Sunday, September 16, 2007

مين فينا اللي صح

تقريبا الموضوع ده حصل من 7 شهور في ليله من ليالي الصيف الطويله الممتعه اللي قليل ما نتجمع فيها انا و اصدقائي كانت الساعه تقريبا 2 بالليل ( فرصه بقى اهلي بيصيفوا و انا خدها فرصه و سهران انا و اصحابي ) قلت كده نسخن السهره شويه بحديث سخن شويه سألت سؤال للكل اللي معايا 4 تقريبا افرض انت خطبت واحده و حبيتها ( الشر بره و بعيد ) و جت اعترفت قبل الجواز في فتره الخطوبه انها غلطت هل هتتجوزها و لا لأ ؟
كان الرد مسلم بيه من الكل و بدون اي تفكير او تردد لأ طبعا
استغربت جدا و قلت ليه ؟
قالولي و انت هتوافق ؟
قلت ليه لأ بس انا اساسا مش هتجوز بس لو اتحطيت في الموقف ليه لأ دي واحده عاوزه تتوب و داخله معاك بصراحه و هي ممكن كانت تخبي عليك و انت كنت ساعتها هتتجوزها و هتكون مبسوط جدا ليه هعاقبها على صدقها دي واحده عاوزه تتوب
طب لو اللي غلطت معاه شافها في الشارع معاك ساعتها هيقول عليك ايه ؟
قلت انا مؤمن جدا ان ربنا سبحانه و تعالى مبيفضحش اي حد تايب و حتى لو شافها ممكن جدا ربنا يعميه عنها و ابسط مثال قصه سيدنا موسى ( ارجوا ان لاتخنني الذاكره او يقوم احد من الاخوه بالتصحيح لو كنت على خطأ ) عندما لم ينزل المطر و قال له الله سبحانه و تعالى انه لم ينزل المطر و بينهم رجل عاصي فطلب سيدنا موسى من الرجل العاصي الخروج فلم يخرج و لكن نزل المطر فسأل الله سبحانه و تعالى هو لم يخرج و نزل المطر فكيف فقال هو تاب الي توبه نصوحه فقال فأخبرني من هو فيقول له الله سبحانه و تعالى سترته وهو عاصي أأفضحه و هو تائب
عشان كده عمر ما ربنا سبحانه و تعالى هيفضح تائب
طب ايه اللي يضمنلك انها تابت بجد مش ممكن تكون هترجع تاني ؟
قلت طب ليه تقولي من الاساس مهي كان ممكن تخبي لو عاوزه الجواز منظر او ستار للخطيئه
مفيش اي حد مقتنع بكلامي فقلت نحاول نغير مجراه شويه
مسكت واحد منهم على وجه الخصوص قلت ليه طيب هما كلهم انا عازرهم كلهم مغلطوش و عاوزين شريكه حياتهم تبقى برضه مغلطتش انت غلطت و كذا مره ليه هي ترضى بيك على غلطك و انت مترداش بغلطها
قالي انا راجل
قلت لو في فرق بين الراجل و الست في دي كان ربنا عمل لكل واحد من الاتنين عقوبه اما هي عقوبه واحده للأتنين و ربنا مش هقبل توبتك و توبتها لأ
قالي استأمنها ازاي على بنتي ؟
قلت مهو اشمعنا هي بتستأمنك على العيال كلهم و انت كنت كده و ممكن تستأمن بنتك على واحده كده بس كدبت عليك و لا هتعرف
قالي لأ الست تختلف هي اللي قاعده معاهم فازاي تقعد مع بنتي و هي كانت كده
قلت انت للأسف في ازدواجيه في معايريك مترضاش لغيرك اللي بترضاه لنفسكم مترضاش للست انها تعمل حاجه تتفاخر انك عملتها
قالي انا راجل و حر
و لغايه دلوقتي محدش عرف يقنع التاني بوجهه نظره بس من كام يوم في واحد وافقني على وجهه نظري بس بره الاربعه و ده شئ حسسني اني ممكن اكون صح لأني كنت الوحيد اللي بقول كده و اتقال عليا مجنون كتير اوي فقلت نسمع الرأي و اعرف انا غلط و لا صح و مين فينا اللي كلامه صح

12 comments:

Anonymous said...

عزيزي محمد
طرحت قصية مهمة جدا إنت في البوست ده
الفكرة كمان في حاجة تاني
لو البنت ما غلطتش لكن حبت قبلك
هتعمل إيه ؟؟؟
هتاخد نفس الموقف و تسيبها ؟
مع احترامي
مين فينا ما حبش حتى لو بينه و بين نفسه ؟؟؟؟
و زي ماانت قلت
ليه ترضاه لنفسك ؟؟؟
مش معنى إنك راجل يبقى إنت معاك الدنيا باللي فيها
ماهي الست برده بتحس و بتتألم زيك وأكتر
و....أنا عكيت ؟؟؟

Unknown said...

انا قلت رأيي في الغلط و ده اكتر من الحب
على اي حال و انا قلت انا ملومش حد على خطأ ممكن ارتكبه حتى لو مأرتكبتوش

A long distance said...

موضوع جميل ومهم
كل الناس بتحب
اولاد وبنات
ومنقدرش نقول لحد ميحبش
وبعدين ليه احاسب البنت على انها حبت قبل كده
اللي هييجي يتجوز واحده
ليه يحب يفتش في الماضي
يخليه في الحاضر
وبس
وبعدين هو ليه ان اللي هيتجوزها
تعامله باحترام
ويحس معاها بالحب
لكن لو حس بالعكس
فيبقى في كلام تاني
Mr.GKiLLer2020

جبهة التهييس الشعبية said...

طيب انت باعت لي الرد ده على الميل على ردي على واحد بيتكلم كلام غير اللي بتقوله خالص وبتقول لي انت بتجمعي
!!!!!!!!!!
هو انا قلت كل الرجالة بيفكروا زي الاستاذ نبيل؟ انا كان كلامي للرجالة اللي بيفكروا زيه ان كلهم بلا استثناء لما واحدة خوجاية ترضى تتجوزهم ما بيدوروش في ماضيها لكن لما تبقى مصرية يطلعوا عينيها ويسألوا طوب الارض عليها وعلى ابوها وامها واسم الدكتور اللي ولد الست والدتها فيها

يعني الكلام ما كانش ليك ولا للي بيفكروا زيك خالص
اما بخصوص تامر حسني
فاسكت والنبي انا ح اطق من جنابي من الموضوع ده
ياخويا هو الراجل عشان يعجب البنات دلوقت بقت مواصفاته انه ما يستحماش ولا يحلق ولا يتسرح؟
ده تضامنا مع أطفال الشوارع وللا ايه؟
محجبة بقى وللا مش محجبة
بس على الاقل تستنضف وللا انا بقى اللي دقة قديمة

Unknown said...

A long distance
الحمد لله ان الموضوع عجبك بس مين يسمع معظم اللي كان ليهم علاقات قبل كده مش عاوزين واحده عملت حاجه قبل كده

Unknown said...

الاستاذة نوارة
اهلا بيكي الاول هنا
ثانيا انا فهمت من كلامك انه عام على كل الرجاله
انا عن نفسي مش هسأل اهم حاجه الحاضر و الصراحة
بالنسبة لتامر حسني هي دي الموضه ده حتى الحلاق مستغرب اني مش على الموضه و مش مسقط البنطلون
على فكره الحلاق كان قايلي اني موديللي قديم شكلي انا كمان دقه قديمة

ما علينا said...

طيب أسأل اصحابك سؤال

ما بيسمعوش عن الخيانات الزوجية
بتبقى الست بنت عيلة وقصة حب قبل الجواز

وتلاقي المدام زهقت ,ملت ,اتصدمت في حبيبها بعد الجواز
ماتعرفش ايه السبب بس تكتشف انها بتخون الباشا

وزي انت ما قلت
يعني واحدة جاية بتقولك اهي
انا غلطت
ربنا بيغفر

لكن هي افكار موروثة هم حتى مش بيحاولوا يفكروا بموضوعية


الموضوع جميل جدا

ronny said...

انا سعيدة بيك جدا وبموضوعك الشيق اللى انا اثرته فى مجموعة قلوب واتمنى ان يكون الوعى بينا اكثر من كدة خصوصاً فى النواحى دى فنظرة المجتمع للمرأة التى كانت لها علاقات قبل الزواج نظرة قميئة وكذلك نفس النظرة ينظر بها للمراة المطلقة على طول يقولواان اكيد العيب منها وانها لازم تكون اسيرة لهذا اللقب اللى ممكن يكون مش بأيديها وبعدين ليه الناس بتنظر تلك النظرة للمطلقة وكأنها عملت عملة مع انها نالت حقها المشروع اللى ربنا شرعوا ليها حقيقى احنا محتاجين نفوق من تخاريف وتقاليدالماضى البالى وياريت منحكمش على الناس ونحاسبهم وكأننا الخالق

Unknown said...

للأسف الخيانه الزوجيه منتشره جدا الايام دي من الطرفين الست و الراجل متعرفش ليه
هو اكيد فكر غلط لأن ممكن اللي ترفضها عشان كده تدبس في واحده تخونك او واحده عملت و مقالتش و حاجات كتيرة

Unknown said...

ronny
هو نقد دائما للسيده فالكل يتأفف من ذكر لفظ مطلقة اما مطلق فهو راجل و الراجل ميعبوش حاجه
للأسف ده ميراث خاطئ من الافكار

Unknown said...

كيد أنا :))))))

Anonymous said...

Well Done ya M3alem.

التجربة الانسانية و الاحتكاك أهم شيئ

لكن للأسف وجود التعارض الغير عادى بين حدود التجربة و الدين و العادات و التقاليد ، يصعب أى حاجة!!!!!!!!

Google