Wednesday, October 24, 2007

شخبط شخابيط لخبط لخابيط

طبعا البوست ده اكيد مش هنقد او اتكلم عن الاغنيه الرائعه للفنانه الشامله نانسي عجرم لأني بصراحة مسمعتهاش و لا ناوي اسمعها اصلي بعيد عنكم غلاوي حبتين اصل نانسي دي من دوري يعني انا اكبر منها بمفيش سنه و لا اتنين و البت ماشاء الله بتلعب بالفلوس و احنا نفحت و نردم في نفسنا سنين و سنين و انت و حظك يا تشتغل او متشتغلش اما سلعتها هي رائجه في سوق ميلودي على الاخر مش مهم عشان منرغيش فكلام ملوش دعوه بالبوست ( ده على اساس مثلا ان البوست هيكون ليه علاقه بعضه ) و البوست طويل خلقه العنوان عشان انا مش هتكلم في حاجه محدده اصلي كنت عمال افكر اكتب ده و لا ده و لا ده و في الاخر قلت ليه مكتبش كله و نفذت على طول ابدأ كلامي بأيه بأيه نظرا لأني بموت في الاختراع المسمى بالميكروباص هبدأ البوست بكلام عن ميكروباص .

درس خصوصي

كنت سعيد الحظ من كام يوم و حضرت بدايه دوره تأهيل تتخرج بعدها لتصبح تباع ميكروباص اد الدنيا كانت البدايه زحام شديد في رمسيس على الميكروباصات فروحت بعد انتظار نص ساعه ربنا الهمني اروح الناحيه التانيه اركب و الميكروباص بيفضي الناس و بعد نص كمان مش لاقي ميكروباص الحته اللي انا رايحها و الميكروباص بيفضي قلت ليه مسكن ؟؟؟ الراجل فكر كده و دورها في دماغه و قالي ماشي يلا مسكن اركب يلا يا ولا نادي قول جسر السويس الف مسكن مسكن ( لسه الواد متاخد )يلا نادي راح اشتغل قاله استنى لما الف الاول و بعدين نادي خد بالك الاجره جنيه فاهم ؟؟؟ يومئ برأسه
دخلنا على طوفان البشر اللي كنت سييبته الناحيه التانيه الواد اشتغل الف مسكن مسكن واحد سأله مساكن طبعا الواد لسه جاي من بلدهم و اهي بالنسبه ليه مش هتفرق مسكن من مساكن ده هو حرف الالف قال اه هب فيه السواق قلت ليك مسكن بس مش مساكن ( معلومه ببلاش مني يلا اهو اذكي عن صحتي مسكن يعني موقف الألف مسكن - مساكن يعني مساكن عين شمس ) قاله انزل و نادي بس خد بالك من الامين لو خدك هسيبك و امشي معلومه نسيت اقولها اللي بيتعلم ده حوالي 13 سنه تقريبا الواد اتفزع كده و ابتسم ابتسامه صفراء
اتملى الميكروباص لأخر نفس و طلع سأله تممت على عربيتك و لميت الاجره قاله اه خد اهي كام واحد في العربيه ؟؟؟ 14 ماشي 14 جنيه حلو و احنا داخلين على العباسيه واحد قاله بعد الاشاره معاك
السواق بدأ يكمل الدرس الحته دي اسمها العباسية برده الاجره من عندها جنيه برده نزل الراجل و طلع مكانه بنتين قعدو على رجل بعض و مشينا و احنا ماشيين واحد بصوت هين قال كبري القبه معاك راح التباع تحت التمرين ردد عشان يوصل للسواق السواق قال لأ انا عاوز صوتك يجلجل في العربيه ( طبعا لازم يعمل دماغ للسواق ) خد بالك الكوبري اللي قدامنا ده اسمه كوبري القبه تحت الكوبري ده بقى الاجره 75 قرش فاهم ؟؟؟ يومئ التباع برأسه نزل واحد في كوبري القبه السواق جري قال هات واحد مكانه ( ميعرفش ان في بنت قاعده على حجر واحده ) الراجل نزل طبعا البنت قعدت مكانه طلعت ست كبيره قالو الناس للسواق مفيش مكان .... التباع بيبص ليه بأستغراب قاله متبصليش اتصرف على طول قاعدها مكانك و اقف خليك حرك كده راح وقف و الميكورباص طلع بعد شويه اثبت التباع انه بيتعلم كل شويه حاجه بعد ما نزل كام واحد و كان في الميكمروباص مكان لواحد راح السواق قالوا هات الراجل ده التباع من نفسه جاب راجل تاني و قعده مكانه ووقف هوه ...

يا ترى بعد اسبوع هيبقى التباع ده شكله ايه ؟؟؟؟؟
و لا بعد شهر ؟؟؟؟
و هل ممكن الامين ياخده فعلا و يا ترى هياخده فين ؟؟؟؟؟؟
هياخده عشان يكسب ثواب فيه و يتعلم على نفقه الدوله و لا هياخده تحري و يرميه في زنزانه و يحط رجله على اول طريق الفساد ؟؟؟؟؟

الصره

منذ عام تقريبا بدأت تنزل عملتان جديدتان للتداول و هيب الجنيه المعدني الاشبه باليورو و النص جنيه المعدني و يومها بعد رساله في احدى المجموعات البريديه اتريق و اقول اتمنى من الصين انها تشوف حل عاجل للمشكله دي و تستبدل المحافظ اللي بتصدرهالنا بصرر و ابتكار انواع و ماركات للصرر حرصا على اراحه المواطن المصري البسيط و تسهيل شيل الاموال على الشعب المسكين اللي اصلا مبيشوفش الاموال عشان يشيلها .
بعد سنه من الاقتراح ده الحكومه سرقت اختراعي ايوه و الله سرقته دخلت البنك المركزي اغير فلوس قديمه و افك بعد دوشه فكه العيد خصوصا ان الفكه اللي جيبتها بالواسطه خلصت في العيد سألت في اول شباك قابلته فيه جنيهات و انصاص فكه قالت اه بس فضه
نعم ؟؟؟؟؟؟؟ انا هفك 200 او 300 يعني عاوز رزم اشيلها قالتلي لأ المتوافر فضه و في الشباك اللي جنبي و لو على الشيل هيدك كيس
رحت شباك تاني عشان الاول اغير الفلوس القديمه و حاولت اعمل نفسي معرفش و اقول مش ممكن تفكيلي قالت فيه فضه قلت ازاي فضه قالت لو انت شركه ممكن تعمل لنفسك حصه ( مسألتش ازاي هحاول اعرف في زيارات تانيه ) و بصراحه كانت متعونه دورت في الدرج لقت معهاش الا رزمتين انصاص على قد شغلها .
روحت شباك الفضه لقيت موظف قاعد و قدامه هرمين اكياس صغيره مقسمه بحيث كل كيس 50 جنيه الجنيهات 50 كوين * جنيه و الانصاص 100 كوين في نص عامله بالظبط زي الافلام التاريخه لما الشاعر من دول يهاتي في قصيده مدح زعيم القبيله يروح راميله صره يستزيده يرمي كمان رزمه يستذيده يديله الحصانه ( يديله الحصانه دي مقتبصه من نص كلمه لأحمد رجب )
روحت دخلت فيه جامد تديني اي كميه قال اه و كأنه مصدق ( في ايام الرزم كان مفيش حاجه اسمها اي كميه دي هو كبيرك 100 جنيه من كل فئه يعني لو جنيهات رزمه لو انصاص رزمتين لو اربع اربع رزم ) قلت هات 200 جنيهات و 150 انصاص راح رمالي زي زعيم القبيله بالظبط الاربع صرر جنيهات و 3 انصاص و بصيت على الهرم اللي اتكون قدامي قلت يا نهار مطين ده انا في اي باب امن في اي بنك هنور كده و الباب هيصرخ رميتهم في الشنطه و بالمناسبه كان احلى تمرين من اي جيم بعد 3 ساعات شيل وصلت رقبتي وجعاني من الوزن .
دخلت بالشنطه العجيبه دي بنك مصر حطيت الشنطه في جهاز الشنط و عديت انا من الباب انا مظمرتش بس بصيت على الجهاز بطرف نظري لقيته بينور نور احمر و لقيت واحد في اوضه جانبيه عمال يخبط للأمن على القزاز ( الراجل تقريبا زهل من اللي شافه في شاشه الجهاز ) راح الامن جالي قالي ممكن تفتح الشنطه فتحت و مع طلوع اول صره قال اه فلوس و كأنه عدى عليه كتير من العينه دي
و من هنا اكرر دعوتي على الحكومه لسرقه اقتراحي و اكرر دعوتي للصين انها تسارع بأنتاج اكبر كم من الصرر لحفظ النقود و الثواب لهم عند الله .

عاوز اشتغل




الصوره دي حقيقيه مش تركيب كنت فكرت اول الامر اني احذف الرقم من الصوره بس فكرت احذف رقم موجود في كل حته في الشوراع و ممكن جدا حد يحتاجه هل هو كاتب دي كحب للظهور و لا فعلا بيحب شغله للدرجه دي و يحب يسهر على راحه المواطن طبعا انا عجبني جدا الشخص ده لدرجه اني بستبعد اوي الاحتمال الاول اللي انا محطتوش الا بسبب اننا بقينا منتوقعش اي حاجه كويسه خصوصا من البوليس المصري .

سحابه العام و كل عام

انا مش مصور و لا غاوي تصوير كل المسئله اني كنت في سنترال الاوبرا في الدور ال 17 بصيت من الشباك عجبتني مصر من فوق فصورت اه الصوره ضبابيه اه مش باين ملامح كتير بس هي دي مصر و هي دي السحابه السوداء بتاعه كل سنه الصور ملتقطه قبل العيد بيومين و الزحمه دي ناتجه عن كده العتبه قبل العيد بيومين اكيد مصر كلها هناك و عشان تعرفو مصر اد ايه مختلفه من غير سحابه سودا انا ححطيت صوره صورتها من نفس المكان من يومين تقريبا عشان تعرفوا




الصوه دي لسطح الجزء المدور السفلي من السنترال


الصوره لبرج منك مصر الشهير

دي بقى لسطح جراج العتبه الشهير

و من بعيد تظهر القلعه و ركز عشان تقارن مع اخر صوره


اللي تحت دول كوكتيل اشي بياعين و اشي عربيات هتخش ترخص في المرور غير جمهور البشر



صوره مقربه لنفس المشهد





مسرح العرائس

محطه المترو و حديقه الازبكيه و الانشائات اللي معرفش بتاعه ايه

و طبعا جمهور البشر



الجراج البعيد التاني بتاع العتبه

انا منضفتش العدسه على فكره انا بوريكم بس التلوث كان عامل ازاي

و للأسف مخدش بالي اني كنت بصور ابيض و اسود بس حصل خير

المهم في سؤال اتمنى اجابته من اي حد يرد هل من لافضل اني كنت اقسم البوست ده على 3 و لا كده أفضل؟؟؟

19 comments:

Unknown said...

البوست فعلا طويل اوي بس جميل

اكيد الامين هايخده يروقه في القسم و يتحط علي اول طريق الاجرام الشرطه في خدمه الشعب يا باشا

طيب يا عم بقيت من اصحاب الصرر بس انا زعلانه منك يعني نازل فك و مافيش عيديه لاختك الغلبانه فعلا الفضه غيرتك

غريبه حكاية الرقم ده ماتيجي نكلمه نعرف ايه حكايته

السحابه السوده بقت عشره بردو

انا من رأي ان التقسيم احسن
بس البوست جميل اوي

Unknown said...

أيه يا ابنى أنت فين ؟ الوصلة الى انت سافها دى سحبوها منك و لا أيه ؟
:))))))))))))))))))))))

Che The Hermit said...

محمد باشا
صحيح انا كل شوية اقول شهبي فوقنى وقلي صبحي معلش بقي هى لزقت فى دماغى شهبي وما اخدتش بالى غير من كام يوم والله

البوست صحيح بس مخدتش بالى من كتر الاستمتاع وانا بقراه ومش مشكلة تقسمه ولا تخليه كدا كدا هنقراه

بس التباع دا كويس وشكله بيتعلم كويس ربنا لا يوقعه فى ايد امين وكمان يخرجه من المرمطة بتاع التباع دا ويصلح حاله وحال البلد دي :(

الفلوس الفضة دي ما يرضوش بيها العيال عيدية يا راجل شكلك هتدبس فيهم


الراجل دا بيفكرنى بالاعلان بتاع المعاقين زهنيا شكله معاق زهنيا هو كمان :D

السحابة السوده اصبحت من السمات المميزة للحكم المباركي يعني على قلبنا على قلبنا
بس صحيح الصور اللى انت واخدها حلوه جدا واحسنهم الابيض والاسود علشان مش باين فيها ديتايلز السحابة

تشي

simple girl.. ..simple dream said...

would u plz visit my blog and participate in my poll
i really need ur opinion


with my best regards


i'll read ur post and coment on it soon
شكله يفتح النفس للقراءة مع انه طويل

simple girl.. ..simple dream said...

جميل اوى رصدك للاشياء اللى اللى احنا متعودين عليها جدا لدرجة اننا خلاص بطلنا ناخد بالنا منها

ما علينا said...

في رايي انه كدا احسن

اجمل ما في الكتابة
انك تكتب والمواضيع بتلح عليك تتبها
بيكون احساسك بيها اكثر حيوية وحضور

وتقدر تنقلها للقارئ اسرع
وبشكل اكثر تاثيرا


التباع دا كلها كام يوم اسبوع بالكتير
ويبقى محترف
ومش بعيد يعمل الركاب دورين جوا الميكروباص

والله قلبي عندك
في زحام القاهرة دا


واا كانت الحكومة سارقة فكرتك
تبقى انت بقى تعرفني من زمان

وسارق فرتك مني

انامن فترة قبل ما يظهر الجنيه والنص الفضة

كنت لازم اشيل معايا
مبلغ 10جنيه فضة
لزوم المواصلات والفكة وكدا
لان الفكة كانت دايما تعمل ازمة

وكنت دايما اشيلها في صرر
بس طبعا مش مخصصة للنقود
لكن شبهها

عارف اكياس الحاجات الدهب
زي خاتم او حلق تكون شاريه لطفلة صغيرة

كنت كل ما الاقي عند حد من اصحابي او حد عندنا في البيت
اخدهم

ولازم تبقى معايا الصرة
في شنطتى



القاهرة
حاساها دايما مخنوقة
كان الله في عونكم


مرة تانية
البوست جميل جدا

Unknown said...

هو فعلا طويل شويه يا صبحى بس حلو
انا يدوب خلصة فقرة نانسى
عقبال ما تبقى تباع قد الدنيا
ياعم دول بيكسبوا كتير اسالنى انا
حد لاقى
افتحها يارب فى وشنا بقى ونبقى تباعين ميكروبازااات قد الدنيا

البِـئرُ والظمّأْ said...

البوست فعلا طويل
بس مفيش مشاكل مزهقناش يعني


صور حلوه على فكره
لا الموبايل اجدع صراحة
.
زيـزي

Unknown said...

EmY
انا مفيش حاجه تغيرني و لا فضه و لا دهب بس اللي جاي على قد اللي رايح و هنيالك يا فاعل الخير و من قدم شئ بيداه التقاه
معكيش نص جنيه اروح بيه الشغل بكره ؟؟؟

Unknown said...

عاليا حليم
انا موجود بس لسه النظارهفي التليين

Unknown said...

Che The Sad
شبهي صبحي مش هتفرق
الحمد لله ان الصور عجبتك

Unknown said...

simple girl.. ..simple dream
اتمنى انه يكون عجبك الرصد

Unknown said...

ما علينا
لو على الالحاح انا ممكن جدا كنت اكتبهم و اخليهم عندي و ابعتهم واحد واحد المهم انهي افضل للمتلقي
الصرر بتاعه الدهب دي بلعب بيها و انا طفل بس مجاتليش فكره الصره الا لما نزول الجنيه المعدني و بعتها ساعتها في رستاله محتفظتش بيها لنفسي تروح الحكومه بنت الايه تسرق الفكره يلا مش مشكله

Esmat said...

محمد تحياتى
أحلى حاجة أنك تسيب نفسك تكتب
و زى ما يطلع طويل او قصير مش مشكلة
عجبتنى الصور اوى
والوانها حلوة على فكرة
وعجبنى فحصك للناس
لا تنسى إنت قولت حتكتب بوست
تحكى فيه عن أزمتك مع إسكندرية
أنا منتظراه
وتحياتى لك

Unknown said...

لماضة
انتي بتقولي فيها انا اصلا من غبلب الواد في الاول كنت هشرح ليه يعمل ازاي و ازاي يطلب الاجره ( اللي طلع ورا يبعت ) و الكلام ده بس قلت بلاش نعلم الوادخليه ياخد الخبره خطوه خطوة

Unknown said...

Meekness
الحمد لله ان الصور عجبتك و دلوقتي انا محتار بين التطويل و التقصير بس البوست اللي جاي خلاص وضح اطول من ده كتير

كلبوزة لكن سمباتيك said...

قسمهم 3 احسن طبعا انا مش عارفة عجبني تصويرك لموقف الميكروباص حسيت انك نجحت تنقلني هناك

===
فرحت بالظابط عمرو ده الا لو كان حد عامل فيه مقلب علشان يقل راحته و ده في الغالب اللي حصل
===
السحابة السودا دي بقت زي الاهرامات و ابو الهول
اية عايز مصر تفقد معالمها


===
ازيك بقى؟

تحياتي

Unknown said...

Esmat
و الله كنت هكتبه اكتر من بره بس في حاجات تانيه بتلح عليا قلت اكتبها الاول

Unknown said...

Sampateek
الجمد لله اني قدرت انقلك ليه
بالنسبه للظابط واضح انه مش مقلب لأن الاعلان مرشوش رشه حلوه في كل حته

Google