الأبجدية

مقدمة لابد منها

كتبت الابجديه منذ شهر و أرسلتها في المجموعات البريدية و لم اضعها في المدونه نقلها احد الاشخاص لموقع مع عدم ذكر المصدر مما احزنني بشده ارجو من اي احد يريد النقل ينقل و لكن مع عدم حذف اسمي

********************************

الفكره مش فكرتي و لا ابتدعتها هي فكره عجبتني نجيب محفوظ كتب روايه بطريقتها و هي حديث الصباح و المساء و كتب قصه احمد خالد توفيق بنفس الاسم عجبتني جدا هاخد الفكره و أكتب عنها بس هخلي الابجدية عندي عن اشخاص او اشياء لا تجدها الا في مصر ممكن تقراها من الاول من النص من الاخر لأني انا شخصيا كتبتها مره في النص و مره في الاول و مره في الاخر ممكن كتير يقول انك طولت اوي و كتير يقول ملهاش لازمه الطريقه دي بس اهو قلت اغير شويه طريقه الكتابه و الفكره زي ما قلت مقتبسة و في اخر الرساله هسيب لينك لقصه تحمل نفس الأسم و هو الابجديه بس الفرق انها قصه مرتبطه ببعضها اما انا فهي خواطر فقط


( أ )

أحمد عز : امين تنظيم الحزب الوطني الديموقراطي محتكر الحديد الاوحد
صعد الى النور فجأه بعد شرائه بطريقه مريبه شركة الدخيله لحديد التسليح و أصبح المحتكر الاوحد للسوق فهو من يحدد سعر الحديد شهريا بل ووصل في يوم من الايام الى انه قال انه يحاول فرض هامش ربح الموزعين حتى لا يفلت اسعار الحديد
طب حدد هامش سعرك الأول
اصبح حاليا الرجل القوي في الحزب بعد اشتراكه في تمويل الحمله الانتخابيه في الحزب
و اصحب هو المحرك الرئيسي

امين شرطه : شخصيه لن تجدها في اي دوله من دول العالم
تعليمه قليل
فاكر نفسه منصب و هو سلطاته قليله جدا
فارض سطوته على الميكروباصات و التاكسيات بس في الغالب بيحترم نفسه مع الملاكي مهو ميعرفش ده هيطلع ايه بس في برضه على كله بس ده في الغالب بيقع ساعات في ضباط بيمسحوا بيه الارض طبعا انا كتبت كتير عن امناء الشرطه بس دي نبذه صغيره عنهم

احمد رجب : كاتب من افضل من اقرألهم الادب الساخر ينتقد الحكومه و لكن بخطوط حمراء دائما لا يتخطاها و لكن يتميز بالنقد اللازع في سطرين يتعب بشده لصياغتهم بتلك الطريقه 99 % من قراء جريده الاخبار اول ما يفتحونه في الجريده هو نص كلمه




( ب )

بيروقراطية : في مصر بنتفنن في اجرائات غريبه عشان توصل للهدف
و الغريب ان الاجراء دي في اي حته حكوميه سواء هتاخد فلوس او هتدفع فلوس
اة هتقضي مصلحه
مره كنت في البنك المركزي واحد معاه توكيل من والد قاصر يعني الواصي عليه قفاله لأ مينفعش الواصي يعملك توكيل لازم هوه يجي ده كان موقف في البنك المركزي المصري و طبعا لو كتبنا مواقف البيروقراطيه هنكتب مجلدات و مش هقدر ابدع زي ما كتب احمد رجب في كنتابه كلام فارغ فصل الوزير جاي اللي حول لفيلم تلفزيوني يبين البيروقراتطيه اللي عايشين فيها و طبعا البيروقراطيه لما مسكت الحكومه قالت انها حكومه ذكيه و فاكر عملتلنا الحمام الذكي في الميادين ابو نص جنيه القرية الذكية اما الشئ الوحيد اللي غبي فهو احنا اللي مبوظين البلد و ناشرين البيروقراطية

بلهارسيا : مرض اتعب كثيرا المصريين ينتشر عن طريق مياه الترع و المصارف و بسبب كثره تعامل الفلاح في الترع من غسيل و سباحه و قضاء الحاجه فكان يسهم في استمرار دوره حيه المرض و انا عن نفسي وقعت في ترعه قبل كده و كمسأله وقائيه اخدت دواء البلهارسيا و طعمه وحش جدا ربنا يبعد المرض عن الجميع
بلال دياب: طالب فى رابعه اداب القاهره
صرخ بأعلى صوته مصر حزينه ياريس
شالوه مرابعه لحرس الجامعه
والله اعلم هو بايت فين
لانه برضه قال كلمة حق



( ت )

تفتيش : في عهد الحكومه الموقره انفردت بقانون يبيح تفتيش المواطن و حبسه و اعطت سلطات ضخمه لرجل الشرطه في قانون مكافحه الارهاب و ياما عانيت في اول شده الحيل لما قالو انهم يفتشوا اللي بيركبوا المترو بس طبعا زهقوا لأن اللي بيركب المترو يوميا 4 مليون مواطن نقول 2 مليون بشنط نقول نسبه التفتيش 30 % تقريبا من اللي بيركبوا يعني 600 الف يوميا مواطن كانو بيتفتشوا طبعا المجهود ده مقدروش عليه لأكتر من شهر و الحمد لله فضوا الشحنه على كلام فاضي

( ث )

ثروت اباظه :روائي مصري من عائله اباظه بالشرقيه اشتهر بالقصه القصيره و الاذاعية نال جائزه الدوله التقديرية عن روايه هارب من الايام توفي في مارس 2003

ثومه:ده دلع لسيدة الغناء العربى
والحمد لله انها ماتت قبل ما تشوف اللى بيحصل فى الاغانى حاليا
كانت ماتت فى اليوم الف مره


( ج )

جمال مبارك :هو ابن الرئيس و الرئيس القادم لمصر طفى الى السطح فجأه كنا مبنشوفوش في اي مشهد سياسي
دلوقتي بقى يتكلم في كل المناسبات تشوف الباشا و في اجتماعات الحزب مهو الباشا برده ليه مهو شاب و ليه حق يمارس حياته السياسية مش عشان انه ابن الرئيس حاشا لله ده بس واحد بيمارس حياته السياسية
و مش عشان هو ابن الرئيس وصل للمنصب ده بل لو كل الشباب جاهدوا كلهم هيوصلوا لكده و اكتر و هتكون مصرنا افضل بلد

( ح )

حسني مبارك : محطه مترو انفاق مش عارف اتسمت على اسم مين
مع ان الميدان اللي فيه المحطه اسمه ميدان رمسيس المهم المحطه تشهد تلاقي خط مترو المرج و شبرا و للأسف لن يتلاقى فيها الخط الثالث عشان هيتلاقى في جمال عبد الناصر و العتبه
تعاني المحطه حاليا من الفئران و سوء التهوية ربنا يكون في عون الفئران اللي فيها

حصانه : هي خير اللهم ما اجعلوا خير حاجه كده تخليك تضرب اي حد على قفاه من غير ما يقولك تلت التلاته كام

( خ )

خصخصة : مصطلح معناه بيع البلد بالقطعه و بالقطعه دي مهمه عشان مينهرش سعر البلد و غالبا ما يكون البيع ده بتراب الفلوس و نفتخر بأننا بعناها بأبر من قيمتها السوقيه زي مثلا الحديد
و البيع ليه طرق كمزايادات و عروض اسعار و البيع في البورصه و حاجات كتير و البيع مش شرط للمصريين ده يا حبذا لو كان اجنبي عشان يتقال اننا بنشجع الاستثمار

( د )

دولار : سبب قرف الناس في مصر زمان كانت الاسعار بتزيد نسأل ليه يقولك مش شايف الدولار وص لسبعه جنيه ليه مش شايف الدولار بسبعه و نص و نزل الدولار و الاسعار زي ما هي نزل كمالن و الاسعار برضه بتزيد العيب مش في الدولار العمتين بيهبط تمنهم بس الدولاار بيهبط اكتر حبه و كلها ايام تنزل العمله الب 500 جنيه عشان تناسب الاسعار الجديده


( ذ )
ذل : فكرت كتير هل الذل ده في مصر بس او مقترن بأسم مصر بس فعلا صديق اقنعني قالي كلمه بسيطه اقنعتني قال بالنسبالي اه انا حسيت قوي بيها
لما تقعد في المواصلات ساعات كل يوم لما محدش يحترم المواعيد لما يحصل ان الاتوبيس يطلع بعد معاده بساعتين لما سواق الاتوبيس ممكن يركن يشرب الشاي و انت بتمكوت جوه عادي لما المترو يعطل من غير اي اعتذار و لا حد يقولك ايه العطل و يقف ساعه في المحطه من غير ما مسئول في المحطه يكلف خاتطره و يقول هيتصلح و لا لأ و مده العطل تبقى في ذل و تبقى في مصر


( ر )

رفعت الجمال او رأفت الهجان :من اشهر الجواسيس المصريين الذين تمت زراعتهم في اسرائيل امد المخابرات المصرية بسيل مكن المعلومات سواء قبل نكسه 67 او ساهمت في نصر 73 بقي حتى وفاته جاسوس مصري على اسرائيل نشرت المخابرات قصته و ظهرت على الشاشه الفضيه في مسلسل يحمل اسم رأفت الهجان

رغيف عيش : عيش من المعيشه و هو سر حياه اي مصري هو الرغيف زو الخمسه قروش
اختفى الرغيف كثيرا و سائت حالته و انتشرت الارغفه بالسبارس و المسامير و رغم ذلك بقي الرغيف سر حياه المصريين
و في الاونه الاخيره حدثت ازمه رهيبه للخبز بسبب السوق السوداء و رغبه الحكومه في زياده سعره و اشاعه ذلك فجائت ثوره غير مسبوقة مما دعى الحكومه للتأكيد على استمرار الخبز بسعرة و خرج الرغيف سالما من تلك الأزمه


( ز )

زكريا عزمي : نائب دائرتي رأيته المره الاولى الانتخابات قبل قبل الماضيه رايح الجامع في معادي الصبح لقيت عربيات و بوكسات نزل منها ناس كتير كان ده زكريا عزمي و دخل معانا الجامع و بعد صلاه الجمعه طلع على المنبر خطب و بعدين راح في جوله انتخابيه اما اللي قبل اللي فاتت مجاش اما اللي فاتت جه قعد ربع ساعه لم طلبات الناس و قال كلمتين و مشي و كانت ليه اغنيه مشهوره عندنا في الدايره زكريا عزمي يا زكريا عزمي بقولها بكل ما في عزمي و كانت اتعبت في شريط كاسيت

زيزو النتن : في مصر بس تلاقي اسماء محلات الاكل غريبه و مش غريبه بس لأ تقرف
يعني انا في زيزو النتن ده كنت باكل و انا قرفان طب ايه اللي جابرك يا صبحي اصحابي عاوزين ياكلوا عند زيزو و طبعا في ناس كتير غير زيزو في عبده تلوث و في هوهو بتاع الكباب اللي ب 20 جنيه

( س )

سمير رجب : صحفي رغم كبر سنه الا انني لم اكتشفه الا مؤخرا في جريده 24 ساعه و مش عارف هل يقرب لسمير رجبل بتاع الجمهورية و لا لأ بس اكيد لو يقربله اكيد مختلف عنه تماما لأن بتاع 24 ساعه ده بينتقد النظام و الجريده شبه وسط بين الصحف الحكوميه و المعارضه

سبوبه : كلمه تعني لقمه عيش في مصر او شغلانه كويسه و المكسب من ورائها هو السبوبه الكويسه منها و لو ضاع المكسب تكون ضاعت السبوبه


( ش )

شوبير : تفتحج الجرنال تلاقيه تفتح القناه الثانية تلاقيه بيزيع الماتش تحول على الساعه تلاقيه بيحلل تقول تسيبك من الرياضه تلاقيه في صفحه السياسة في مجلس الشعب تنزل الشارع تلاقي الناس بتتكلم عن حلقته امبارح تلاقيه صحفي مقدم برامج مذيع ماتشات عضو مجلس شعب نائب رئيس اتحاد الكره
ربنا يقويك بس ارجوك بلاش تطلعلي في الحلم كمان

الشفافية : مصطلح مسمعتوش الا في مصر و الاقي دايما من شروط المناصب العليا حد يفهمني المقصود اني البس شفاف و لا ايه ؟

( ص )

صنع الله ابراهيم : انقل عده سطور من مقاله لتعريف صنع الله ابراهيم
في أكتوبر/تشرين الأول 2003 إعتلى صنع الله إبراهيم خشبة دار الأوبرا المصرية في القاهرة. لم يغني، ولم يقدم عرضا مسرحيا بالمعنى المباشر للكلمة. يومها أراد وزير الثقافة المصري، في نهاية حفل إختتام ملتقى الرواية العربية، منحه جائزة الرواية العربية، البالغ قيمتها مائة الف جنيه مصري (قرابة ثلاثة عشر الف يورو).بعد تصفيق الحضور الحار، الذي ضم أكثر من ثلاثمائة كاتب وكاتبة من كل الدول العربية، صعد إلى خشبة المسرح وكأنه يريد إستلام الجائزة -التي كان قد أصبح معروفا قبل يومين من الإعلان عنها، أنه حازها- وألقى كلمة إستغرقت دقائق معدودات. رفض فيها الجائزة، وعلل أسباب هذا الرفض بالإحتجاج على الأوضاع السياسية اللاديمقراطية في مصر وطالب الحاضرين بالتحرك معبرا أنه أمر غير مقبول

ولد عام 1937 سجن عده مرات في حكم عبد الناصر اول رواياته كانت تلك الرائحه التي صدرت و صودرت عام 1966 و لم تنشر كامله الا عام 1986 يعتبر من الرواه القليلون الذين يكتبون حتى الان و لكنه يتميز بقله كتاباته له روايت عديده اشهرها شرف و ذات و نجمه اغسطس و احدث رواياته امريكانلي

( ض )

ضريبه المبيعات : ادخلها الرزاز و طورها مدحت حسنين و هي فرده من الدوله على كل قزازه كازوزه على رأي عادل امام
و تتراوح نسبها من 2 تقريبا حتى 20 % و السعر الاكثر شيوعا 10 % و في الحديد مثلا 5 % و الاتصالات 15 %

( ط )

طيور الظلام : فيلم مصري لعادل امام من افضل ما قدم عادل امام في السينما بيتحدث فيه عن فئه موجوده فعلا بيتحدث عن الفساد في الحكم عن التتر من كل واحد على تيار للوصول للثروه و المال و السلطه محاميان بدأ سويا ووصل كل واحد منهم للثلاثه السابقين في طريق و انتهوا لنفس الطريق و سيخرجون معا كما ترمز الكره في نهاية الفيلم

( ظ )

ظاظا رئيس جمهورية : هو فيلم كومدي لم اراه و لكن يكفيني اسمه اللي يظهر اسوء مسلسل رأـيته في حياتي و هو مسلسل انتخابات الرئاسه المصريه التي ظهر فيها ممثلون ادو ادوارهم ببراعه زي واحد خد المليون بتاع الدعياه و معملش لنفسه حاجه وواحد عاوز يلبس طربوش و يلبسنا معاه يلا ربنا ما يرجعها

( ع )

عمرو خالد : أكثر داعيه كان عليه الجدل كتير حبوه و كتير كرهوه و كتير مش نازل ليهم من زور و انا منهم
غير من حياه ناس كتير و ده شئ بحترمه جدا عمل حمله مش عارف اقيمها لأن التقيم مش بالملصقات بالنتائج و انا معرفش نتائجها و هي حمله حماية للعلاج من الادمان بس من وجهه نظري مفيش داعية بيدعوا لدين نزل كتابه باللغه العربيه يتحدث العامية بالأضافه الى ضعفة العلمي بالمقارنه بالعلماء الاخرين و لكن لدية حاسة اعلامية جيده

علاء مبارك : المختفي حاليا اعلاميا و لكن قديما كان يقال انه شريك لتلات تربع البلد في كل المشاريع بنسبه ثابته و رمز له في فيلم عمارة يعقوبيان او الروايه بالراجل الكبير

حاله استثنائيه للحرف ده اني اكتب الثالث و كتنبته كنوع من التذكر لرجل تجاهل الاعلام حادث وفاته
عبد اللطيف ابو هيف : سباح القرن العشرين بإختيار الاتحاد الدولي للسباحه المسافات الطويله تقديرا لأنجازاته في السباحه فاز بأكثر من 20 سباق دوليا قام بعبور المانش ثلاثة مرات توفي اليوم 21/4 بعد رحله من المرض بعد دخوله مستشفى المعادي منذ اكتوبر الماضي و بعد اجراء 5 عمليات جراحيه عن عمر يناهز ال 79 عام رحم الله عبد اللطيف ابو هيف

( غ )

غلبان : الغلبان موجود في كل بلد فدي مش خاصه بمصر بس مصر الغلبان بيظهر بصوره تانيه لأن في اي حته في نسبه غلبانين اما في مصر كل الشعب غلبان حتى الوزراء لما يتكلموا الواحد بيبقى هيطلع عشره جنيه في اليديهم من الغلب

( ف )
فول صويا :عمل مشكله كبيره جدا فقط في مصر كادت ان تتسبب 30 جرامات فول صويه ان تتسبب في الحجز على شركه نقل بسبب نقص في الشحنه 30جرامات ادت لعمل غرامه 6 جنيهات و الشركه طلعت حراميه كلت على الدوله 6 جنيه لمده كام سنه فكاد ان يحجز عليها
طبعا احنا ماشيين بنظريه انك تضرب اللي عليه 6 جنيه يخاف اللي عليه مليارات فيهرب بالفلوس بره

فصال : في مصر فقط يجب ان يضيف التاجر على هامش ربحه قيمه الفصال المتوقع و اهو لما الزبون يفاصل ميخسرش و لو مفاصلش يبقى خير و بركة يعني على سبيل المثال في اشاره سبحه ملهاش حل يا بيه معدن و ميت فل بكام ب 15
15 مين يا عم دي متكملش نص جنيه
نص جنيه ايه يا بيه 5 جنيه
هو نص جنيه
خليها جنيه طيب يا بيه
خلاص ادي الجنيه
بلاش دي
جلده للدريكسيون
بكام جلد يا باشا طبيعي ب 50 جنيه
50 جنيه ايه يا عم هو انا بيه
عاوز تدفع كام 5 جنيه
طب خليها 6
هما 5
ماشي يا بيه و يركبهالك كمان و في غيرك يشتريها ب 40 و يبقى مبسوط لأنه نزل 10 جنيه

فتوى : في مصر بنحب الفتوى يعني سلام عليكم يا رجاله متعرفش شارع ..... فين ؟ اه خش كذا و لف من كذا هتلاقيه في وشك
بعد كام خطوه تسأل لأ مين قالك تمشي كده انت تخش من هنا لهنا لهنا و ممكن لو مقابلتش واحد عرقه مش مصري اوي ممكن توصل اما اللي فيه العرق المصري 100 % عمره ما هيقول مش عارف

( ق )

قله مندسة : اي حادث في مصر يقولوا السبب فيه القله المندسة اي مظاهره السبب القله المندسة الملاحظ انها كانت قديما تعمل في الخفاء اما الان فعملوا جروب كبير في الفيس بوك مش عارف ده تمهيد لعمل حزب سياسي و لا ايه بس اللي شايفه انهم غلطوا لأنهم جمعوا البيض في سله واحده دلوقتي اي مظاهره تحصل يروحوا يلموا القله المندسة من الفيس بوك

( ك )

كشري : أكله مصريه فيها حاجات كتير على بعض و يمكن الحاجات الكتير دي اللي تخلي شبه وجبه كامله القيمه العذائيه ففيها نسبه من كل شئ كانت قديما وجبه رخيص كان ممكن تجيب كيس كشري بنص دلوقتي لازم عشان تاكلها ب 3 جنيه


كفايه:ناس وحركه ويفط وشعارات
كلها بتقول كفايه لحد كده
كفايه ذل ومهانه وظلم
كفايه انحرافات وسرقه ونهب
كفايه علينا فقر وجوع وغلب



( ل )

لا تطفئ الشمس :في حروف رخمه من ضمنها اللام و على العموم في روايه لأحسان عبد القدوس اول مره قريتها قلت انا بطل الروايه دي انا احمد اللي في الروايه دي بأختصار ملقتش حاجه بحرف اللام قلت احط الروايه دي و التي اتعملت فيلم ادرج ضمن افضل 150 فيلم مصري

( م )

محمد حسني مبارك : دي اسم محطه سوري قصدي رئيس مصر اللي يحكمنا منذ 1981 اطال الله عمره لغاايه ما ابيع الاسهم في البورصه مش ناقصين انهيار انجازاته لا تعد و لا تحصى و اتحدى حد يعرف يعد مثلا المنشأت التي تحمل اسمه رغم ان ده مش انجازاته الوحيده مش لاقي كلام اتكلمه عنه خصوصا ان مهما عملت صعب ان صعلوك زيي يقيم واحد بمقامه


( ن )

نجيب ساويرس : من 10 سنوات هل كنت تعلم اين سويرس او من سويرس قبل موبينيل هل كنت تسمع عن اوراسكوم
لا انكر انه رجل اعمال ناجح جدا و لكن كل ده فجأه على العموم يكفي انه فاتح بيوت كتير جدا بشركاته بس انا عن نفسي قرفان جدا من قناتك برغم اني بتابع برنامج البورصه اليوم فيها بس ليه بتحاول تقضي على اللغه العربيه في قناتك ليه اللغه العامية شوف و بعد الظهر و بالليل مش عارف

نجيب محفوظ :كاتب و روائي مصري اول مصري يفوز بنوبل للأدب عن مجمل اعماله الأدبية ابرز اعماله بداية و نهاية و الثلاثية و اولاد حارتنا التي منعت فترات طويله من النشر في مصر و لكن تم نشرها بعد وفاته و من وجهه نظري ان لم يأتي اديب يملئ الفراغ الذي تركه نجيب محفوظ في الادب العربي

نفق الازهر : عمرك شوفت نفق يتفتح الصبح و يتقفل بالليل مش عارف ليه بصراحه استرخصو في تهويه النفق ده مراوح بتسلم لبعض خلاص مش قادرين يعملو تكييف مركزي صغنون


( ه )

هرم : عندما تذكر مصر في اي دوله غربيه يكون المرادف الهرم و الصحراء و الجمال
فصوره الاهرامات هي جزء كبير من صوره مصر في الغرب و لو تحدثت عن الهرم الاكبر و المعجزات التي داخله هنرغي كتير و الموضوع مش ناقص لأنه هينفجر فكفايه كده

( و )

وليمه أعشاب البحر : روايه كتبها كاتب سوري يدعى حيدر و قامت بسببها ضجه كما بعدها ضجه و قيل انها تسئ للأسلام و كيف تضبعها وزاره الثقافه و كيف و لماذا و منعت في مصر و لكن و الحق يقال لم اقرأها و هي منتشره في مواقع الانترنت على اساس ان الممنوع مرغوب

( ي )

ياه انت وصلت للياء انا احييك على طوله بالك بس بصراحه لو وصلت هنا و مسبتش رد بجد هزعل اوي
لأني بكتب الكلام ده بقالي ايام كثيره و انا في كل حته بفكر في الحروف الناقصه و ازود و لو كتبت الى ان اموت مش هخلص في كل حرف الى مالا نهاية طب فين حرف الياء هقوله اهو

يوسف عليه السلام : عندما ذكر السجن في القران للأسف ذكر في مصر و للأسف كان المسجون هو احد الانبياء قصه سطرها القران في سوره تحمل اسمة و دائما يوجعني ان ذكر السجن الوحيد كان في مصر لأن حتى الان امريكا ممكن تبعت الناس عندنا نسجنهم و نطلع منهم معلومات

خلصت ابجديتي بس انا قلت هحط لينك للأبجديه اللي خدت الفكره منها و الاسم و اللينك اهو


http://www.mediafire.com/?gaxycdl30xb
باسورد الفتح
www.dvd4arab.com