Sunday, October 21, 2007

تااااااااااااااااااااااااااااااااااااااااااج

بدون مقدمات ممله تاج مررهولي تشي و أعتزر ليه على التأخير في الرد لأنشغالي الكام يوم اللي فاتوا دول المهم نخش في التاج
امتى قلت لنفسك يا ارض انشقى وابلعينى ؟؟
انا كل يوم بقولها اوقات كتير جدا بس في لاموقف من عده سنوات ده اكتر موقف مكنتش قادر اواجه حد في الشارع و لولا ان في صديق اتكلم معايا فيه امبارح كنوع من ذكريات الماضي ما تذكرته و احمد الله على نعمه التناسي او النسيان ايه بقى الموقف اعفوني من الاجابه عليه بس كمجمل خناقه بين اتنين على حاجه و لما اتطورت اوي و الموضوع وصل للأهل و هيتفضحوا راحوا قالو يدخلوا واسطه في الموضوع بحيث ان الغلطه تبقى خفيفه عليهم اوي بدل ما يتفضحوا و كنت انا الشخص المختار و كان منظري وحش قدام ناس كتير اوي خصوصا قدام اهاليهم هما الاتنين ما علينا انا سايب الموضوع عايم عشان انا مش حابب احكيه
مين هو مثلك الاعلى ؟؟

هو لازم يكون ليا مثل اعلى ؟؟؟؟
ليه اقتل الطموح بحد هو المثل الاعلى و ممكن اكون انا مثل اعلى في قال الرسول صلى الله عليه وسلم بس الرسول انا لا اعتبره بشر لأن كلامه كله وحي و ما ينطق عن الهوى ان هوا الا وحي يوحى

هل انت راضي عن نفسك و عن حياتك و عن شغلك ( أو دراستك )؟؟

مش راضي عن نفسي
و لا حياتي مش عارف انا صح و لا لأ
و لا شغلي مش عارف هوصل لأيه فيه
و لا دراستي لأني مش حاسس ان ليها هدف
و بناء على كل ما سبق انا مش سعيد لأن السعاده زي ما قلت في التاج السابق في الرضا

ايه هو احسن مسلسل كرتونى بتحبه ؟؟

توم و جيري - بطوط - و في فيلم بحبه شركه المرعبين المحدوده
ايه هو احلى خبر سمعته وايه أسوء خبر ؟؟

احلى خبر ياه هو مفيش اخبار حلوه و لا ايه بصراحه هسيبه للأخر لأن ممكن اقول مواقف كويسه اما خبر مش لاقي
اسؤ خبر وفاه صديق لي بعد والده بأسبوعين
عوده بعد نهايه التاج الخبر الكويس استقاله وزاره دكتور عاطف ( وممكن يكون ساعتها الخبر الكويس قدوم دكتور احمد نظيف او عدم استقاله أعوذ بالله من الشيطان الرجيم "اصل اسمه بيوقع العمارات ")

بتحب السفر؟؟ ليه ؟؟

لأ خالص اكتر حته بحبها البيت عشان في كومبيوتر و نت و انا مبحبش اقعد في نت كافيه
أيه أكبر مشكلة قابلتك فى حياتك وازاى اتصرفت فيها ؟؟

لا احب تذكرها ساعتين في زنزانه ربنا يسامح اللي كان السبب و خرجت بدون اي تلفون او اي شئ هي كانت قرصه ودن بس
يا ترى أحسن صدفه حصلت في حياتك ؟؟

مفيش شئ صدف فحتى لو هي بالنسبه ليا صدفه فهي بتكون تخطيط الهي و ليس من قبيل الصدفة
اية هى الامنية اللى نفسك تحققها ؟؟

انتي اكون نفسي و لا اقولكم بلاش اكون نفسي مفيش احلى من راحه البال اللي اتمناها

بتثق فى اصحابك قد اية ؟؟
اصحاب و لا اصدقاء مش عارف ليه بفرق بين الكلمتين دول انا شايف ان اسمى درجات المعرفه هي الصداقة ازاي مأثقش فيه
خانك صديق قبل كده ؟؟

الصديق بمعنى الصديق لأ
عملت معاة اية ؟؟

مهو محدش خان
كرهت حد كنت تعرفه قبل كده ؟؟

تعرفه دي تقال ممكن على البقال تحت البيت او لشخص انا مجرد اعرف اسمه و ده يزود المجال البحث جدا فأعتقد اه لأني برغم اني نادر اني اكره حد بس اكيد لو كرهت حد هكون اعرفة

موقف عملته و حسيت أنك ندل فيه ؟؟

مش فاكر بصراحة خالص

ايه أكتر يوم بتحبه فى أيام الاسبوع ؟؟ وليه ؟؟

الخميس ليه عشان الويك ايند أخيرا هناااااااااااااااااااااااااااااااااااااااااااااااااااااااااااااااااام

ايه أكتر حاجه بتعجبك فى شخصيتك ؟؟ وايه اكتر حاجه بتكرهها ؟؟

مينفعش يعجبني حاجه فيا انتي اللي يعجبكم انا صعب شويتين يعجبني بكره خوفي

ايه اكتر شعب بيعجبك ؟؟ واكتر شعب مش بيعجبك ؟؟

مفيش و لا ده و لا ده لأن عشان يعجبني شعب لازم اعاشره و عشان كده ممكن احط في الاجابتين مصر لأني معاشرتش الا شعبها

اكترحاجة بتحبها فى حياتك عامة ؟؟

اصدقائي

واكتر حاجة بتكرها ؟؟

الكذب
وايه المكان اللى بتحب تروحه على طول لما تكون زهقان؟؟

الكومبيوتر

ايه هى رياضتك المفضلة؟؟

كره القدم بحبها جدا بس خلاص مفيش صحه لرياضه

أيه هي نظرتك للدنيا؟؟

تشاؤمية عشان ميجليش احباط من الاخبار الحلوه

أيه أكتر اغنية بتحبها وبتهديها لمين ؟؟

حبيتي يا مصر و بهديها لبلدي
و اي اغنيه لسعاد ميسي و بهديها لواحد عارف نفسة

التاج دا هتمرره لمين " وش شيطان بيضحك " !!!؟؟

مش هكون ديبلوماسي المره دي
لوحدانيه اللي شجعتني اعمل المدونه دي
لمش قادره اللي بعتتلي اول تاج
و لزمالكاوي عارف نفسه بيجي هنا

18 comments:

عليوه said...

انا ما لحقتش اقرا مدونتك بس شكلها هايله على العموم التاج خلص يا معلم تاع مستر جمال لوتحب ميتنيك تشوف مشاركتك ولو تحب ننشر التاج عندك اوك

simple girl.. ..simple dream said...

عجبنى ردك اوى عن سؤال السعادة
وانك مش راضى عن شغلك وعن دراستك
دة حالنا كلنا

وانا كمان زيك
بدور على نفسى

Che The Hermit said...

أخيرا جديد بقالك كتير قوى يا مان مفيش جديد
اجاباتك جامد ولو انك عملت نفسك مش شايف شوية اسئلة فى النص

صحيح كويس ان نفسيتك بقت كويسه " أصلك مش هتكتب ونفسيتك وحشة :) "

تحياتى ..،
تشي

http://kasperb4.blogspot.com/ said...

ايه يا محمد بس اللي بتقوله ده
معلش انا لفت نظري اوي كلمتك لما بتقول ان سيدنا محمد مش بتعتبره بشر
!!!
يا راجل بقى ده اسمه كلام

" قُلْ إِنَّمَا أَنَا بَشَرٌ مِّثْلُكُمْ يُوحَى إِلَيَّ أَنَّمَا إِلَهُكُمْ إِلَهٌ وَاحِدٌ فَاسْتَقِيمُوا إِلَيْهِ وَاسْتَغْفِرُوهُ وَوَيْلٌ لِّلْمُشْرِكِينَ"

ياريت تعدل الكمة لأني متأكد إنك مش تقصد المعنى ده

وبجد بقية إجاباتك جميلة جداا وتدل على انك شخص واضح وأهدافك محددة

ربنا يوفقك

Unknown said...

هرد بدون ترتيب رد سريع كده عشان عدم الفهم الخاطئ
هو مش بشر في أخلاقة و لن يصل اي بشري الى اخلاق محمد صلى الله عليه وسلم انا لم اقل انه ملاك او اله انا اقول ان اخلاقه ليست اخلاق بشر اما هو بشر يأكل الطعام و يمشي في الاسواق و مجرد رسول له أجل ( و ما محمد الا رسول قد خلت من قبله الرسل افإن مات او قتل أنقلبتم على اعقابكم و من ينقلب على عقبيه فلن يضر الله شيئا و سيجزي الله الشاكرين )

Hadota ... حدوتة said...

ياسيدى مبروك التاج
وكل تاج وانت طيب
بس انا لاحظت حاجة
كل الامور بتجاوب عليها بابهام
وساعات تول مش هقولكم
لدرجة انى عمالة اقرى اقرى عشان الاقى اجابة محددة
قليل جدا
زى كرهك للكدب
وحبك للكمبيوتر

بس دا ميمنعش ان اسلوبك حلو خلانى قريت التاج كله من غير ما احس
:)

تحياتى
انا زيك بكره الكدب على فكرة

Unknown said...

عليوه
الف شكر على مرورك على المدونه و شوفت التاج و فعلا اسأله جميله بس هو يبقى يجي يجاوب

Unknown said...

simple girl.. ..simple dream
ممكن كمان اختزل الكلام اللي كتبته
ان السعاده في الرضا و الرضا في الايمان

Unknown said...

Che The Sad
و الله مش ضيق بس
اولا عشان العيد و كله بينشغل في العيد
ثانيا لأني بعد ىالعيد سافرت سفريه منيله كان مفروض تكون رحله بس يلا حصل خير

Unknown said...

Hadota .. حدوتة
غصب عني و الله الابهام في دمي مقدرش اوضح كتير عن شخصيتي مش للتكبر لأ و الله دي حاجه في دمي كده و هي بتوضح بلأيام و الزمن

simple girl.. ..simple dream said...

ايه يا محمد فينك
انت مش هتدخل عندى تشوف البوست الجديد وتقولى رأيك
يلا هستنى منك تعليق عندى

bastokka طهقانة said...

انا مبحبش التاجات
في برانيط؟


اوروفوار

قطوف said...

أنا سعيد جدا لمرورى على مدونتك
وبعدين أحيي إلى عامل التاج فى البدايه لان تصميمه حلو
وبعدين غيه الاجابات الجميله دى معبره ومفبش فيها تكلف
بس فيها شوية تشاؤم كده عاوزين نشيلهم
وظهر أوى تدينك وانت مخلص لصحابك يا بختهم بيك
مدونتك جميله انا دخلتها اكتر من مره بس انت كنت بلاقى البوست اللى قبل التاج

Unknown said...

simple girl.. ..simple dream
انا مقدرش على التأخير عليكي و الله بس مشغول جدا جدا

Unknown said...

bastokka طهقانة
و ماله احلى برنيطه هنا عاوزه البرنيطه ايه شكلها ايه و استيلها ايه

Unknown said...

سى السيد
الاول اهلا بيك و اتمنى ان الزياره تكرر و ارجو انها تكون عجبتك بجد
بس بصراحة انا اتمنى اكون متدين بس انا مش متدين

محمد مارو said...

ايه يا كوتش انت كنت اضى و انت بتكتب و لا ايه ؟
كل ده بوست يا راجل
دة عاوز اجازة يوم كامل ع شان اخلصه انا قرات درس خصوصى بالعافيه

Unknown said...

هو مش طويل اوي كده
كل الحكايه انك رديت في البوست اللي بعديه

Google