون الرد الجاهز حالات النزيف و الوفاه الخ مش هقولك الا مثلا حاله الفنانه سعاد نصر دخلت تعمل عمليه شفط دهون ماتت و كثير يخشوا يعملوا عمليات عاديه يموتوا سواء بينج زياده خطأ تخديري او خطأ جراحي و اي عمليه مهما كانت تفاهتها فيها نسبه خطأ و لو قست حالات النزيف و الوفاه في الختان ممكن تلاقيها اقل كمان من النسب العاديه في العمليات الاخرى و لكن التضخيم بس لأنهم عاوزين يمنعوا الختان و خلاص
في مدونه اخرى لن ابعث بلكنها و لكني وصلت اليها من التعليقات المكتوبه على مقالات شهروزه فأول ما دخلت لقيت فيديو مكتوب عليه منقبه بالأسكوتش فيديو لمنقبه تشرب الخمر و البوست اللي تحتيه كلام عن تربيه الدقن في دماغي قلت انتوا بقى مستلميبن الغلطات و كأن النقاب هو لا يلبسه الا مسلم او مؤمن و كأني لا استطيع ان انزل الشارع فأشتري لنفسي نقاب و البسه او اي اجنبي او اي مسيحي او يهودي يستطيع ذلك او حتى العاهرات التي يلبسونه كستار لعملهم .
بصراحه كان ردي قصاصه من النبأ للقس برسوم عشان اقول بس ان زي ما ممكن اي حد يلبس نقاب و يعمل اي شئ ممكن اي شخص يلبس قس و يعمل ما يشاء
انا حبيت اكتب كل اللي في دماغي هنا و اعتذر بشده عن الطول و سأقوم بأرسال لينك الموضوع لشهروزه حتى لا يصبح هذا الموضوع غيبه
مش عارف كنت اتوقع اني استمر في التدوين ل 100 بوست مثلا او الى ما لا نهايه بس مش عارف ليه حاسس اني ابتديت اتخنق اضايق ازهق لأسباب مش منها شهروزه بس انا موجود حتى اشعار اخر مني بس مش عارف ليه حاسس اني قربت ازهق .

مش عارف ليه انا مش راضي على البوست ده بس كتبته و خلاص

تحديث -***********************************

مقتطفات من ردود شهروزه أهداء لنواره نجم بخصوص الرسول الكريم

و عدم الصلاه الل قالتلي نواره انها بتصلي

)كل سنة وانت طيب يا رامزلازم تعرف زى ما انت حسيت باستفزاز وأنا كمان باقرا الكلام دةالمنسوب لأحاديث الرسولحسيت باستفزاز أكبر منهو على من يهاجمون سفر نشيد الانشاد فى العهد القديم أن يلتزموا بالطوب فى جيوبهمفحسب رواة الحديثاللى بيته من ازاز(

أى عقل بسيط وفطرى ينظر للكلام ما نظرت انا وانت وغيرنا ممن لستنكر نسب تلك الأقوال للرسول الكريم

يبدو أنك من ضمن قلائل وصل لهم ما أردت قولهوالربط اللى حاولت أربطه بين فكرة الغرب ورسومه عن الرسول الكريموبين ما منحهم تلك الفكرة

اهانتك موجهة لمن كتبها ونسبها للرسول الكريملو بتفهمى عربى تقريبا والله

أعلمحتقرى تعقيبى الرافض لها ولنسبها للرسول الكريم جملة وتفصيلا

أعتقد كفايه كده بالنسبه لقول الرسول الكريم و عندك مئات التعليقات اقريها

أخيرا تعقيب سريع على أخر بوست ليها الأسلام ليس بالحجاب و لا بالنقاب و لا باللحيه تدخل الجنه الأسلام تعاليم و أوامر بالنسبه للصلاه على النبي أمر من القراءان صريح (ان الله و لائكته يصلون على النبي يا أيها الذين امنو صلو عليه و سلموا تسليما )

الحجاب ايته معروفه من القران و أمر مباشر برده في صوه بدأها الله تعالى بقوله سوره انزلناها و فرضناها للتأكيد على أهميه كل الاحكام في هذه الصوره اللحيه العلماء قالو انها واجب و من السنه

ليس لأني افعل هذا اصبح مسلم الأسلام فعل هذا و غيره من التعاليم و ليس من المعقول ان اقول الأسلام ليس الصلاه فقط هو فعلا مش الصلاه بس الاسلام هو مزج من اركان و فروض و أوامر لو سقط اي منهم ميبقاش الواحد مسلم و ميقتصرش على حاجه واحده منهم دي أخر مداخله في الموضوع بإذن الله و أكمل في الردود فقط

شخبط شخابيط لخبط لخابيط

طبعا البوست ده اكيد مش هنقد او اتكلم عن الاغنيه الرائعه للفنانه الشامله نانسي عجرم لأني بصراحة مسمعتهاش و لا ناوي اسمعها اصلي بعيد عنكم غلاوي حبتين اصل نانسي دي من دوري يعني انا اكبر منها بمفيش سنه و لا اتنين و البت ماشاء الله بتلعب بالفلوس و احنا نفحت و نردم في نفسنا سنين و سنين و انت و حظك يا تشتغل او متشتغلش اما سلعتها هي رائجه في سوق ميلودي على الاخر مش مهم عشان منرغيش فكلام ملوش دعوه بالبوست ( ده على اساس مثلا ان البوست هيكون ليه علاقه بعضه ) و البوست طويل خلقه العنوان عشان انا مش هتكلم في حاجه محدده اصلي كنت عمال افكر اكتب ده و لا ده و لا ده و في الاخر قلت ليه مكتبش كله و نفذت على طول ابدأ كلامي بأيه بأيه نظرا لأني بموت في الاختراع المسمى بالميكروباص هبدأ البوست بكلام عن ميكروباص .

درس خصوصي

كنت سعيد الحظ من كام يوم و حضرت بدايه دوره تأهيل تتخرج بعدها لتصبح تباع ميكروباص اد الدنيا كانت البدايه زحام شديد في رمسيس على الميكروباصات فروحت بعد انتظار نص ساعه ربنا الهمني اروح الناحيه التانيه اركب و الميكروباص بيفضي الناس و بعد نص كمان مش لاقي ميكروباص الحته اللي انا رايحها و الميكروباص بيفضي قلت ليه مسكن ؟؟؟ الراجل فكر كده و دورها في دماغه و قالي ماشي يلا مسكن اركب يلا يا ولا نادي قول جسر السويس الف مسكن مسكن ( لسه الواد متاخد )يلا نادي راح اشتغل قاله استنى لما الف الاول و بعدين نادي خد بالك الاجره جنيه فاهم ؟؟؟ يومئ برأسه
دخلنا على طوفان البشر اللي كنت سييبته الناحيه التانيه الواد اشتغل الف مسكن مسكن واحد سأله مساكن طبعا الواد لسه جاي من بلدهم و اهي بالنسبه ليه مش هتفرق مسكن من مساكن ده هو حرف الالف قال اه هب فيه السواق قلت ليك مسكن بس مش مساكن ( معلومه ببلاش مني يلا اهو اذكي عن صحتي مسكن يعني موقف الألف مسكن - مساكن يعني مساكن عين شمس ) قاله انزل و نادي بس خد بالك من الامين لو خدك هسيبك و امشي معلومه نسيت اقولها اللي بيتعلم ده حوالي 13 سنه تقريبا الواد اتفزع كده و ابتسم ابتسامه صفراء
اتملى الميكروباص لأخر نفس و طلع سأله تممت على عربيتك و لميت الاجره قاله اه خد اهي كام واحد في العربيه ؟؟؟ 14 ماشي 14 جنيه حلو و احنا داخلين على العباسيه واحد قاله بعد الاشاره معاك
السواق بدأ يكمل الدرس الحته دي اسمها العباسية برده الاجره من عندها جنيه برده نزل الراجل و طلع مكانه بنتين قعدو على رجل بعض و مشينا و احنا ماشيين واحد بصوت هين قال كبري القبه معاك راح التباع تحت التمرين ردد عشان يوصل للسواق السواق قال لأ انا عاوز صوتك يجلجل في العربيه ( طبعا لازم يعمل دماغ للسواق ) خد بالك الكوبري اللي قدامنا ده اسمه كوبري القبه تحت الكوبري ده بقى الاجره 75 قرش فاهم ؟؟؟ يومئ التباع برأسه نزل واحد في كوبري القبه السواق جري قال هات واحد مكانه ( ميعرفش ان في بنت قاعده على حجر واحده ) الراجل نزل طبعا البنت قعدت مكانه طلعت ست كبيره قالو الناس للسواق مفيش مكان .... التباع بيبص ليه بأستغراب قاله متبصليش اتصرف على طول قاعدها مكانك و اقف خليك حرك كده راح وقف و الميكورباص طلع بعد شويه اثبت التباع انه بيتعلم كل شويه حاجه بعد ما نزل كام واحد و كان في الميكمروباص مكان لواحد راح السواق قالوا هات الراجل ده التباع من نفسه جاب راجل تاني و قعده مكانه ووقف هوه ...

يا ترى بعد اسبوع هيبقى التباع ده شكله ايه ؟؟؟؟؟
و لا بعد شهر ؟؟؟؟
و هل ممكن الامين ياخده فعلا و يا ترى هياخده فين ؟؟؟؟؟؟
هياخده عشان يكسب ثواب فيه و يتعلم على نفقه الدوله و لا هياخده تحري و يرميه في زنزانه و يحط رجله على اول طريق الفساد ؟؟؟؟؟

الصره

منذ عام تقريبا بدأت تنزل عملتان جديدتان للتداول و هيب الجنيه المعدني الاشبه باليورو و النص جنيه المعدني و يومها بعد رساله في احدى المجموعات البريديه اتريق و اقول اتمنى من الصين انها تشوف حل عاجل للمشكله دي و تستبدل المحافظ اللي بتصدرهالنا بصرر و ابتكار انواع و ماركات للصرر حرصا على اراحه المواطن المصري البسيط و تسهيل شيل الاموال على الشعب المسكين اللي اصلا مبيشوفش الاموال عشان يشيلها .
بعد سنه من الاقتراح ده الحكومه سرقت اختراعي ايوه و الله سرقته دخلت البنك المركزي اغير فلوس قديمه و افك بعد دوشه فكه العيد خصوصا ان الفكه اللي جيبتها بالواسطه خلصت في العيد سألت في اول شباك قابلته فيه جنيهات و انصاص فكه قالت اه بس فضه
نعم ؟؟؟؟؟؟؟ انا هفك 200 او 300 يعني عاوز رزم اشيلها قالتلي لأ المتوافر فضه و في الشباك اللي جنبي و لو على الشيل هيدك كيس
رحت شباك تاني عشان الاول اغير الفلوس القديمه و حاولت اعمل نفسي معرفش و اقول مش ممكن تفكيلي قالت فيه فضه قلت ازاي فضه قالت لو انت شركه ممكن تعمل لنفسك حصه ( مسألتش ازاي هحاول اعرف في زيارات تانيه ) و بصراحه كانت متعونه دورت في الدرج لقت معهاش الا رزمتين انصاص على قد شغلها .
روحت شباك الفضه لقيت موظف قاعد و قدامه هرمين اكياس صغيره مقسمه بحيث كل كيس 50 جنيه الجنيهات 50 كوين * جنيه و الانصاص 100 كوين في نص عامله بالظبط زي الافلام التاريخه لما الشاعر من دول يهاتي في قصيده مدح زعيم القبيله يروح راميله صره يستزيده يرمي كمان رزمه يستذيده يديله الحصانه ( يديله الحصانه دي مقتبصه من نص كلمه لأحمد رجب )
روحت دخلت فيه جامد تديني اي كميه قال اه و كأنه مصدق ( في ايام الرزم كان مفيش حاجه اسمها اي كميه دي هو كبيرك 100 جنيه من كل فئه يعني لو جنيهات رزمه لو انصاص رزمتين لو اربع اربع رزم ) قلت هات 200 جنيهات و 150 انصاص راح رمالي زي زعيم القبيله بالظبط الاربع صرر جنيهات و 3 انصاص و بصيت على الهرم اللي اتكون قدامي قلت يا نهار مطين ده انا في اي باب امن في اي بنك هنور كده و الباب هيصرخ رميتهم في الشنطه و بالمناسبه كان احلى تمرين من اي جيم بعد 3 ساعات شيل وصلت رقبتي وجعاني من الوزن .
دخلت بالشنطه العجيبه دي بنك مصر حطيت الشنطه في جهاز الشنط و عديت انا من الباب انا مظمرتش بس بصيت على الجهاز بطرف نظري لقيته بينور نور احمر و لقيت واحد في اوضه جانبيه عمال يخبط للأمن على القزاز ( الراجل تقريبا زهل من اللي شافه في شاشه الجهاز ) راح الامن جالي قالي ممكن تفتح الشنطه فتحت و مع طلوع اول صره قال اه فلوس و كأنه عدى عليه كتير من العينه دي
و من هنا اكرر دعوتي على الحكومه لسرقه اقتراحي و اكرر دعوتي للصين انها تسارع بأنتاج اكبر كم من الصرر لحفظ النقود و الثواب لهم عند الله .

عاوز اشتغل

الصوره دي حقيقيه مش تركيب كنت فكرت اول الامر اني احذف الرقم من الصوره بس فكرت احذف رقم موجود في كل حته في الشوراع و ممكن جدا حد يحتاجه هل هو كاتب دي كحب للظهور و لا فعلا بيحب شغله للدرجه دي و يحب يسهر على راحه المواطن طبعا انا عجبني جدا الشخص ده لدرجه اني بستبعد اوي الاحتمال الاول اللي انا محطتوش الا بسبب اننا بقينا منتوقعش اي حاجه كويسه خصوصا من البوليس المصري .

سحابه العام و كل عام

انا مش مصور و لا غاوي تصوير كل المسئله اني كنت في سنترال الاوبرا في الدور ال 17 بصيت من الشباك عجبتني مصر من فوق فصورت اه الصوره ضبابيه اه مش باين ملامح كتير بس هي دي مصر و هي دي السحابه السوداء بتاعه كل سنه الصور ملتقطه قبل العيد بيومين و الزحمه دي ناتجه عن كده العتبه قبل العيد بيومين اكيد مصر كلها هناك و عشان تعرفو مصر اد ايه مختلفه من غير سحابه سودا انا ححطيت صوره صورتها من نفس المكان من يومين تقريبا عشان تعرفوا

الصوه دي لسطح الجزء المدور السفلي من السنترال

الصوره لبرج منك مصر الشهير

دي بقى لسطح جراج العتبه الشهير

و من بعيد تظهر القلعه و ركز عشان تقارن مع اخر صوره

اللي تحت دول كوكتيل اشي بياعين و اشي عربيات هتخش ترخص في المرور غير جمهور البشر

صوره مقربه لنفس المشهد

مسرح العرائس

محطه المترو و حديقه الازبكيه و الانشائات اللي معرفش بتاعه ايه

و طبعا جمهور البشر

الجراج البعيد التاني بتاع العتبه

انا منضفتش العدسه على فكره انا بوريكم بس التلوث كان عامل ازاي

و للأسف مخدش بالي اني كنت بصور ابيض و اسود بس حصل خير

المهم في سؤال اتمنى اجابته من اي حد يرد هل من لافضل اني كنت اقسم البوست ده على 3 و لا كده أفضل؟؟؟

تااااااااااااااااااااااااااااااااااااااااااج

بدون مقدمات ممله تاج مررهولي تشي و أعتزر ليه على التأخير في الرد لأنشغالي الكام يوم اللي فاتوا دول المهم نخش في التاج

امتى قلت لنفسك يا ارض انشقى وابلعينى ؟؟

انا كل يوم بقولها اوقات كتير جدا بس في لاموقف من عده سنوات ده اكتر موقف مكنتش قادر اواجه حد في الشارع و لولا ان في صديق اتكلم معايا فيه امبارح كنوع من ذكريات الماضي ما تذكرته و احمد الله على نعمه التناسي او النسيان ايه بقى الموقف اعفوني من الاجابه عليه بس كمجمل خناقه بين اتنين على حاجه و لما اتطورت اوي و الموضوع وصل للأهل و هيتفضحوا راحوا قالو يدخلوا واسطه في الموضوع بحيث ان الغلطه تبقى خفيفه عليهم اوي بدل ما يتفضحوا و كنت انا الشخص المختار و كان منظري وحش قدام ناس كتير اوي خصوصا قدام اهاليهم هما الاتنين ما علينا انا سايب الموضوع عايم عشان انا مش حابب احكيه

مين هو مثلك الاعلى ؟؟

هو لازم يكون ليا مثل اعلى ؟؟؟؟
ليه اقتل الطموح بحد هو المثل الاعلى و ممكن اكون انا مثل اعلى في قال الرسول صلى الله عليه وسلم بس الرسول انا لا اعتبره بشر لأن كلامه كله وحي و ما ينطق عن الهوى ان هوا الا وحي يوحى

هل انت راضي عن نفسك و عن حياتك و عن شغلك ( أو دراستك )؟؟

مش راضي عن نفسي
و لا حياتي مش عارف انا صح و لا لأ
و لا شغلي مش عارف هوصل لأيه فيه
و لا دراستي لأني مش حاسس ان ليها هدف
و بناء على كل ما سبق انا مش سعيد لأن السعاده زي ما قلت في التاج السابق في الرضا

ايه هو احسن مسلسل كرتونى بتحبه ؟؟

توم و جيري - بطوط - و في فيلم بحبه شركه المرعبين المحدوده

ايه هو احلى خبر سمعته وايه أسوء خبر ؟؟

احلى خبر ياه هو مفيش اخبار حلوه و لا ايه بصراحه هسيبه للأخر لأن ممكن اقول مواقف كويسه اما خبر مش لاقي
اسؤ خبر وفاه صديق لي بعد والده بأسبوعين
عوده بعد نهايه التاج الخبر الكويس استقاله وزاره دكتور عاطف ( وممكن يكون ساعتها الخبر الكويس قدوم دكتور احمد نظيف او عدم استقاله أعوذ بالله من الشيطان الرجيم "اصل اسمه بيوقع العمارات ")

بتحب السفر؟؟ ليه ؟؟

لأ خالص اكتر حته بحبها البيت عشان في كومبيوتر و نت و انا مبحبش اقعد في نت كافيه

أيه أكبر مشكلة قابلتك فى حياتك وازاى اتصرفت فيها ؟؟

لا احب تذكرها ساعتين في زنزانه ربنا يسامح اللي كان السبب و خرجت بدون اي تلفون او اي شئ هي كانت قرصه ودن بس

يا ترى أحسن صدفه حصلت في حياتك ؟؟

مفيش شئ صدف فحتى لو هي بالنسبه ليا صدفه فهي بتكون تخطيط الهي و ليس من قبيل الصدفة

اية هى الامنية اللى نفسك تحققها ؟؟

انتي اكون نفسي و لا اقولكم بلاش اكون نفسي مفيش احلى من راحه البال اللي اتمناها

بتثق فى اصحابك قد اية ؟؟

اصحاب و لا اصدقاء مش عارف ليه بفرق بين الكلمتين دول انا شايف ان اسمى درجات المعرفه هي الصداقة ازاي مأثقش فيه

خانك صديق قبل كده ؟؟

الصديق بمعنى الصديق لأ

عملت معاة اية ؟؟

مهو محدش خان

كرهت حد كنت تعرفه قبل كده ؟؟

تعرفه دي تقال ممكن على البقال تحت البيت او لشخص انا مجرد اعرف اسمه و ده يزود المجال البحث جدا فأعتقد اه لأني برغم اني نادر اني اكره حد بس اكيد لو كرهت حد هكون اعرفة

موقف عملته و حسيت أنك ندل فيه ؟؟

مش فاكر بصراحة خالص

ايه أكتر يوم بتحبه فى أيام الاسبوع ؟؟ وليه ؟؟

الخميس ليه عشان الويك ايند أخيرا هناااااااااااااااااااااااااااااااااااااااااااااااااااااااااااااااااام

ايه أكتر حاجه بتعجبك فى شخصيتك ؟؟ وايه اكتر حاجه بتكرهها ؟؟

مينفعش يعجبني حاجه فيا انتي اللي يعجبكم انا صعب شويتين يعجبني بكره خوفي

ايه اكتر شعب بيعجبك ؟؟ واكتر شعب مش بيعجبك ؟؟

مفيش و لا ده و لا ده لأن عشان يعجبني شعب لازم اعاشره و عشان كده ممكن احط في الاجابتين مصر لأني معاشرتش الا شعبها

اكترحاجة بتحبها فى حياتك عامة ؟؟

اصدقائي

واكتر حاجة بتكرها ؟؟

الكذب

وايه المكان اللى بتحب تروحه على طول لما تكون زهقان؟؟

الكومبيوتر

ايه هى رياضتك المفضلة؟؟

كره القدم بحبها جدا بس خلاص مفيش صحه لرياضه

أيه هي نظرتك للدنيا؟؟

تشاؤمية عشان ميجليش احباط من الاخبار الحلوه

أيه أكتر اغنية بتحبها وبتهديها لمين ؟؟

حبيتي يا مصر و بهديها لبلدي
و اي اغنيه لسعاد ميسي و بهديها لواحد عارف نفسة

التاج دا هتمرره لمين " وش شيطان بيضحك " !!!؟؟

مش هكون ديبلوماسي المره دي
لوحدانيه اللي شجعتني اعمل المدونه دي
لمش قادره اللي بعتتلي اول تاج
و لزمالكاوي عارف نفسه بيجي هنا

مقطتطفات من يوم غريب

يوم من اغرب الايام اللي شوفتها في حياتي تعبت جدا روحت الشرق و الغرب و كانت لفه ما بين الجيزه ووسط البلد و قابلت ناس غريبه جدا

مكتب التنسيق

بدأ اليوم بمكتب التنسيق مشوار مش عارف ايه لازمته هو واحد طلب خدمه لواحده ابوها مسافر و لوحدها و من اسكندريه و ثانويه عامه من خارج مصر و استنفذت الرغبات ( انا برضه اللي جيبت خبر استنفاذ الرغبات ليها ) مطلوب مني اكتب رغبات جديده نزلت محطه الجامعه و مشيت لغايه المدينه الجامعيه مقر التنسيق من اسبوع قالولي نقول المقر اتمشى لمدريه امن الجيزه المهم بعد ما اتمشيت للمقر يجي ساعه الا ربع و نعل الجزمه تأكل اهو يلا كله خيبر في رمضان وصلت الكتب هو مش مكتب بالمعنة هو سور حديد و بوابه قدامهر رصيف نص متر العربيات راكنه عمودي عليه فالمفروض الناس من السور ده للجزء الفاضل من الرصيف يعملو طوابير لقيت كتله بشريه متهيألي دي مشفهاش في حته الا لو كانت جمعيه بتقول انها بتوزح لحمه ببلاش
وقفت 5 دقايق اتأمل الموقف و ادرس الموضوع ازاي اخش و احاول اشوف حد اسأله لأني عشان اخش قدامي ساعات قلت في الاخر اخش يمكن اطلع بصابونه دخلت الطابور و انا في وسط الخناقات الاقي الست من دول تديني الكتف تطيرني و تزاحم جامد و انا احاول ازاحم انا كمان الاقيها بتبصلي من فوق لتحد و تقولي مش تحاسب ابص ليها بزهول و مرداش اتكلم ما احنا في رمضان بقى .
و شويه عرفت سبب من اسباب الزحمه ان الواحده من دول داخله الطابور و معاها بنتها و اختها و بنت اختها و هي داخله تسأل و الباقي داخل يساند نقول ايه في الشعب المصري و برده الاقي الشعب المصري بيتألق و الاقي كل شويه واحد يزقني من ضهري ابص ليه من فوق لتحت يقولي انا هخش اسأل سؤال بس ارد عليه اقوله الجمله المأثوره انا و كل اللي قدامي داخلين نسأل سؤال
و الناس تتخانق و تشتم و اللي يقول هشتكي الوزير و كلام كتير بس بعد ما سمعت شكوى من الشكاوي قلت الموظفين على حق و الحكومه على حق واحد بيقول انا كاتب رغبه اولى كذا و رغبه تانيه كذا جات لبنتي الرغبه التالته انا عاوز احولها للكليه اللي انا كاتبها في الرغبه التانيه
في الزحمه دي الموظف قعد يفهم فيه 10 دقايق ان مدام الرغبه مجاتش و اتعدت يبقى اكيد مجموع البنت ميجبهاش و الراجل اللي في دماغه في دماغه انه عاوز يحول لبنته في الرغبه التانية
فعلا الناس دي كلها تستاهل
لما 48 رغبه واحد او واحده تستنفذهم من غير ما تجي كليه يبقى استهتار طبعا
ده مستقبله مستهتر بمستقبله للدرجه دي
و المصيبه التانيه اللي عاوز يحول
طب هو انت من الاساس ليه محطتش الكليه اللي عاوز تحولها قبل اللي انت كتبتها
مش هنسى ظرف التنسيق لما خدته
قريت الكتيبات اللي معاه كويس
و عرفت ايه الكليات اللي فاضل فيها اماكن و رتبتها على حسب الاماكن اللي ممكن ارحها
مكتبت هندسه اسيوط مثلا قبل تجاره
لأني عمره ما اروح ادرس الهندسه في اسيوط
اللي اقدر اقوله انهم يستاهلوا الي هم فيه لأن كان قدامهم الفرصه هو قاعد في بيته بيشرب شساي يفكر كويس و يشوف البدايل كويس

بنك مصر

كان ده اول اصطباحة اليوم طلعت من هناك على بنك مصر الرئيسي اللي هو في محمد فريد
و انا ماشي في شارع محمد فريد ندهتلي سيده دون السبعين و فوق الستين تعالى يا واد اسندني روحت رجعت و لفيت ايدي عشان تسند عليها راحت مسكت ايدي و لفت معصمي بحركه مفاجه بصت على ايدي من ناحيه العروق و سندت و احنا نازلين من على الرصيف ندهت على واحد تاني تعالى يا مهزق نزلني هنا يا واد راح الراجل نزل معايا و طلعها على الرصيف التاني و احنا ماشيين عماله تزق في دراعي و تشد جامد لغايه ما وصلنا البنك المركزي زقتني على العسكري و تقولي دوس العسكري ده على حسابي الراجل اول ما شافها رحب بيها سألته عندكم فلوس جديده يا واد قالها لأ في بنك مصر المهم روحنا بنك مصر برده نفس الكلمه دوس العسكري ده على حسابي و عمال تزق و تشد فيا و العسكري ازيك يا حاجة طلعنا البنك راحت الست مغيره الوضع راحت مخلياني قدامها و اسكه في ايايا الاتنين و عمال تزق فيا و تقولي انت اصطبحت بوش مين النهارده عشان تقابل واحده عجوزه زيي قبل ما ننزل الخزينه كان في ظابط جيش نازل راحت قالت تعالى يا ظابط خدني معاك نزلني تحت الراجل راح جاي بجنتله المصريين تعالى امشي انت انت تعبت و التفت و خارج سامعها من خلفي ايه ده انت ظابط جيش مش ظابط داخليه حسيت بعد ما مشيت بألم جامد في دراعي من الزق و الشد.
في بنك مصر الرئيسي اعرف ناس كتير جدا في ادارات مختلفه معرفه شغل النهارده على عكس العاده و عكس عقارب الساعه في مصر الموظف هو اللي عيد عليا اداني ربع جنيه بحاله و انا قدانه لقيته بيطلع فلوس و مديني ربع جنيه و صممم حاولت ارجعه ابدا لازم تاخده مش هخلصلك شغلك الا لما تاخده انا فكرت حتى اخد الربع التذكاري الرهيب سكان على الاسكانر بتاعتي و اعرضة ليكم هنا بس قلت احسن يبتعملي قضيه تزويرو لا حاجه ( ملحوظه هامه جدا مش معنى اني اعرف ناس في بنك مصر ان حد يقولي هات فكه عشان انا مكفي نفسي فكه انا و الشغل بالعافيه اصل اي حد يقابلني اليومين دول يقولي معكش رزمه 50 قرش معاكش رزمه جنيهات لغايه ما اتعقدت من الفكه )

البنك الاهلي و الخمسه جنيه

و انا في بنك مصر جاني تليفون اقابل صاحب الشركه في بنك الاهلي الرئيسي قلت كويس اهو تعديه شارع و مش هتمشور المهم عديت وواقف قدام البنك كانت هناك حرب مروريه حول ركن العربيات خصوصا ان في عربيات كتيره من بتاعهع نقل الفلوس مش عارف في ايه
في وسط الحرب سيده كبيره في السن و عسكري ماشي معاها المهم العسكري شاور على العربيه بتاعتها راحت مدياه 5 جنيه هتقلولي عرفت منين انها 5 جنيه اصل العسكري مخافاهاش عسكري جنبه قال ايه ده 5 جنيه قال اه راح رايح جري يفتح ليها باب العربيه اللي ورا عشان ينوبه من الحب 5 جنيبه و لسيه هتطلع اتلمت المجاعه على العربييه 2 كناسين كمان و بعد ما اتوزعت التركه و العربيه بدأت تتحرك ظهر البعبع امين الشرطه بعبع الميكروباصات و التاكسيات اللي عمال ينده الونش و يشد في العربيات خبط برقه على القزاز و قال انا و الله ما خدتش الست الظاهر تعبت من الدفع رفعت القزاز الكهرباء و مشيت عرفت النهارده اد ايه الخمسه جنيهات تصنع المعجزات تخلي العملاق قطه و البيه غلبان و الطاغيه انسان ( حلو حته السجع دي )

حته ملهاش لازه نختم بيها

من فتره كبيره جدا مشترك في المجموعات البريديه و المنتديات و في حتت قضيت فيها احلا سنين في حياتي في مناقشات في كل حاجة و اي حاجة جد و لعب و تهريج و كل انواع المواضيع من ضمن المنتديات اللي اشتركت فيها منتدى طلع قرار اه هو متنفزش فتره طويله بس كمنت متفق بشده معاه قال انه منتدى خاص بالكوره بلاش حد من الاعضاء يرسل رسايل دينيه عشان لان محدش يقدر يحكم عليها و يعرف اللي فيها صح ام خطأ او حديث مغلوط او خلافة و عملوا لائحه عقوبات للمخالفين مغلظه قريبه من رسائل الاستفزاز و الخارجه لأن كان من وجهه نظرهم الرسائل الدينيه المغلوطه اخطر من اي استفزاز و اخطر من اي خروج عن النص .
و في نفس المنتدى عملو لائحه عقوبات للي ينقل و ميقولش المصدر دي حاجه بقولها بس عشان الرسائل الدينيه كترت جدا مجهوله الهويه و النقل كتر جدا اصعب احساس على الشخص ان يشوف اللي كاتبه بتوقيع شخص تاني .
اخيرا وجهات النظر و الاراء نسبيه ممكن حد يشوف ان وجهه نظرك غلط و انت تشوف انها صح عادي جدا في الحياه
دكتور الله يمسيه بالخير نبه علينا في بديه السنه الدراسيه السنه اللي فاتت انتو في دراسات عليا متجزمش ابدا بأي حاجه لما تحب تقول حاجه تقول انت شايف من وجهه نظر متقولش هي كده و مينفعش الا كده

ايه لازمه الكلمتين اللي في الاخر دول مش عارف اعتبرها تخاريف واحد راجع البيت مش قادر يحرك رجله من التعب و الارهاق

تاج .. بلاش تاج نقول حوار

احم احم نجرب الميكروفون الو الو ايوه شغال نبدأ منين نخش في الموضوع تاج ( مع اني لسه مش مستسيغ الكلمه دي ) من مش قادره و ده بالمناسبة برغم اني في منتديات كتير بقالي فوق ال 3 سنين دي اس ال و عضو فعال فيها الا انه اول حوار اعمله يلا بقيت مهم يمكن لأني رخم غامض كتير بيقولوا ردودي غريبه و غير متوقعه عشان كده هحاول ارد ردود نمطيه في الحوار ده نبدأ بقى

لو قالولك اختارعصر من عصور مصر عشان تعيش فيه تختاراى عصر وفى عهد اى حاكم
واشمعنى؟

.مش هقول عصر الرسول ص احسن يكون حظي المنيل اطلع من الكفار احب اتواجد في العشرينات لما كانت البلد نضيفه او في عهد ايا من ال محمد علي

اول اولوية فى حياتك عيلتك ولا شغلك ولا اصحابك؟

اول اولوياتي انا طبعا مغرور يمكن بس واقعي انا احب اصدقائي و احب عائلتي بس احب اقضي وقتي زي مابحب انا يبقى اكيد انا الأول
ايه اكتر حاجة بتحبها فى رمضان

اللمة حيث اني وحيد ممكن اشوف ناس مبشوفهومش الا في رمضان

اوصف ليا اجمل فطار ممكن تفطره؟

فته رمضان يعني 30 يوم فته الا ايام العزومات

لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟

ابقى وسط الناس
"حكمت فعدلت فأمنت فنمت يا عمر"

للى بيبوظ الحكام ..نفسهم ولا الشعب ولا الحاشية المقربة؟؟

الثلاثة

مين اكتر اعلامى مصرى بتحترمه؟؟

الاحترام شئ ميتحسش الا بعلاقة شخصية اما انا ممكن اقيم الاعلامي بفكره
و لا اعلامي بحترم فكره هي دي اجابتي بس اكيد في كتير محترمين ده هعرفه لو قابلت حد او عرفت حد شخصيا

قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟

لأ
مبحبش اقرا دواوين الشعر
بحب القصص الحكايات الروايات المقالات

لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟

ممكن سواق تاكسي على الاقل هقابل كل الانماط و الشخصيات هسمع كتير
و هستفيد اكتر

ايه تانى بلد تتمنى تعيش فيها بعد مصر؟؟

حاليا مفكرتش

اوصف ليا ترتيبات اجمل فرح ممكن تحضره؟؟

نادرا ما احضر افراح بس شغال جنازات الله ينور

.
بتراعى كلام الناس والقيل والقال؟ لو اه او لو لا قولى ليه؟

اه و لأ ساعات احب ارد على الكلام
.
صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟

لأ لأني شوفتهم في حياتي اما لو مشوفتهمش فده هيتوقف و اجابتي هتكون نفس اجابه السؤال الجاي

السعادة هى؟؟

القناعه و الرضا
.
عندك امل ؟ اسبابك ؟

لأ
مفيش فايده

لما تحب تهرب من كل شىء بتروح فين؟؟

للكومبيوتر

امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟

لما بشوف اولاد اخويا
.
لما بتعمل عمل خيرى بيكون ايه هو دافعك الاول؟؟

مبحبش اتكلم لأن ده حاجه بيني و بين ربنا بس

بتشرب سجاير؟لو الاجابة اه ايه شعورك لو شفت ست بتشرب سجاير وليه؟
لأ
زي ما بشوف الراجل بس غالبه بتبقى ممكن اركز بدون قصد لأنها حاجه غريبه على المجتمع

بتعرف ايدك اليمين من الشمال ازاى؟

بحسنه في ايدي اليمين

ايه اكتر اله موسيقية بتحبها؟

محبش اسمع اله معينه ممكن اسمع الموسيقى على بعض

فى رأيك ليه الذوق والنخوة اتعدموا؟

موجودين بس نادرين و ليسوا منعدمين

ايه الحاجة اللى لو حصلتلك تبقى سعيد قوى؟

النجاح
سواء في الدراسه
او في العمل
او في الحياه

تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟

مصنع

البحر ولا النيل؟؟؟

الارض
احب الارض تحتي تكون ثابته
لو على القاعده قامه يبقى احسن قاعده فوق كوبري ستانلي

مركب ولا طيارة؟

قطر
زمان كان نفسي ابقى سواء تروماي او مترو او قطر بأختصار اي حاجه تمشي على قضبان
.
عاقل ولا مجنون؟

في حد يجاوب على كل ده و يبقى عاقل

تقرا كتاب ولا تتفرج على فيلم

؟
حسب الحاله المزاجيه بس في الطبيعي القراءة هي عشقي من و انا في اولى ابتدائي

بتمرر التاج لمين؟؟

لازم اكون ديبلوماسي
لأي حد يزور البلوج او انا زرته و علقت عنده

امين ابونية

الكلمه الاولى وظيفه و التانيه مش عارف ايه لازمتها ... انا بتكلم على ايه على العنوان الغريب اللي انا كاتبه اللي انا نفسي مش عارف كاتبه ليه يمكن الفطار لسه كابس على نفسي
المهم نسيبنا من العنوان و ةنخش في المهم ( هو مش مهم اوي لأن كل الكلام تخاريف ) شاورت لميكروباص في رمسيس و طلعت و طلع معايا 2 امناء شرطة طلعت الفلوس و بعتها للسواق و هما قاعدين يدردشو مع بعض و لا كأنهم قاطعين ابونيه في الميكروباص و شويه واحد منهم قال غمره معاك و نزلو و السواق متكلمش بحرف واحد.
مش عارف على غير المخطط من قبلي افتكرت و انا بكتب موقف من قد 8 سنين ركب الميكروباص على خط مطريه الف مسكن 2 رجاله و السواق بعد شويه لما مبعتوش قال اللي طلع ورا يبعت راح ردو عليه احنا مباحث السواق الظاهر كان بلطجي راح رد عليهم و قال يعني ايه مباحث مش راكبين الميكروباص المهم بقى نفسي افتكر ايه اللي حص و دفعوا و لا لأ معلش الزهايمر عامل شغله معايا .
راكب ميكروباص خط بولاق اسعاف من الاسعاف سواق الميكروباص طاير من الفرح اصل البيه امين الشرطه هيرك معاه في الميكروباص و هيباركه يعني محدش هيقدر يقوله ممنوع تطلع على كوبري أكتوبر و لا اي حاجه من دي و عشان فرحان بيه اوي قعده على الكرسي اللي قدام جنبه اللي بيقعد عليه 2 لوحده و الميكروباص بيطلع واحد من الحثاله عامه الشعب تقريبا كان متأخر على الشغل شاف الميكروباص في واحد بس قاعد قدام فبيفتح الباب يقعد جنبه راح السواق قاله لأ البيه قاعد هنا فالراجل اتنرفز و قفل الباب الامين راح شاتمه و قال ............ ( هي الرقابة في كل حتة ) و كان عاوز ينزله ( مش عارف كان ناويه ياخده جوز اقلام و لا ايه ) الراجل السواق قاله عندي انا يا بيه خلاص سيبك منه ( اكيد كان في دماغه يعني هتنزل تتخانق و هتخليني استناك مش هلحق اضرب اللفه بسرعه عشان نلم الفلوس ) يا دي النيله مش قادر استحمل اقعد من غير ما اقرى افكار - راح الامين ركب بأمتعاض و هو يتمتم ( حلوه يتمتم دي انجليزي ده يا مرسي) بشتائم مش هقولها عشان مش كل مره الرقابه تمسح ورايا .
في مترو الأنفاق ( أهو الواحد يغير تلاقيكم قرفتوا من الميكروباصات ) كنت بحط التذكره في الماكينه و بعدي ببص جنبي لقيت اربع امناء شرطة بيقفزوا من على المكن بصيت بأشمئزاز و من فوق لتحت نظره استحقاريه و مشيت للأسف طلعوا اساتذه في البجاحة و انا متوقعتش اني الاقي حد بجح كده واحد منهم بيقولي هو شكلنا غريب و لا اية بصراحة مكنتش متوقع السؤال و تفرق كتير جدا لو كنت متوقعه انا قمت باصص ليه من فوق لتحت و سيبته بس بصراحه مشيت خطوتين على الرصيف و ندمت اشد الندم اني مردتش عليه و قلت : كان هيبقى منظركم اغرب لما تتقفشوا و تدفعوا ال 10 جنيه الغرامة يلا ملحوقة المره الجايه .
و برده عشان متقولوش اني متحامل على امناء الشرطة هحكي حكايه في ميكروباص عن واحد مش امين شرطة ركبت الميكروباص انا و زميل و واحد كان واقف في المحطه و لأنه طلع الاول اطريت اركب انا ورا و صاحبي قدامي و راح صاحبي دفع هو الاجره ( اصلي استغلالي بعيد عنكم ) المهم الراجل اللي طلع مدفعش و انا مبتكلمش شويه كده و السواق قال في حد ورا مبعتش بصيت ليه نظره عابره و سكت شويه و السواق قال الكلمه دي تاني راح الراجل اللي جنبي قال ايوه و حط ايده في جيبه و هو بيطلع الفلوس سألني هو انت دفعت امتى ؟؟ رديت عليه قلت ليه الاستاذ دفعلي راح الراجل رد عليا رد مش هسمع اعجب منه في حياتي قالي طب مش تقول بصيت ليه و مردتش اصل برده الواحد مبقاش فيه حيل للجدال زي زمان بقيت افضل اني اسكت على اني اكلم واحد يشلني .
دي كانت جوله سريعه مع الاستاذامين ابونيه نلتقي بعد السحور

حدوتة

الشعب المصري زي ما هو شغوف بالنكت هو برده شغوف بالحواديت و يبدأ اي واحد حياته منذ طفولته بحدوته قبل النوم و لما يكبر يقعد يحكي و يتحكيله حواديت سواء في البيت او في الشغل او في المدرسة او في القهوه حتى ممكن تكون الحدوته نميمه و ممكن تبقى غيبة و ممكن تكون حكاية حصلت و شافها المهم عشان منطولش قلت احكي حدوته صغيوره من الحواديت اللي عجباني

عائله مصريه رجل و زوجته راحو سابوا مصر على السويد و هناك اشتغلو الاتنين و خلفو اول ابن ليهم و خد الجنسية السويدي ( يا بختة بالجنسية ) و بعد فتره الزوج حس بحنين لبلدة ( ده الفرق بين اللي بيحكم قلبه و اللي بيحكم عقله ) رجعت العائله مصر الزوجة مقدرتش تتأقلم على الحياه في مصر ( مع انها شربت من نيلها بس اكيد عرفت ان الميه هتجيب فشل كلوي ) المهم راجت الزوجة عادت الى السويد و سابت الزوج المشتاق لتراب البلد و الابن اللي التحق بمدرسة هنا في مصر و مرت الايام و السنين و الام تحافظ على ارسال مبالغ نقدية لأبنها بصوره منتظمة حتى عندما ذهبت الام لأداء العمره نزلت ترانزيت ساعه في مطار القاهره قابلت ابنها و اديته فلوس و سافرت تاني على السويد دوغري .

الطفل اصبح رجل و تنسيق الثانويه العامة رماه على هندسة بس الواد زهق قاعد مع باباه مفيش ست معاهم ابوه نضف هنا اغسل اطبخ جيب طلبات راح لخالته و قال ليها انه عاوز يسافر السويد يكمل دراسته و يعيش هناك ( بدل الدنيا هنا مفيهاش رجا ) جهز كل اوراق السفر و في يوم السفر اخبر والده انه هيبات اليوم عند خالته و راح سافر على السويد ( بيفهم )

و لما نزل مطار السويد كلم باباه و قاله انه بيكلمه من السويد الراجل طبعا اضايق جدا من سفر ابنه المفاجئ بس بمرور الوقت تقبل الموضوع و لكن الراجل وقع في مين هييقوم بخدمته و هو وحيد .

فقرر الزواج من اخرى و استمر الزواج قليلا بس الراجل مستحملش طباع زوجته و راح مطلقها

أخيرا الراجل حس ان تراب البلد ريحته وحشه فقرر يرجع السويد و يعيش مع ابنه و مراته فراح هناك و اشتغل تاني محامي هناك اما الابن فالأول عمل معادله هناك و بعدين دخل كليه الهندسة و هو في الكليه عمل في احدى المصانع و طبعا هناك مفيش حاجه اسمها بالدور و الاقدميه و الكلام اللي شغالين بيه في افضل و اكبر شركات القطاع الخاص في مصر لأ هناك الشغل بالمجهود و الدماغ صاحب المصنع لقاه مجتهد و كويس راح خلاه مدير المصنع و هو لسه طالب في الكليه لدرجه انه بيقول انا لما اخلص مش هشتغل بشهادتي لأني في منصب كويس جدا

و طبعا عاشوا في تبات و نبات و اتلم شمل العيله تاني

( تنفع فيلم عربي مش كده بس يبقى في عصابه و شرير و رقاصه و خناقة في الكباريه يتحطو في النص تحابيش و يعكسوا البلاد انهم يخلو السعاده تكون في مصر مش السويد و يبقى فيلم عربي ملوش حل )

قارئ الافكار

النهارده و انا ماشي قلت اجرب مهنة قرايه الافكار خصوصا انها مهنه سهلة و مربحة و خلينا النهارده اقرا افكار الناس في وسائل المواصلات
لقيت مكان في ميكروباص قعدت و مشي في ناس كتير بتشاور بس الميكروباص فول تانك الراجل بيبص على الناس يا ترى بيفكر في اية ( يعني مفيش حد عاوز ينزل من الركاب ايه راكبين لأخر الخط و لا ايه عاوزين نلقط الناس دي بدل ما هي واقفة ) يردد بصوت عالي حد نازل عماد طب حد نازل مرجان
طب ليه ميكونش بيفكر في حاجه تانية ( يعني يا ربي ميكونش معايا اتوبيس 28 راكب بدل الميكروباص اللي بيشيل 12 و انا حاشر في 15 و واحد واقف كان التاني اقعد فيه 28 و أوقف 15 كمان و كان زماني لقطت الزباين دول كمان )
3 ستات كبار في السن بينزلوا السواق واقف و بيبص جامد و مضايق من الوقفة يا ترى بيفكر في أيه ( يعني هما جايين يموتوا في الميكروباص بتاعي متنزلوا بقى عاوزين نشوف اكل عيشنا ) ملحوظه في سواق ميكروباص قالها فعلا .
محطة المطرية لمتور الأنفاق تتميز بأن فيها قضيب تالت و اتجاه حلوان بيفتح الباب العكسي في المترو و ده طبعا الباب اللي بيسند عليه الناس اللي واقفة وحد كان ساند على الباب وواحد طلع بدل ما يخش و يعدي وقف على الباب الراجل اللي كان ساند بيبص ليه ( يعني انا داخل جري في المرج و ساند على الباب عشان سعاتدك تاخد مكاني من غير ما تتعب )
ميكروباص في خط اسعاف بولاق و هو ماشي واحد قاله اباظه معاك و التاني قاله الحجاز معاك ( انتو هتخوتوني اقف كل نص متر طيب ) يعدي الميكروباص اباظه بسنه و يقف قبل الحجاز بسنه يلا اللي عاوز اباظه و الحجاز
زبون اباظة انا مش قلت ليك اباظه موقفتش ليه و يمشي و هو بيبرطم
زبون الحجاز ( يعني انت بسلامتك هتعمل عليا برم طيب مش نازل )
اول ما يتحرك الميكروباص يقوله الحجاز معاك السواق ( انت لسه منزلتش طيب انا همشيك شويه ) يقف بعد الحجاز بشويتين انا مش قولت ليك الحجاز
مهو انا مش هقف كل متر يا بيه
انا دافع فلوس انزل في الحته اللي انا عاوزها ينزل و يرزع الباب .
و عشان متقولوش اني متحامل على سواقين الميكروباصهحكي حكايه لسائق ميكروباص من كوكب اخر
الراجل ده الناس بتشاورله مبيقفش ليه مبتقفش يقول محبش اركب حد و يقف في الميكروباص في اخر الخط واحدة ست كبيره قالتله ممكن تاخدني ل ..... و كانت حته قريبة قالها ليه يعني اوصلك راحت مشيت قالها اركبي ياحاجه بضحك كده جت تنطلع فلوس تدفع الاجره قال لأ يا حاجه دي حاجه صغيره و مرضيش ياخد فلوس
فعلا كان سائق ميكروباص من كوكب اخر قعدت ادور عليه طوال عام بركب الخط ده مشوفتوش تاني

هو ميكروباص

ميكروباص مزدحم ناس قاعده و ناس واقفه مفيش مكان الا على الباب شاور واحد و طلع على الباب قعد يزعق في الناس انا عاوز اخش و زق الكل ووقف في وسطهم و مبقاش حد عارف يقف الا هو كرسي فضي واحد بيقعد عليه قبل ما يوصل للكرسي قعد على نصه التاني قعد على النص التاني قاله انت واخد كل حاجه بالدراع رد و قال هو مكروباص



بس خلاص خلصت الرساله اصل مش كل ما اقرا حاجه الاقيها مش مفهومه اشمعنى انا اكتب كلام مفهوم يلا ادعولي انام و تصبحوا على خير

مين فينا اللي صح

تقريبا الموضوع ده حصل من 7 شهور في ليله من ليالي الصيف الطويله الممتعه اللي قليل ما نتجمع فيها انا و اصدقائي كانت الساعه تقريبا 2 بالليل ( فرصه بقى اهلي بيصيفوا و انا خدها فرصه و سهران انا و اصحابي ) قلت كده نسخن السهره شويه بحديث سخن شويه سألت سؤال للكل اللي معايا 4 تقريبا افرض انت خطبت واحده و حبيتها ( الشر بره و بعيد ) و جت اعترفت قبل الجواز في فتره الخطوبه انها غلطت هل هتتجوزها و لا لأ ؟
كان الرد مسلم بيه من الكل و بدون اي تفكير او تردد لأ طبعا
استغربت جدا و قلت ليه ؟
قالولي و انت هتوافق ؟
قلت ليه لأ بس انا اساسا مش هتجوز بس لو اتحطيت في الموقف ليه لأ دي واحده عاوزه تتوب و داخله معاك بصراحه و هي ممكن كانت تخبي عليك و انت كنت ساعتها هتتجوزها و هتكون مبسوط جدا ليه هعاقبها على صدقها دي واحده عاوزه تتوب
طب لو اللي غلطت معاه شافها في الشارع معاك ساعتها هيقول عليك ايه ؟
قلت انا مؤمن جدا ان ربنا سبحانه و تعالى مبيفضحش اي حد تايب و حتى لو شافها ممكن جدا ربنا يعميه عنها و ابسط مثال قصه سيدنا موسى ( ارجوا ان لاتخنني الذاكره او يقوم احد من الاخوه بالتصحيح لو كنت على خطأ ) عندما لم ينزل المطر و قال له الله سبحانه و تعالى انه لم ينزل المطر و بينهم رجل عاصي فطلب سيدنا موسى من الرجل العاصي الخروج فلم يخرج و لكن نزل المطر فسأل الله سبحانه و تعالى هو لم يخرج و نزل المطر فكيف فقال هو تاب الي توبه نصوحه فقال فأخبرني من هو فيقول له الله سبحانه و تعالى سترته وهو عاصي أأفضحه و هو تائب
عشان كده عمر ما ربنا سبحانه و تعالى هيفضح تائب
طب ايه اللي يضمنلك انها تابت بجد مش ممكن تكون هترجع تاني ؟
قلت طب ليه تقولي من الاساس مهي كان ممكن تخبي لو عاوزه الجواز منظر او ستار للخطيئه
مفيش اي حد مقتنع بكلامي فقلت نحاول نغير مجراه شويه
مسكت واحد منهم على وجه الخصوص قلت ليه طيب هما كلهم انا عازرهم كلهم مغلطوش و عاوزين شريكه حياتهم تبقى برضه مغلطتش انت غلطت و كذا مره ليه هي ترضى بيك على غلطك و انت مترداش بغلطها
قالي انا راجل
قلت لو في فرق بين الراجل و الست في دي كان ربنا عمل لكل واحد من الاتنين عقوبه اما هي عقوبه واحده للأتنين و ربنا مش هقبل توبتك و توبتها لأ
قالي استأمنها ازاي على بنتي ؟
قلت مهو اشمعنا هي بتستأمنك على العيال كلهم و انت كنت كده و ممكن تستأمن بنتك على واحده كده بس كدبت عليك و لا هتعرف
قالي لأ الست تختلف هي اللي قاعده معاهم فازاي تقعد مع بنتي و هي كانت كده
قلت انت للأسف في ازدواجيه في معايريك مترضاش لغيرك اللي بترضاه لنفسكم مترضاش للست انها تعمل حاجه تتفاخر انك عملتها
قالي انا راجل و حر
و لغايه دلوقتي محدش عرف يقنع التاني بوجهه نظره بس من كام يوم في واحد وافقني على وجهه نظري بس بره الاربعه و ده شئ حسسني اني ممكن اكون صح لأني كنت الوحيد اللي بقول كده و اتقال عليا مجنون كتير اوي فقلت نسمع الرأي و اعرف انا غلط و لا صح و مين فينا اللي كلامه صح

فين البسكوتة

التليفون رن لقيت صديق ليا عاوزني انزل معاه يشتري جزمه قلت ليه هستفاد انا اية من المشوار ده بعد مفاوضات حول ثمن وقتي الثمين و ثمن تأكل نعل الجزمة في المشي اتفقنا على ايس كريم رغم اني كنت عاوز شاورمة بس وافقت على مضض لأنه غالي عندي المهم نزلنا لفينا و مشتراش حاجه قلت ليه هتاخدني في دوكه فين الايس كريم قالي ماشي قلت ليه في استيك جلاكسي ب 12 جنية هو ده اللي عاوزه رفض بشدة و بعد مفاوضات قبلت بكيمو كونو اللي ب 1.5 جنية روحنا المحل بعد تقليب سألت الراجل في المحل مفيش كونو شوكلاتة قالي اخر واحده على فكره هتكسب قلتلصاحبي هتاخد ايه بص من فوق لتحت قال لأ انا هشرب بيبسي فتحت الكونو قعدت اكل و اقشر اكل واقشر بعدين سألت الواد هي فين البسكوتة بص كده و قالي انت عملت ايه في الكونو قلت ليه هو جه كده قلت بقى لازم اوصل للبسكوته لقيت و انا باكل ورقه بيضا مبروك كسبت كونو و اكتشفت ان الجيلاتي اتصب كله في الورقه من غير بسكوته بما فيها الحته الشوكلاته اللي تحت قلت كويس ربنا عوني ببسكوته و جيلاتي تاني صاحبي بص كده و انا بغير الورقة و راح قال للراجل هاتلي انا كمان واحدة كونو و احنا ماشيين بيقولي كلها بسرعه قلت ليه لأدي هسيبها في البيت قالي يا حاج عشالن نكسب و نغير تاني قلت لو كسبت في البيت هرجع للراجل مشيت شويه راح قالي استنى راح فاتح الورقه و قال ايه ده مكسبتش ايه الحظ ده ضحكت و سيبته و طلعت البيت

الكلام اللي فوق ده تخاريف صيام

الخطوط العريضة للروشنة

رحت للحلاق و دي حاجه من النادر اني اعملها مش عارف ايه سبب الفوبيا اللي عندي من حلاقه الشعر و لا هي فوبيا

و لا مجرد كسل عن الحلاقه المهم اني دائما لما ابدأ اقول اني عاوز احلق بحلق بعد ما اقول الكلمه دي بشهر دخلت على الحلاق قالي ايه رأيك احلق ليك زيرو
قلت ليه ليه بس
قالي بغيظ اصلك مبتسرحوش
قلت ليه و الله بسرح شعري
قال ده منظر شعر متسرح
قلت مسرحة الصبح قبل ما انزل الشغل
قال طب حط جل عليه كريم اعمل اي منظر
قلت كنت بحط جيل الاسبوع ده عشان طول لدرجه اني مش عارف اسرحة بس محطتش النهارده
قالي اشمعنى
قلت عشان انا عارف اني هجيلك
قالي حرام عليك انت هتتجوز ازاي
(كنت عاوز اقول مين قالك اني هتجوز بس قلت اسايره شويه ) اتجوز زي الناس عادي
قالي و تخش على مراتك كده
قلت و ماله كده ثم انا لو هخش على مراتي بشكل معين يبقى ده انسب شكل لأنها هي اللي عارفاني
قالي الشكل ده محدش يرضى بيك انت كده مش هتعرف تتجوز
قل ازاي ؟
قالي المفروض تضرب شعرك جيل توقفة ( بالمناسبة انا شعري ناعم الى حد ما و دايما الناس تقعد تقولي علي تسريحات غريبه لدرجة ان مره كان عندي في الشقه واحد صاحبي من الناس اللي بتنصحني بالتسريحات الغريبه كنت بغسل شعري قمت نعكشته بأيدي و خرجت ليه قلت ليه ايه رأيك في التسريحه قالي روشه طحن قلت كويس اخش بقى اسرح شعري ) تضرب شعرك احمر ( اه انا اهلاوي بس انا اسمر اسمر على احمر ناقص البس ابيض و ابقى علم مصر ) او اضربه ازرق ( الحلاق اتجنن و لا ايه ) البسلك سلسله سقط البنطلون ( كله كوم و تسقيطه البنطلون دي كوم موضه ما يعلم بيها الا ربنا )
قلت و ده اللي هيخليني اتجوز
قال اه عشان تعرف بنات و تمشي معاهم و تخطب لازم تعمل كده ( هو مين قاله اني عاوز اعرف بنات )بص عليا مثلا شوفت عامل شعري ازاي شوف دقني شوف السلسله حسس البنت انك فارس احلمها اللي بتحلم بيه
قلت اه قلتلي
نعبما
انعم الله عليك
سلام عليكم
هشوف لما اروح احلق المره الجايه بعد العيد هيقول ايه

رمضانيات

اعتزلت من سنتين تقريبا موضوع تعليق الزينات بتاع رمضان خصوصا اني اخر سنتين اتبهدلت جامد اوي كنت شبة بعلق لوحدي و فاكر اني كنت بقعد يومين اخش البيت وشي اسود و ايدي سودا و القميص اسود و البنطلون ابيض ( عشان هو اسود ) فقررت ان ضررها اكتر من نفعها و كمان عشان الواحد يحس انه كبر شويه على الموضوع ده يعني هقعد اعلق لغايه امتى .

اول سنه اعتزال الناس قعدت تغريني بالعودة الى الملاعب زي لاعيب الكورة بالظبط رفضت بشدة و قلت لا و الف لا و مرت اول سنه و الشارع ضلمة و انا برضه قلت لأ و الف لا بس فرع النور اللي علقته فضل لسة موجود متعلق النوازل بس اللي الناس قصقصتها عادي مهو المتر ب 0.60 قرش برضه مصلحة و فضل متعلق سنتين سنه نور و سنة لأ

السنه دي فكرت و انا تحت مش اني ارجع في كلامي بخصوص الاعتزال لأ طبعا فكرت ان النور ده لازم ينزل لأن بنسبة 90% الحبل اللي شايله دايب شمس و مطر و رطوبه و حمل سنتين و لو وقع واحد هيشد الباقي و دول 40 متر مش شويه يعني لو نزلو على حاجه هيعملو مصيبة و انا راجع من الشغل من يومين دخلت الشارع و مشيت لغابة البيت و قبل ما ادخل باب العماره رجعت و بصيت فوق قلت في حاجة غريبة ملقتش الفرع دورت لقيت الجيل الجديد خد الراية و شغال و لقيت واحد من اللي كانو بيعلقوا معايا معاهم رحت رايح اسلم راح الواد بيقولي ايه مش جاي قلت ليه انسى توبت خلاص راح قعد يسألني كام سؤال كده عن تغير حاجات في الكهرباء و اديته النصايح و اهم نصيحة قلت ليه غير الحبال قالي ليه قلت شد اي حبل هيتقطع في ايدك قالي ماشي بس عاوزينك معانا قلت انساني خالص قالي على الأقل تركبلنا المفتاح بتاع الكهرباء قلت لو على المفتاح ماشي خلصو كل حاجه و اندهولي على المفتاح قالي ماشي بس للأسف طلع ندل و ندة بدري شوية قعدت معاهم ساعه و نص بس ملمستش حاجه الا المفتاح ركبته و نورت و قلت كل سنه و انتوا طيبين و طلعت انام اطرف تعليق اتقالي و انا نازل اركب المفتاح من واد صغير جديد قالي هو انت يا كابتن كهربائي بصيت ليه و مردتش

رمضان كريم

صباح الخير يا ريس

اوعوا حد يفهمني غلط انا في البوست ده مش هتكلم عن السياسة و لا قصدي الريس الللي في دماغكم انا قصدي ريس تاني خالص المهم اول حاجة الواحد بيقول كلمة ريس دي كام مره في اليوم و لكام واحد في اليوم كتير و هتكون أكتر لو شغال في الحكومة و هتكون اكتر و اكتر لو موظف صغير هتكون ساعتها كل اللي بتكلمة تقوله صباح الخير يا ريس يا ترى دي اعملها ازاي يا ريس امشي الشغل ده يا ريس و لا اسيبة .
في الميكروباص ممكن تقوله ابو الفدا معاك يا اسطى (محدش يسألني اشمعنى ابو الفدا اللي جه على دماغي ) و ممكن جدا تقولي ابو الفدا معاك يا ريس ايه ده سواق الميكروباص بقى ريس اه و ماله ده حتى في خط ميكروباص بيروح مدينه السلام و كمان متنساش ان السواق ده قائد مسيرة الميكروباص ليه ميكونش ريس
و انت بتقطع تذكرة المترو ممكن جدا تقول ممكن تذكرتين يا ريس و ايه يعني لما تقوله يا ريس مش ممكن تكون نازل رمسيس او جمال او انور او حتى محمد نجيب
و الساعي في اي مصلحة حكومية لازم تقوله يا ريس و انت بتشرب الشاي عنده و تظرفة ال 2 جنية و تقوله كل سنه و انت طيب يا ريس مهو طبعا ريس لأن بكلمه منه ورقي يتحرك و يسلك طريقه في البلد اقصد في المصلحة الحكومية
أما المدير فبرده الريس لأنه هو اللي هيمضي الورقه اللي هاخد بيها فلوسي
فئه واحده مش عارف بيتألها ريس و لا لأ و هي الوزير يا ترى وكيل الوزاره و لا السكرتير هيقوله البوسطة يا ريس ؟؟؟؟؟

ايه الهدف من البوست ده مفيش هدف منه الا اني اقول رمضان كريم

عماره يعقوبيان اول و تاني مرة

عمارة يعقوبيان سمعت كتير جدا عنها كروايه جميله جدا فنزلت اشتريتها و قريتها المره الأولى في 3 ساعات تقريبا الروايه مشوقة جدا و الأحداث تتصاعد فيها و فعلا تستاهل تتقري تاني يوم قريتها تاني في نفس الليوم حسيت انه فعلا حلوة بس فيها عيوب و مش عارف ليه قارنتها بقصص نجيب محفوظ حسيت ان علاء الاسواني قدرتة في الوصف ضعيفه جدا بالمقارنة بنجيب محفوظ اللي فعلا ممكن يخليك تتخيل الشخصية من غير ما تشوفها و اما العيب الكبير ان الروايه 4 شخصيات رئيسية بتدور حولها باقي الشخصيات و لو مسحت اي شخصيه منهم مش هيحصل اي حاجه في الروايه المشترك الوحيد بين الشخصيات هو العماره و عشان كده تحس ان الروايه مكتوبه بطريقة الأربع قصص فصيره و و مدخلهم في بعض يعني اني اكتب اتربع قصص و احط ورقه من دي ثم ورقه من دي و هكذا عشان كلهم يبدأو مع بعض و كلهم يخلصوا مع بعض و العيب الاخير ان في شخصيات في الرواية بدأت كما انتهت بدون اي دور و لا تعرف مصيرها .
و كان رأيي بصفه عامه انها روايه جيده و ليست ممتازه جسدت عيوب كثيره في المجتمع المصري و لكن السبب الرئيسي في نجاحها ان مفيش وجود اصلا لفن الراويه حاليا تقريبا و ان الناس بيدوروا على اي حاجه فيها لمحه اسلوب او فكره جيده و خصوصا ان الفتره اللي قبل صدور الروايه تقريبا مفيش كتاب روايات الا صنع الله ابراهيم و هو اصبح مقل بفعل كبر سنة فنزلت الرواية و نجحت و نفزت الطبعه وراء الطبعه بسبب اشتياق الناس لفن الراويه اللي فعلا منعدم في مصر .بعد كده اعلن وحيد حامد عن شراء نص الراويه لتحويلها لفيلم سينمائي يخرجة ابنه مروان و بدأت تطرح اتسماء ابطال العمل و كان توزيع الادوار نمطي جدا لدرجه ان كل اسم اتقال قلت ده هيمثل ايه ايه قبل ما حتى يبدأوا تصوير الفيلم و جت كل الادوار زي ما قلت بنسبه تخمين تقترب من 100% الا الفنان خالد الصاوي مخمنتش انه هيمثل دور حاتم لأنه لما اتقال انه هيمثل كان الاسم الوحيد اللي اتقال انه هيمثل دور حاتم فملحقتش اخمن طبعا ده ان دل على شئ فهو يدل ان المخرج من دول بيستسهل كل واحد ياخد الدور اللي بيلئ علية مش لازم ندخل نفسنا في متاهات و نعك .
المهم دخلت الفيلم اول ما نزل لأني كنت متشوق بشده اني اشوف الحاجه اللي قريتها و برغم ان وحيد حامد قال ان الفيلم غير القصة بس بصراحه اتصدمت في الفيلم جدا الناس اللي معايا عجبهم الفيلم جدا و انا حسيت ان الفيلم قال الحد الادنى من القصة شخصيات اختفت ( الراجل الكبير ) شخصيات تضخم دورها ( يسرا ) شخصيات كان دورها منعدم او كانت شبة شخصية و اصبحت شخصية ( يوسف داود) شخصيالت ظلمت في مساحة دورها ( طه الشاذلي و حاتم ) اما الراجل الكبير اتشال عشان الرقابه اكيد و عشان اللي يتسمح بيه يتكتب مش هو اللي يتمثل و اما يسرا عشان مش معقول واحده بمقام يسرا تطلع في مشاهد قليله اما يوسف داوود فقالو هنجيبه على مشهد واحد منخليه محامي الفيلم و اما طه و حاتم كان من المفروض دورهم = دور زكيو الحاج غزام بس لأن ده عادل و نور الشريف فلازم يطلعو اكتر و كمان حبوا يقللوا من شخصية الشاذ جدا رغم ان القصة الشخصية دي كان عاوز يقول بيها حاجات علاء الاسواني
و مرت الايام و في يوم كنت زهقان قريت القصه تاني عجبتني تاني حسيت ان في حاجات مقريتهاش حسيت انها فعلا عبرت عن مشاكل كتير ( نقدي ليها للوصف و الترابط بس اما الفكره لأ ) و منذ اسبوع شوفت الفيلم على ال mbc و عجبني الفيلم برضة جدا عن المره اللي شوفته في السينما بس برضه حاسس انه ينقصه الكتير
متهيألي رغيت كتير و برده مش عارف اوصل اللي في دماغي فهسيب روابط الفيلم و القصه و انتو حملو الاتنين و اكيد هتعرفو اللي في دماغي بعديها بالنسبة للفيلم نزل كل الاجزاء و فك اول جزء

الفيلم
http://rapidshare.com/files/30091625/3mart_ya3kobyan.part1.rar.html
http://rapidshare.com/files/30091643/3mart_ya3kobyan.part2.rar.html
http://rapidshare.com/files/30091637/3mart_ya3kobyan.part3.rar.html
http://rapidshare.com/files/30091670/3mart_ya3kobyan.part4.rar.html
http://rapidshare.com/files/30091629/3mart_ya3kobyan.part5.rar.html
القصة
http://rapidshare.com/files/54532023/yaq.pdf

تهييس

نزلت في الفتره الأخيرة رشه اعلانات في مترو الأنفاق عن نوكيا بطريقه بيحاولو يخلوها مبتكره
الأعلان الاول للأسف مش جايب صورته بيقولك فيما معناه انك حاسس انك مضايق ايه رأيك اسألأل اللي جنبك عن اخباره خليك اكتر نوكيا
المصيبه ان الناس حسيت انها متأثره بالأعلانات و انا شخصيا اتأثرت خصوصا بالأعلان اللي انا جايب صورته دي لأنه بيطاردني في كل حته
و بحاول اعند معاه
اختار مترو فاضي و اقعد ادور على اتنين بيشوفوا الأعلان الاقي كل الناس نايمه على الكراسي و محدش فيه حيل يبص اختار محطه فاضيه و اقعد ابص و ادور على حد غيري يبص ملاقيش و انبسط اوي اني بثبت كدب الاعلان
النهارده كنت قاعد في المترو ببص على الاعلان و بعدين ببص جنبي لقيت واحده ست في الأربعينات بتبص قلت كويس اهي العمليه بدأت تفرج اهي الست اول ما خلصت اخر سطر قعدت تتلفت يمين و شمال و تتقمل في كل الناس تدور على اي حد بيقرا الأعلان مش لاقيه ( اصلي كنت خلصت قرايه خلاص ) قعدت على الحاله دي يجي محطتين تدور على حد يبص على الأعلان حسيت بمدى القرف اللي وصل ليه المصريين انهم بيدورو على اي لعبه تلهيهم من القرف و حسيت اننا شعب في طريقنا للجنان أو يمكن يكون العاقلين اللي هيتبقو مننا يبنولهم مستشفى يحطوهم فيها احسن
كنت هصور الأعلان اللي بتبص عليه الست بس حسين ان الناس في المترو هيقولو عليا مجنون اسنيت لما نزلت المحطه و اديتها صوره يلا كل موجه حر و انتو طيبين

يا كابتن هو بكره الحد ؟؟

النهارده الجمعه 14 اكتوبر دي لابد منها عشان محدش يتلخبط مني من كام يوم يوم الثلاثاء بقول للي جنبي النهارده كام رمضان قالي 8 رمضان
قولت شوف الايام بتجري ازاي يعني امبارح كان الاتنين و بكره الاربعاء
هو : فعلا الايام بتجري اوي
انا : و الله الواحد بيفكر يلغي يوم الاربعاء
هو :.........
انا : قولي اشمعنى الاربعاء
هو : اشمعنى
انا : السبت اليهود بيروحوا المعبد الاحد الاقباط بيروحوا الكنيسه الاتنين اجازه الحلاقين الخميس اليوم الوحيد اللي الناس بتفرح بيه الجمعه المسلمين بيروحوا الجامع
هو: طب الثلاثاء
انا : خلاص احنا نلغي الاربعاء مؤقتا و بعد 15 سنه الناس تتعود نلغي الثلاثاء
هو : و الله فكره بس الناس هتنام الاتنين هتصحى الخميس و لا هيعملوا ايه في اليومين اللي طارو
انا : لأ احنا نخلي الاتنين بعديه الخميس و الاسبوع خمس ايام و الشهر 6 اسابيع
هو : ( الظاهر هنج مني شويه )
انا : و كمان الموضوع ده هيشجع السياحه لأن الناس هتيجي تتفرج على الناس اللي مشيين بأيام لوحدهم
انضم الينا تالت قالوا اللي معايا على الفكره قالو بس كده الموظفين هيزعلوا انهم متعودين انهم هيبقضوا كل 4 اسابيع اما كده هيبقى القبض كل 6 اسابيع
قلت له بس كده هيبقى في تعويض انهم هياخدوا 6 ايام اجازه في الشهر
وافق بس طلب مني التعجيل بألغاء الثلاثاء ( بقيه الحوار قلب سياسي بلاش هنا اصلي قلت كلام يودي في داهيه كان برضه كله جنان )
جيت النهارده الجمعه نزلت من البيت بالليل قلت للواد النهارده ايه
هو : السبت
انا : شاطر و فاهم
هو: هنروح القسم الجمعه الجايه ( قصدوا يوم 20 الخميس بتوقيت الناس التانيه )
انا : لأ ده موافق السبت
هو : ازاي مش احنا سابقين بيوم
انا : كل اربعاء يعدي بتوقيتهم هنسبق احنا بيوم زياده فعشان هيعدي اربعاء تاني هنسبق بيومين
هو : انا كده دماغي هتتعب معاك
انا : سيبلي انا الحسابات و انا هقولك الايام اول بأول
قعدنا ننتناقش و انضم التالت و معاه 3 كمان
سألته النهارده ايه :
التالت : السبت
الاول : السبت
التلاته الفاضلين : هوه النهارده السبت
قلت اه
واحد منهم قال متهيألي النهارده الجمعه
قلت لأ
قمنا احنا التلاته و انضم واحد لينا من اللي مش عارفين التوقيت فهمته القصه و شرحتله التوقيت و فهمته ان النهارده السبت قالي فكره حلوه و في وسط الكلام ان النهارده السبت و بكره الأحد لقينا واحد منعرفوش سألنا هو بكره الاحد
قاله واحد مننا اه طبعا امال ايه و مشي و الله اعملم هيعمل ايه بالمعلومه اللي خدها مننا
حد فاهم حاجه ( انا متهيألي ان اخرتنا ان لازم حد مننا يتجنن اما انا او هما تفتكروا مين )