Monday, December 31, 2007

تاااااج

اخر بوست في السنه دي و كل سنه و انتو طيبين و اخترت اخليه التاج اللي اتمررلي من ايمي و كوكا احسن الواحد يخاف المدونه تتشمع او يتحط السيخ المحمي في صرصور ودنه فقولت اخدها من قاصرها و اجاوب على التااج

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
ده على حسب انهي شعب عربي المغاربه بيحبوا المصريين في جنسيات بتكره المصريين صعب اجاوب السؤال لأختلاف الاعراق العربيه و لأني مش عارف هتقمص مين

لوكنت أوروبي أو غير مسلم هتبقي إيه نظرتك للعرب والمسلمين؟
مجموعه همج ارهابيون يعيشون وسط الصحراء
يحبون القتل و الارهاب لأن دينهم يأمرهم بهذا

لوقالولك إنت بقيت رئيس جمهورية هتعمل إيه؟
سؤال صعب جدا و أطول سؤال في اجابته بس هحاول الاتختصار
اول شئ العدل لأن العدل يجلب الامان حكمت فعدلت فأمنت فنمت يا عمر
بالنسبه لحكم مصر اول قرار ممكن تتخذه تعديل الدستور بما يتيح العداله في الانتخابات و جعل الانتخاب حق لأي مواطن يتعدى سنه الاربعين و ليس قاصرا على الاحزاب فقط
اقتصاديا يجب تدخل حكومي في السوق اه في اقتصاد حر بس مفيش احتكار
بمعنى اي صناعه تجد الحكومه اسعارها احتكاريه يجب ان تتدخل في الصناعه و تنشئ شركه حكوميه هادفه للربح و المنافسه و تخفيض السعر للسعر المفروض انه يكون موجود مع انتاج سلعه منافسه في مواصفتها ووجود هدف الربح فيها و يجب التقنين من سياسه الخصخصه بخصخصه الشركات الخاسره فقط لتنافس اما الشركات اللي بتحقق ارباح ليه تتخصخص زي مثا ما اتخصخت بغرابه شديده شركه الهرام للمشروبات رغم انها كانت تحقق ارباح كبيره
بالنسبه لسياسه مصر الخارجيه محتاجه تدار بشكل اكثر قوه بلاش حاله الخنوع السياسي دي
التعليم محتاج اعداه ترتيب
المرتبات محتاجه اعاده تغير
البطاله حلها في دخول الحكومه في فتح الشركات زي ما قلت فوق و الاستثمار هخليها تعين مزيد من العماله و استيعاب المزيد من الخريجين صعب اجابه السؤال ده اوي اشبه بوضع برنامج انتخابي و انا عارف ان متكلمتش في الكتير بس حاولت اختصر قدر الامكان

لوسمح لك برؤية الرسول عليه الصلاة والسلام وإنك تقوله كلمة واحدة ؟
اسئله شفاعته لي يوم القيامه
لو كنا في عصر ازدهار الأندلس كنت تتخيل نفسك إزاي؟
لأ صعب اروح زمن مش زمني مدام شوفت التطور ده صعب اني اروح الماضي بس اشمعنى الاندلسي ليه ميكونش الخلفاء الراشدين او الاموي او العباسي
لو خطبت واحدة أو اتخطبتي لواحدوأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
عادي جدا ده لو خطبت اصلا او اتجوزت اصلا
لو طلعت القمر هتكتب عليه ايه؟
لو طلعت القمر هيكون معايا فلوس و لو معايا فلوس مش هصرفها في طلوع القمر هعمل ايه يعني فوق اصرف ملايين عشان اشوف شويه طوب
لو مررت التاج لحد وماجاوبش هتعمل ايه؟

مش هعمل حاجه المسامح كريم

تمرر التاج لمين

السؤال الصعب هكون دبلوماسي و لا امرره لحد
اقولك امرره لحد
يوميات عيل مصري
لمااااضة
عندليبيات

و كفايه كده اوي

7 comments:

Desert cat said...

كل سنة وانت طيب
طيب اجابات البوست هايله
بس حسيت بالتشاؤم فى اجابتك لو خطبت واحده وعرفت انها لا تنجب
تفاؤلوا الخير تجدوا
ربنا يحقق لك احلامك وتتجوز وتخلف كمان
happy new year

EmY said...

Happy New Year
كل سنه و انت طيب عام جديد سعيد
احسن انك جاوبت كنت بعمل تفتيش عليك و لسه هاجيب الشمع

فرنسا هانم said...

كل سنه وانت طيب
لا
ده انت باين عليك طيب فعلا
سيدى
الحكومه هتحارب الاحتكار ؟؟؟؟
اصلا الشركات المحتكره للسوق والمتسببه فى ارتفاع معظم الاسعار
اصحابها
محاسيب الحكومه
والعز يا وز
هو رأس المحتكرين فى السوق
وانت عارف مين العز ؟

غمض عينيك said...

اجابات تمام ياباشا

غمض عينيك said...

اجابات تمام ياباشا
كل سنة وانت طيب
وسنة سعيده عليك ان شاء الله

عاليا حليم said...

كل سنة وانت طيب يا صبحى ربنا يجعلها عليك سنة مباركة ان شاء الله
كالعادة و كما توقعت اجاباتك صريحة و منطقية و اكتر اجابة عجبتنى لو سألوك تبقى ريس

و لو انى ليا سبقة غير ظريفة مع التاج و انت عارفها لكن انا ما اقدرش ارفضلك طلب ارفض ازاى و انت افتكرتنى؟ ربنا يعنى عليه باه

تسمحلى باه بالمساحة الأعلانية دى؟
طب يا سيدى ألف شكر:)))))))))

----------------

صاحب البوابة http://elbawaba.blogspot.com/ يدعوكم لحضور حفل أفتتاح دار النشر الخاص به ، حلم شاب تحقق بأمكانيات بسيطة - تجربة تستحق التشجيع - فى انتظاركم غدا الحميس 10 \ 1 \ 2008 الساعة السادسة مساءا فى مكتبة البلد 31 ش محمد محمود أمام الجامعة الأمريكية

لماضة said...

ههههههه
طيب مش تقول انك باعتلى تاج
عموما انا جاوبت على التاج ده فعلا
:)
كل سنه وانت طيب

Google