Wednesday, April 23, 2008

القاعدة و الأستثناء

لكل قاعده استثناء يشذ عن القاعدة و يؤكد القاعده
يعني مثلا القاعده ان مفيش رئيس بيحكم البلد دي كويس ممكن جدا يحكممها واحد كويس زي محمد علي باشا و ده الاستثناء اللي بيحصل كل كام الف سنه و ممكن جدا تكون القاعده ان الاهلي يكسب الدوري و الاستثناء ان الزمالك او الاسماعيلي يكسبوا
و ممكن جدا تكون القاعده ان مصر متوصلش كاس العالم و ممكن يكون الاستنثناء ان مصر توصل زي معجزه سنه 1990
و انا النهارده هتكلم عن حكايتين استثناء للقاعده


القاعده ان سوق الميكروباص يخاف من امين الشرطه
و القاعده تقول ان سواق الميكروباص بيخاف و يحترم اللي ماسك الموقف

بس اللي حصل استثناء للقاعده

مالك الميكروباص ظابط شرطه فكيف يخاف السائق من الامين او مشرف الموقف
فكر الراجل في مشروع مربح فرسي انه يجيب ميكروباص و يشغل عليه سواق بألاضافه الى شغله الاساسي كضابط مباحث
جاب الميكروباصث و كانت القواعد صارمه الميكروباص ده اول ميكروباص يحمل في الموقف لأنه ميكروباص البيه مره واحده حصل الاستثناء جه اللي ماسك الموقف مع كام سواق و راح لسواق الظابيط و قاله انت مشس هتحمل النهارده
بيجس نبض و بيعرف ايه اخره بدل التوجس المستمر السواق راح اتصل بالبيه يا باشا مش عاوزين يخلوني احمل
قالوا مين دول انا هوريهم
الموقف عادي و الللي بينادي بينادي و اللي بيحمل بيحمل زي اي يوم و اللي ماسك الموقف قاعد بيشرب الشاي (زي اللي انا بشربه و انا بكتب )
و فجأه البوكس دخل الموقف محمل العساكر نزلوا كلهم و كسروا كل زجاج الميكروباصات اللي في الموقف ما عدا زجاج ميكروباص واحد اكيد معروف و راحوا للي قال للسواق و اللي ماسك الموقف اللي قال لأ لتحميل سياره الباشا و راح القسم في قضيه حيازه مخدرات مع السلامه و القلب داعيلك و حتى نهاية امتلاكه للسياره كانت هي الاستثناء للقاعده

ــــــــــــــــــــــــــــــــــــــــــــــــــــــــــــــــــ

القاعده تقول ان سواق الميكروباص دايما اللي مطلع عين الزبون
الزبون يجري عشان يركب الزبون ينزل و الميكروباص ماشي
دايما السواق اللي قارف الزبون
بس هناك لكل قاعده استثناء

كنت في سانت فاتيما شاورت لميكروباص بيقول الف مسكن ركبت
لقيت واحده بتقول للسواق هات الجنيه و نص
ليه هو احنا ليه ندفع لحد هات الجنيه و نص و راجل جنبها يقولها اسكتي يا بنت و هي بتزعق و ست كبيره قاعده قدامها تقولها يا بنت عيب كده احترمي جوزك قدام الناس
بصيت كده للناس واضح ان الجو متكهرب و ان الخناقه بقالها كتير
لقيت واحد ورايا بيوشوش اللي جنبه دي لو مراتي كنت عملت و سويت
و انا بكلم نفسي هو في ايه
بعد 5 دقايق و خصوصا ان الشارع كان واقف من التجاهل التام من السائق ليها راحت قايلاله يا اسطى عد فلوسك هتلاقفيها زياده جنيه و نص
يا ستي اسكتي انتي مبتهديش الله يكون في عونه
ملكش دعوه بيا هات الجنيه و نص
قال صلي على النبي بس
هات الفلوس
صلي بس على النبي بس

عليه الصلاه و السلام
(اخيرا هسمع الحكاية )
انا دلوقتي في كام واحد ورا في 14 مفروض الم الاجرة 7 جنيه جتلي كام يا حاج بيسأل اللي راكب جنبه
قال 5.5 جنيه
قمت قايل ايه يا جماعه في جنيه و نص ناقص
راح واحد طلع جنيه و نص و ادهولي بس انا غلطان ؟
هو جوزي طلع جنيه و نص مكانش يعرف اني دفعت
طب انا مالي انا قلت في ناس مدفعتش راح جالي الجنيه و نص و الناس كلها بصراحه بتأيد كلامه
انا ماليش دعوه هت الجنيه و نص
راح الراجل مرجع الجنيه قال خدي بصراحه انا بقالي 3 سنين سواق اول مره يحصل كده
كل ده على جنيه و نص الله يكون في عونه
اه احنا موظفين بتاخد في الشهر 220 جنيه اما انوا بتعملوا 100 جنيه في اليوم
احنا ربنا يسامحك و قعدت طةول الطريق تبرطم حتى بعد ما خدت الفلوس برضه قالها مش خدتي الفلوس اسكتي بقى يا ست
بصراحه اولمره يصعب عليا سواق
دي وصلتني انا اللي دايما بقعد مستمع اني كنت خلاص على وشك اني اقولها متتكتمي بقى صدعتينا هو احنا ناقصين قرف

اخيرا كنت عاوز اقصر الموقوع بس على القالعده و الاستثناء بس لازم انوه بحاجه
الميكروباص ده مش فاتح بيت واحد و لا اتنين
في حاجات نظاميه
يعني لو الميكروباص في المتوسط بيعمل 150 في اليوم فدول مش للسواق
لأ طبعا
90 % من السائقين مش ملاك للميكروباصات
لأ شسغالين عليها
و للميكروباص تعريفه على حسب حالته ممكن مثلا الرمسيس يخرج ب 70 جنيه في اليوم و انا بصراحه معرفهاش دي فلوس للمالك و الباقي بقى السواق ممكن جزء و لو التباع جزء و اكراميه اللي ماسك الموقف يعني 4 عائلات تعيش من خير الميكروباص و انا بفكر اكتب موضوع عن المالك و السواق بس عن التاكسيات عشان عندي معلومات اكتر عنها

8 comments:

Hanan Said said...

طيب هي الست دي ما اطلقتش
يعني فضلت على زمه الراجل لغايه مانزلت من المكيروباص
اهو بردو هنا في استثناء من القاعده
لان القاعده لو في راجل مراته بتعمل كده هيطلقها وقتي
ولا الاحسن يستنى ياخد الجنيه ونصف الي دفعهولها ويطلقها مش يبقى طلاق وخساره فلوس كمان :)

Hanan Said said...

اه نسيت اقولك ان البلوجر بتاعك جميل جدا
وبتناقش فيه الحياة باسلوب حلو اوووي

Che Ahmad said...

عااااااااااااااااااااااد
اخيرا يا عم محمد
وعموما والله حلوة اوى الاستنثاءات دي
الاول هم يضحك والتاني مهما كان فالسواق يستهل لأن الزبون دايما على حق حتى لو كان مفتري ومعندوش ضمير وواحدة ست

ما تبقاش تغيب يا كبير

تحياتى
تشي

Unknown said...

الأستثناء ---كلمة ودتنا فى داهية

هات شوبة شاى

Unknown said...

انت لوحدك يا راجل استثناء للمدونين كلهم .وانا مبسوط انى دخلت مدونتك

Unknown said...

بعتذر جدا للتعليق خارج الموضوع
أرجوا زيارتى لأمر هام ضرورى

و لكم جزيل الشكر

إنسان || Human said...

لكل قاعده إستثناء فعلا
وده يدل إن احنا في بلد ملهاش قواعد أساسا
عشان يكون فيه استثناء

rona said...

البوست جميل
وعجبنى الاسثناءات دى
تقبل مرورى وتحياتى

Google