تسريح موظفي الحكومه

الكلام المتداول ان  مينفعش كدافعي ضرائب ندفع مرتبات لموظفي حكومه بقيمه 220 مليار و هم عاله و تسريحهم هيكون مفيد للأقتصاد

حاولت ارد على الجمله البسيطه دي بجمله بسيط بس صعب لأنها بتتكلم على كذا فكره و عشان متلخبطش هعمل زي ما نصحنا استاذ العربي في ابتدائي اكتب افكار الاول قبل ما تكتب موضوع التعبير .

الأفكار

1- تأثير الخفض على مؤشرات الاقتصاد

2- هل يوجد تحليل مالي لمرتبات الموظفين و التفاوت بينهم في الوزارات المختلفه

3-هل الحكومه التي تشتكي من عدد موظفي الحكومه و تريد تسريحهم توقفت عن قبول تعيينات جديده 2015-2016

4- هل كل الجهات الحكوميه تعاني تخمه في الموظفين

5-فوائد القروض 292 مليار جنيه

اهم مؤشرات الاقتصاد في اي دوله النمو البطاله سعر الفائده التضخم دي بتقدر تقييم بيها الاقتصاد هل الاستغناء عن موظفي الحكومه هيأثر على اي مؤشر اقتصادي ؟

اسباب تخفيض الموظفين اللي بيتساق ليها انها تخمه على الموازنه لو وفرت اي نسبه منها هيتم تقليل النفقات و بالتالي عجز الموازنه هيتم استخدام اموال دافعي الضرائب في تحسين الخدمات من طرق و بنيه اساسيه  بس هل الاقتصاد بينظر ليه بالمنظور الضيق ده انت حسب تصريحك عاوز تقلل الموظفين لمليون يعني تستغنى عن 5 مليون احصائيات الدوله ان اجمالي العاملين في مصر 29 مليون مواطن و البطاله 12.8% لو استغنيت عن نص العاملين 3 مليون مش 5 مليون اللي الناس بتسوق انها مفروض تستغنى عنها يعني هزود البطاله بنسبه اكبر من 10 % يعني ممكن معدل البطاله يوصل ل 25 % تقريبا سوق العمل هيكون فيه تخمه و مؤشر سلبي جدا للأقتصاد ككل و نتيجه لوفره المعروض متوسط المرتبات هيقل جدا مش معقول متاح للتوظيف اضعاف الاعداد المتاحه و تفضل الاجور زي ما هي لأنها عرض و طلب زي الدولار زي اي سلعه يعني ايوه يا استاذ يالي بتدعو لتسريح الحكومه مرتبك هيقل لأن اللي هيتسرحو هيكونو متاحين في السوق و ارخص منك بالأضافه اصلا ان في شركات في القطاع الخاص بعد رفع سعر الأسعار بشكل رهيب و سعر الفائده بشكل غير طبيعي هتعيد النظر في استثمارتها اما تقفل خالص او تقلل موظفين و خاصه الشركات المرتبطه بعقود ثابته الاسعار ( المقاولات – التوريدات ) للأجهزه الحكوميه و لشركات القطاع الخاص الكبرى و لأن برضه مش كل موظفي الحكومه قليلي المهاره زي ما بيتم الترويج لأ في ناس بتاخد كورسات زيك و معاها cma  و cba  و ماجيستير و دكتوراه بالأضافه لخبره تخليه منافس جيد جدا ليك في اي وظيفه فتقليل مرتبات القطاع الخاص هيحصل هيحصل لو الحكومه سرحت موظفين لوفره المعروض زي اي حاجه في الاقتصاد عرض و طلب .

طبعا تخفيض المرتبات و زياده البطاله هيتسبب في انخفاض الاستهلاك اللي هتأدي بدورها لتخفيض الانتاج ( لو الشركه او المصنع ملهوش سوق خارج مصر ) و طبعا ده يؤدي لمزيد من البطاله و ارتفاع الاسعار و الركود و الكلام اللي كل الناس الاقتصاديين عارفينه كويس و بيتقال عليه ركود تضخمي .

الخلاصه انه اقتصاديا ليه عواقب مش بس عواقب سياسيه زي ما بيتم الترويج

تاني حاجه ما تفاصيل موظفي الحكومه ال 6 مليون اللي عاوز تخفضهم هل تشمل مثلا وزاره الداخليه اللي عدد افرادها مش قليل و المرتبات تختلف تماما  مثلا عن موظف في الاثار او التعليم  هل تشمل العدل اللي فيها اعلى معدلات مرتبات في موظفي الدوله مرتبات القضاه هل تشمل موظفي وزاره البترول اللي بياخدو اكثر من غيرهم انت في الدوله ممكن شخص محاسب مثلا على سبيل المثال في كل الجهات السابق ذكرها يقوم بنفس الوظيفه بتفاوت هائل في الاجر ( بالمناسبه انا متكلمتش عن شركات البترول انا اتكلمت عن الوزاره اللي ملهاش عائد زيها زي اي وزاره تانيه ) .

الحكومه في عام 2015 و عام 2016 فيه مئات الاعلانات عن طلب موظفين في كل المجالات و في اكتر من وزاره هل ده ميعتبرش تناقض في حديث الحكومه عن وجود تخمه في الجهاز الاداري و لسه بتعمل اعلانات للوظائف عام 2016 يعني الحكومه بتشتكي من زياده العماله في الحكومه و مش قادره تعمل اعاده هيكله و تنقل ناس من حتت فيها فائض لأماكن فيها عجز و بتستسهل عمل اعلانات توظيف جديده و ده ينقلني للنقطه التاليه هل فعلا الحكومه فيها تخمه انا اتعاملت مع اماكن حكوميه كتير اكتر الاماكن اللي فيها تخمه اللي شوفتها السكه الحديد و مترو الانفاق في الادارات بتاعته طبعا و في اماكن تعاني من عجز شديد التأمينات فيها عجز غير عادي في مكاتب كتير رغم انها من اكتر الجهات اللي بتحصل فلوس في الحكومه و الضرائب اماكن و اماكن .

بالأضافه ان تعيين الكم ده من الناس هو مسئوليه الحكومه مش مسئوليه المتقدمين للوظائف و يجب ان يكون هناك اسباب واضحه للتخلي عن هذا الكم من الموظفين تعسفيا لأن مش خطأ الموظفين ان الحكومه طلبت وظائف لمده سنوات طويله بدون ما تكون محتاجه ده مش مسئوليه الناس و خصوصا ان في فئات في اعمار لا تسمح لهم بالبدأ في العمل بالقطاع الخاص حاليا يعني الحكومه تعين ناس بدون الحاجه ليهم و تعطل تطورهم و في سن مستحيل يتعلم جديد طبعا الجزء ده عاطفي نوعا ما بس هو اقتصاديا يضر جدا بزياده نسبه البطاله خاصه ان دي اخطاء قامت بها الحكومه الحاليه و الحكومات السابقه و تحمل العاملين و الشعب مسئوليتها .

اخيرا لو مسكت الموازنه العامه هتلاقيها فيها بند خدمه و فوائد قروض 290 مليار اكتر من اجمالي مرتبات موظفي الحكومه بنسبه تصل ل 30% و الفوائد دي سببها الرئيسي الدفاع عن قيمه العمله و سوء اداره الاحتياطي المستمر منذ 5 سنوات تتحملها الحكومات السابقه و جزء كبير تتحمله الحكومه الحاليه يبقى الموضوع ببساطه مسئوليه الحكومه

أأق

يعني ببساطه الناس متسخنش على اي قرار اقتصادي يبان من بعيد انه كويس و رائع جدا لأن نتائجه هتطول الجميع انا شخصيا لا اضمن استمرار الشركه التي اعمل بها بسبب ارتفاع اسعار الخامات و ارتباطنا بعقود طويله بأسعار قديمه و وجود بديل رائع لصاحب الشركه و هو شهادات استثمار بعائد 16-20 % بعيدا عن مشاكل الضرائب اللي مش بتخلص و يكفي ان اقول ان في عقد بننفذ فيه في الشركه اسعاره موضوعه عام 2011 و لم يتم صرف اي علاوه لهذا العقد .