Friday, September 28, 2007

امين ابونية


الكلمه الاولى وظيفه و التانيه مش عارف ايه لازمتها ... انا بتكلم على ايه على العنوان الغريب اللي انا كاتبه اللي انا نفسي مش عارف كاتبه ليه يمكن الفطار لسه كابس على نفسي
المهم نسيبنا من العنوان و ةنخش في المهم ( هو مش مهم اوي لأن كل الكلام تخاريف ) شاورت لميكروباص في رمسيس و طلعت و طلع معايا 2 امناء شرطة طلعت الفلوس و بعتها للسواق و هما قاعدين يدردشو مع بعض و لا كأنهم قاطعين ابونيه في الميكروباص و شويه واحد منهم قال غمره معاك و نزلو و السواق متكلمش بحرف واحد.
مش عارف على غير المخطط من قبلي افتكرت و انا بكتب موقف من قد 8 سنين ركب الميكروباص على خط مطريه الف مسكن 2 رجاله و السواق بعد شويه لما مبعتوش قال اللي طلع ورا يبعت راح ردو عليه احنا مباحث السواق الظاهر كان بلطجي راح رد عليهم و قال يعني ايه مباحث مش راكبين الميكروباص المهم بقى نفسي افتكر ايه اللي حص و دفعوا و لا لأ معلش الزهايمر عامل شغله معايا .
راكب ميكروباص خط بولاق اسعاف من الاسعاف سواق الميكروباص طاير من الفرح اصل البيه امين الشرطه هيرك معاه في الميكروباص و هيباركه يعني محدش هيقدر يقوله ممنوع تطلع على كوبري أكتوبر و لا اي حاجه من دي و عشان فرحان بيه اوي قعده على الكرسي اللي قدام جنبه اللي بيقعد عليه 2 لوحده و الميكروباص بيطلع واحد من الحثاله عامه الشعب تقريبا كان متأخر على الشغل شاف الميكروباص في واحد بس قاعد قدام فبيفتح الباب يقعد جنبه راح السواق قاله لأ البيه قاعد هنا فالراجل اتنرفز و قفل الباب الامين راح شاتمه و قال ............ ( هي الرقابة في كل حتة ) و كان عاوز ينزله ( مش عارف كان ناويه ياخده جوز اقلام و لا ايه ) الراجل السواق قاله عندي انا يا بيه خلاص سيبك منه ( اكيد كان في دماغه يعني هتنزل تتخانق و هتخليني استناك مش هلحق اضرب اللفه بسرعه عشان نلم الفلوس ) يا دي النيله مش قادر استحمل اقعد من غير ما اقرى افكار - راح الامين ركب بأمتعاض و هو يتمتم ( حلوه يتمتم دي انجليزي ده يا مرسي) بشتائم مش هقولها عشان مش كل مره الرقابه تمسح ورايا .
في مترو الأنفاق ( أهو الواحد يغير تلاقيكم قرفتوا من الميكروباصات ) كنت بحط التذكره في الماكينه و بعدي ببص جنبي لقيت اربع امناء شرطة بيقفزوا من على المكن بصيت بأشمئزاز و من فوق لتحت نظره استحقاريه و مشيت للأسف طلعوا اساتذه في البجاحة و انا متوقعتش اني الاقي حد بجح كده واحد منهم بيقولي هو شكلنا غريب و لا اية بصراحة مكنتش متوقع السؤال و تفرق كتير جدا لو كنت متوقعه انا قمت باصص ليه من فوق لتحت و سيبته بس بصراحه مشيت خطوتين على الرصيف و ندمت اشد الندم اني مردتش عليه و قلت : كان هيبقى منظركم اغرب لما تتقفشوا و تدفعوا ال 10 جنيه الغرامة يلا ملحوقة المره الجايه .
و برده عشان متقولوش اني متحامل على امناء الشرطة هحكي حكايه في ميكروباص عن واحد مش امين شرطة ركبت الميكروباص انا و زميل و واحد كان واقف في المحطه و لأنه طلع الاول اطريت اركب انا ورا و صاحبي قدامي و راح صاحبي دفع هو الاجره ( اصلي استغلالي بعيد عنكم ) المهم الراجل اللي طلع مدفعش و انا مبتكلمش شويه كده و السواق قال في حد ورا مبعتش بصيت ليه نظره عابره و سكت شويه و السواق قال الكلمه دي تاني راح الراجل اللي جنبي قال ايوه و حط ايده في جيبه و هو بيطلع الفلوس سألني هو انت دفعت امتى ؟؟ رديت عليه قلت ليه الاستاذ دفعلي راح الراجل رد عليا رد مش هسمع اعجب منه في حياتي قالي طب مش تقول بصيت ليه و مردتش اصل برده الواحد مبقاش فيه حيل للجدال زي زمان بقيت افضل اني اسكت على اني اكلم واحد يشلني .
دي كانت جوله سريعه مع الاستاذامين ابونيه نلتقي بعد السحور

25 comments:

el_assel said...

والله انا مش عارف الدنيا حصل فيها ايه
الشرطة افتكرت نفسها ملكت البلد
تقريبا مش عارفين انهم المفروض يجيبوا الحق لصحابه
مش هما اللي يخدوه
وانا عاجبني قوي السواق اللي اخد الاجرة منهم
المفروض الواحد ما يسيبش حقه يضيع
وياخده بالذات من الناس اللي شايفين نفسهم دول
اتمني ان احنا نكون اصدقاء
سلام يا أهلاوي

Unknown said...

مش كل الشرطه في كويس بس الكويس مختفي في الوحش
انا شغلي جنب قسم و كل يوم بصلي في جامع القسم في ظباط و اتمناء محترمين بس اللي بيبان الوحش

ما علينا said...

امين ابونيه دا منتشر
كما انفولنزا الطيور ما انتشرت تمام

بس انا باشوفهم اكتر
في شرطة المرور وعساكرهم

وياسلام بقى لما يكتم على نفس سواق تاكسي
ويركب معاه كدا
ابونيه


احلى حاجة تلاقي الواحد جاي
باكون بقى عاملة فيها امين شرطة وراكبة قدام
وواخدة الكرسي لحسابي
انتكة بقى تقول ايه

تلاقي الواحد منهم جاي
وبكل الاطة
معك حد يا انسة

وبيفتح الباب
هو على يقين انه هايركب ضامن كمان ان السواق هايقولي هاتي الباشا


وانا بقى من غير ما التفت
اجاوب عليه بايماءة تفيد
ان المكان مشغول

ساعتها باحس من ملامح وشه اني اهنت الذات الملكية

ودماغه يبقى جواها طبعا خمسين الف جملة مفادها استنكار
وشتيمة ممكن عادي ما يضرش


شفت بقى
داء قراءة افكار البشر مش فيك لوحدك
دي احلى حاجة ممكن تعملها


واتحملني بقى
برغيي

اصل انا رغاية اوي
ودا يديك فرصة تعرفني من رغيي

ولو عرفتني
ابقى قولي علشان تعرفني على نفسي

mesh2dra said...

السلام عليكم

بص فيه مقولة بتقول
من آمن العقوبة آساء الأدب

ليك تاج عندي


سلاماتي

Unknown said...

ما علينا
الرغي مش هو المعرفه
انا من عاداتي التأني الشديد في معرفة الشخصية بس ما شاء الله معاكي فلوس تحجزي كرسيين في الميكروباص

Unknown said...

mesh2dra
مش دايما المقوله صحيحه
لأن في كتير امنين العقوبه بس عندهم اخلاء و يخافوا الله
مستني تاجك مع اني مش عارف ليه بتسمو الحوارتات و الأسئلة تاج

mesh2dra said...

السلام عليكم

ولا انا اعرف بيسموه
تاج ليه


أسئلة التاج بتاخدها كوبي وبيست من مدونتى وتجاوب عليها في بلوجتك :)

سلاماتي

Unknown said...

انتي عندك كتير انهي فيهم و انا اجاوب

bastokka طهقانة said...

ما اخذ بعين الحياء فهو حرام
و ما اخذ بالاكراه فهو حرام
و حسبي الله و نعم الوكيل
مساكين الناس دي حيقابلوا ربنا ازاي و يردوا حقوق الناس دي كلها من حسناتهم.. ان كان في حسنات


اوروفوار

http://kasperb4.blogspot.com/ said...

هههههههههه
معلش ماهو ده النظام في بلدنا اليومين دول للاسف
ربنا يصلح احوالنا
بقى ياراجل عايز امين الشرطة يتمسك ف المحطة ويدفع غرامة كمان؟
ياراجل
انت مش من هنا ولا ايه
:D
ربنا يرحمنا

--------
بص يا سيدي هقولك يعني ايه كلمة تاج
انا بردو كنت متار ف معناها زيك كده لحد ما ولاد الحلال قالولي

تاج مش كلمة عربى يعنى مش المقصود التاج اللى بيتلبس على الدماغ..

دى كلمه انجليزية معناها وصف بيوضح شخصية حد

اي خدمة يا سيدي
كل سنة وانت طيب

http://kasperb4.blogspot.com/ said...

على فكرة زيارتك اسعدتني واتمنى متكنش الاخيرة
:)

Unknown said...

bastokka طهقانة
امال لو كتبت على الفرده اللي في المواقف
و فرده كوبري اكتوبر
ده في امين و لا بلاش ده ده محتاج بوست لوحده
ربنا يرحمهم دول ندعيلهم من اللي هيحصلهم

Unknown said...

آلام وآمال
اه ليه ميتقفش و لو رد بقى كانت هتقلب معايا قفش و لازم نعمل محضر
و كنت ساعتها يا انا يا هو فعلا( اكيد هيبقى هو لأنهم كانو 6 امناء )
بس كنت انا الاقوى لأنها كانت محطه العتبه و فيها رتب كبيره

mesh2dra said...

لو قالولك اختارعصر من عصور مصر عشان تعيش فيه تختاراى عصر وفى عهد اى حاكم واشمعنى؟

اول اولوية فى حياتك عيلتك ولا شغلك ولا اصحابك؟

ايه اكتر حاجة بتحبها فى رمضان

اوصف ليا اجمل فطار ممكن تفطره؟


لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟

اللى بيبوظ الحكام ..نفسهم ولا الشعب ولا الحاشية المقربة؟؟


مين اكتر اعلامى مصرى بتحترمه؟؟

قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟

لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟


ايه تانى بلد تتمنى تعيش فيها بعد مصر؟؟

اوصف ليا ترتيبات اجمل فرح ممكن تحضره؟؟

بتراعى كلام الناس والقيل والقال؟ لو اه او لو لا قولى ليه؟

صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟


السعادة هى؟؟


عندك امل ؟ اسبابك ؟


لما تحب تهرب من كل شىء بتروح فين؟؟

mesh2dra said...

استنى
لسه فيه باقي



امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟

لما بتعمل عمل خيرى بيكون ايه هو دافعك الاول؟؟


بتشرب سجاير؟لو الاجابة اه ايه شعورك لو شفت ست بتشرب سجاير وليه؟


بتعرف ايدك اليمين من الشمال ازاى؟


ايه اكتر اله موسيقية بتحبها؟


فى رأيك ليه الذوق والنخوة اتعدموا؟


ايه الحاجة اللى لو حصلتلك تبقى سعيد قوى؟


تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟


البحر ولا النيل؟؟؟

مركب ولا طيارة؟

عاقل ولا مجنون؟


تقرا كتاب ولا تتفرج على فيلم؟


بتمرر التاج لمين؟؟!!!!


سلاماتي

زوجه مفروسه said...

يوه جاتك ايه دمك خفيف
الواحد هيقول ايه يعني غير حسبنا الله ونعم الوكيل
ربنا ينتقم منهم

وكفايه انه لايدخل الجنه من كان في قلبه مثقال ذرة من كبر

Unknown said...

مش قادره
جاري الاجابه و اخاف تكون محبطه الاجابة
زوجه مفروسه
اشكرك على زيارتك
و مين عارف مش يمكن الكبر ده يروح من قلبه و يتوب ربنا يهدي الجميع

سفروتة said...

نفس المشهد بيتكرر قدامي كل كام يوم

تلاقي السواق وقف كده مرة واحدة بدون مقدمات قال ايه سيادة حضرة الامين هيركب الميكروباص

بصراحة سخافة منهم لابعد الحدود واستغلال سئ لوظيفتهم

ما علينا

ربنا يهدي الجميع

تحياتي

Unknown said...

noury
الاستغلال في كل وظيفه و كل مكان مش بس الامين
و كله واخد مثل اللي تكسب به العب بة

Anonymous said...

محمد
مافهمتش آخر قصة
وضحها ممكن ؟
thnax
mona

Unknown said...

wa7dania
اخر قصه لواحد عادي مش امين بس كان بيحاول يركب سفلقه من غير ختم الاوبونيه ( الشرايط بتاعه الامين

simple girl.. ..simple dream said...

انا كمان هاشترى بدلة ظابط وهنزل بيها عشان مادفعش تانى فى ايتها مواصلة فيكى يامصر

Unknown said...

simple girl.. ..simple dream
البدله مش كفايه المهم الشخصيه
امين ابونيه

غمض عينيك said...

حلوة ياباشا اللفة اللي خدتنا معاك فيها دي
بين الميكروباصات والمترو
ايه رأيك لو نضربلنا بدلتين امين شرطة ونظبط نفسنافي مواصلات مصر

المشكلة مش في كده...المشكلة انهم بجحين اوق وكأن دا حقهم
حاجة تفرس

تحياتي
محمد سمير

Unknown said...

غمض عينيك
دي جوله كل يوم
كل يوم تشوف امين من دول في ميكروباص
مترو
اي حاجه
اعدقد ان البدلتين مش كفايه
لازم تنفخ صدرك و تشد نفسك و تتكلم بألاطه عشان تخش عضويه النادي ده

Google