Sunday, September 9, 2007

تهييس






نزلت في الفتره الأخيرة رشه اعلانات في مترو الأنفاق عن نوكيا بطريقه بيحاولو يخلوها مبتكره
الأعلان الاول للأسف مش جايب صورته بيقولك فيما معناه انك حاسس انك مضايق ايه رأيك اسألأل اللي جنبك عن اخباره خليك اكتر نوكيا
المصيبه ان الناس حسيت انها متأثره بالأعلانات و انا شخصيا اتأثرت خصوصا بالأعلان اللي انا جايب صورته دي لأنه بيطاردني في كل حته
و بحاول اعند معاه
اختار مترو فاضي و اقعد ادور على اتنين بيشوفوا الأعلان الاقي كل الناس نايمه على الكراسي و محدش فيه حيل يبص اختار محطه فاضيه و اقعد ابص و ادور على حد غيري يبص ملاقيش و انبسط اوي اني بثبت كدب الاعلان
النهارده كنت قاعد في المترو ببص على الاعلان و بعدين ببص جنبي لقيت واحده ست في الأربعينات بتبص قلت كويس اهي العمليه بدأت تفرج اهي الست اول ما خلصت اخر سطر قعدت تتلفت يمين و شمال و تتقمل في كل الناس تدور على اي حد بيقرا الأعلان مش لاقيه ( اصلي كنت خلصت قرايه خلاص ) قعدت على الحاله دي يجي محطتين تدور على حد يبص على الأعلان حسيت بمدى القرف اللي وصل ليه المصريين انهم بيدورو على اي لعبه تلهيهم من القرف و حسيت اننا شعب في طريقنا للجنان أو يمكن يكون العاقلين اللي هيتبقو مننا يبنولهم مستشفى يحطوهم فيها احسن
كنت هصور الأعلان اللي بتبص عليه الست بس حسين ان الناس في المترو هيقولو عليا مجنون اسنيت لما نزلت المحطه و اديتها صوره يلا كل موجه حر و انتو طيبين

5 comments:

فقاقيع كلام ـ شروق الشمس said...

السلام عليكم ورحمة الله وبركاته..،

على فكرة أنا عملت كدة أول امبارح

كنت أول مرة أشوفه الإعلان ده بالتحديد اللي حضرتك مصوره

لكن شوفت بتاعت النكتة وحاجات تانية

لما قرأت الإعلان اللي في الصورة

كان المترو زحمة جداااااااا

وفضلت ابص على الناس ـ في عربة النساء ـ على واحدة بسسس بتبص على الإعلان مش لقيت..

فضلت أضحك

وقولت في نفسي هو إيه الثقة الجامدة اللي في نوكيا مخليهم متأكدين إن في اتنين على الاقل بيبصوا على إعلانهم

يااالاخيررر

بس أنا وحضرتك كدة اللي بصينا على الإعلان بس مش في نفس اللحظة

هو أسلوب حلو في الإعلان

بس التصميم بتاعه زففففففت جداااا
مش عاجبني
وهو ده اللي لفت نظري للإعلان
نوكيا.. إعلان بالقباحة دي
مش ممكن

Anonymous said...

والله أنا مش عارفة
بس أنا لو مكان نوكيا
فأنا نجحت في جذب اهتمامك
ولا إيه ؟
بدليل إنك بصيت على الإعلان
رغم إنك حافظه
ودورت على غيرك
يبقى كده
نجح في جذب انتباه واحد من الاتنين
تحياتي
منى

Unknown said...

الاخت فقاقيع كلام
و عليكم السلام و رحمة الله و بركاتة
الاعلان مستفز و انا بجد قربت اتجنن منه بيطاردني في كل عربية و كل محطة لغاية ما طهقت منه
الاخت منى
نوكيا منجحتش في لفت انتباهي و لا حاجه
عارفة انا الاعلان ده فكرني بقصة لأحمد رجب اسمها كلاام فارغ فيها فصل اسمه ابو العزم الاكيد بيتكلم عن استفزاز الاعلانات هحاول انقله بإذن الله

ما علينا said...

الاعلان دا وبتاع انت مضايق

استفزوني جدا

واستسخفتهم جدا جدا

لنفترض اني لقيت
حد بيبص تاني

ايه بقى اللي الست ننوكيا بتعمله
والمفروض اني اكون
اكثر نوكيا

ازاي يعني
انا اعرف الواحد
يكون اكثر تفاؤل اكثر تشاؤم

اكثر جنون ولسعان

لكن اكثر نوكيا؟؟؟؟؟

وياترى بقى

كل واحد يبقى نوكيا
الاصدار اللي يعجبه ولا اصدار محدد

Unknown said...

طبع اعلانات مستفزه و ملهاش اي غرض الا التشبع الكامل من الاعلان اللي يخليك تشتري نوكيا زي الاعلان اللي شافه ابو العزم الاكيد
اطلب بألحاح ساعه بل

Google