Monday, February 25, 2008

انا متفـــــــــــــــــــــــــــائل ،،،،،تخيل ؟؟؟؟؟

الناس زهقت من تشائمي و احباطي
المره دي قررت ابص للنص المليان من الكبايه اه ده شويه في القعر بس اهو شويه مش بطالين مليانين
و ابعد عن النص الفاضي
هبص للحاجات الكويسه
و ابعد عن الحاجات الوحشه
يعني مثلا امبارح جم في الشارع و شالوا الرصيف و حطوه تاني في ساعتين
و بغض النظر عن السبب و ان القديم كان كويس
بس كفايه زمن الانجاز
ساعتين
زمن قياسي
بغض النظر عن اقاويل عن قرب زيارات متتاليه للمحافظ عشان دوري مش عارف ايه في المدارس بس المهم ان الحاجه اتعملت بسرعه
و كمان الرصيف اترصف ( اللي مكانش اترصف في زياره سوزان مبارك من فوق ال 10 سنين للفمراجعه راجع البوست ده
http://takhareef-masrya.blogspot.com/2007/11/blog-post_23.html)
و كمان اترصف في ساعه زمن مش دي حاجه تبصت اه هما سابو حتت مش ظاهره من الرصيف من غير سفلته بس برضه بصوا للجانب الكويس و النص المليان
و كمان اترصف النقر اللي في الشارع اينعم رقعوها و خلو المنظر شبه البنطلون المرقع بس بطلوا حقد و بصوا للجانب الكويس
و كمان ايه تخيلوا
لأ بجد مش هتصدقوا دي
بس حقيقي حصل
مش شركه النظافه اللي بندفع ليها 5 جنيه على فاتوره الكهرباء شوفتها
ايوه و الله شوفتها
لأ و كمان جم شالوا الزباله
لأ فعلا حصل صدقوني معلش مكانش معايا التليفون اصور اللحظه التاريخيه دي
اه هتقولولي قابلني لو شوفتهم بعد الزياره تاني
هقول انا هنا ببص للنص المليان و كويس اصلا اني شوفت الناس اللي بيلهفوا مني اد كده و انا مشوفتهمش اساسا
كل ده كان بتناغم رائع و حسيت اد ايه الحكومه بتسهر لساعه متأخره في خدمه الشعب

*****************************************

و انا مروح في مترو الانفاق قابلت جار في المترو
الراجل بص ليا بأستغراب هو المترو في حاجه النهارده
قلت معرفش انا ركبته متأخر الصبح
قالي اصله فاضي قوي
بصيت كده حواليا اه فعلا الواحد واقف مرتاح على خير العاده محدش دايس على الجزمه و لا حد كوعه في بطني قلت اه فعلا
يمكن في مترو كان قابله على طول
قال بس برضه ميبقاش فاضي كده
افتكرت خبر قريته انهم هيزودوة الرحلات بعد الساعه 3 فقلت ليه اتبسط قوي فحسين ان المترو اه بيتأخر
اه بيطلع عينك فيه بس اهو في يوم حسيت انه بقى احسن فحبيت انقل النص المليان منه

لو بصينا على النواحي التانيه انا شايف ان الحياه هتبقى جميله الفتره الجايه هيكون في مثلا وظائف جديده
اه اللي بيتخرجوا اكتر غير ان في مخزون بطاله سابق بس المهم في وظائف
كمان الحد الادنى للأجور هيزيد اه السلع هتزيد ضعفين ثلاثة بس المرتبات هتزيد و ده كفايه
قريب انتخابات المحليات و دي قمه الديموقراطية اه هتتزور بس برضه هبص للجانب الكويس و اقول كويس انها هتتعلم اساسا
الفلسطينيين قاعدين مع الاسرائليين اينعم في اجتياح و حصار و قابلوني لو اتحلت بس اهم قاعدين و ده الجانب المليان في الكبايه

اقولكم انتوا اتخنقتوا مني
انا هروح اشرب بقيت الميه اللي في الكبايه و اسيبها فاضيه احسن

10 comments:

Che The Hermit said...

فعلا لو سيبتها فاضيه احسن كتير

عصفور المدينة said...

اوعى تبيع الكوباية

حسن توفيق said...

العزيز
محمد
ولما تشرب شفته الميه فى الكوباية ابص انا على ايه بعد كدة
يا الله بالهنا والشفا
احنا اتعودنا نبص على ال3/4 الفاضى
فى انتظار تواصلك ولك كل الشكر
اخوك حسن توفيق من مؤسسى اتحاد المدونيين المصريين واتمنى ان تتواصل معنا ليرتفع الاتحاد ويصبح فى الربع المليان

عاليا حليم said...

حمد الله ع السلامة يا صبحى انت كنت مختفى فين ؟

يا صبحى ما تتاثرش بموضوع نص الكوباية ده فة الزمن ده لان فيه ناس ما معاهاش تمن الكوباية

و هى الحقيقة كده دايما بتضايق

آلام وآمال said...

يا عيني على التفاؤل

عاليا حليم said...

فى ايه يا محمد انت رحت تشرب بقية الكوباية و لا طفشت مننا ؟

تعالى طب الجفلة هدى اعصابك

----------------------

--------------------أذا كنت من عشاق الحاضر الغائب العندليب الأسمر تقبل دعوتى لحضور ( ليلة عبد الحليم حافظ ) حفل موسيقى على انغام العود يوم الأحد 30 مارس قاعة الحكمة بساقية الصاوى ( أسفل كوبرى 26 يوليو الزمالك ) أحياءا لذكرى رحيل فنان حفر بحنجرته حكاية شعب - سعر التذكرة 20 جنيه و للأعضاء 15-

رئـــــيسـة حزب الأحلام said...

السلام عليكم
نفسى الاقى النص المليان دة

rona said...

يعنى انت شايف كل الحجات الكويسه دى ومتشائم ليه كده بس ليه نظلم البلد والحكومه ديما
انت اصلا حولت تلاقى ميه فى الكوبايه

عاليا حليم said...

أنا عايزة أعرف أنت مختفى ليه .. خير ؟

Mohamed_sobhy84 said...

الف شكر للأستاذه علليا حليم اللي سألت كتير عليا و انا موجود بس مبقتش قادر اخش على المدونه اصلي بعدي عنكم اتفضحت مش عارف مين اللي طبع لأبويا الكلام اللي في المدونه و الراجل قعد يكلمني و معجب بيا و انا كنت بحب اتكلم لناسمش عارفاني انا بكتب لسه كتيييييييييييير بس مش قادر احط حاجه في المدونه الف شكر ليكي على سؤالك

Google